2 Òkúta 3
3
Yèésù Kírísítò Ɔlá-wa nákó wá gé ní ó dzɛ́#ɛ́
1Àrínódzú-mi ŋa, ó ɖi ìwé-èkéèdzì‐ɛ̀ ní ǹ wà tse fú ŋɛ́#ɛ́. Tsí ńǹwé méèdzì méèdzì#ɛ́ kpó#ɛ́, ǹ wà tédzú ŋɛ́ ńŋɛ́ yèé wà ńǹsérè si fú ŋɛ́ ŋa#á, àtsùgbée n dzí ŋɛ́ nódzú-orũ, tsí e wà tsèsérè gbà nɔ́ɔ̀nà-ire. 2Fee, è náa wà tédzú afɔ̀ yèé ŋa agbáfɔ̀-Ɔ̀ɖáyé fɔ̀† ŋa ti fɔ̀ si dzɔ̀ɔ́ dzɔ̀ɔ́#ɛ́ fòò. Tsí iŋɛ́ yèé Ɔlá-wa Agbanɛlà-wa fɔ̀ ní ká tse, tsí adzítsɛ́‐ɛ̀ ŋa tsɛ̀kɔ́‐ɛ̀ fú ŋɛ́#ɛ́, è náa wà tédzú òŋu gbo.
3Iŋɛ́ yèé ó wà ní e mà si rere, tsí kpã́dzú lárè kpó#ɛ́ ní dzɛ́ ní nɔ́dzɔ́-ìtã̀ntã́ ŋa#á, ɔ̀nyà kã̀ŋa nákó wáa wá, tsí dzɛ́ abɛnáranɛ ŋa, tsí à nákó wà lìlò ŋa ńǹrɔ́-kíbí ó wù ŋá gbà#á. À nákó wà bɛ nára-ŋɛ́, 4tsí wà fɔ̀ ní: Tiwa ŋa, kò tsi Yèésù#ɛ́ tàlé ní òŋu nákó wá bɛ́ ɛ̀? Tsí òŋu#ɛ́ fáà báàyí? Àa kó máa rú ara-wa ŋa dza. Gbágbóǹgbàgbò-wa ŋa mú éwo wɔsà báàyí ɔ̀nà‐ɛ̀ dzɛ̃̀. Tsí iŋɛ́-kã̀ kò sì kpàrɔ̀ɔɔ̀. Kíbí iŋɛ́ ŋa#á wà gbà títí ńǹkpìnkpìlɛ̀-ayé gbaŋgba#á, bɛ́ɛ̀ gé ní à wà si nɔ́mbɛ́ gbo#ɛ́.
5Ó ɖi, bí ó dzɛ́ ní à wà fɔ̀ bɛ́ɛ̀#ɛ́, à wà mú iŋɛ́-kã̀ tse ìgbàgbé. Tsí iŋɛ́#ɛ́ ní dzɛ́ ní: Títí dzɔ̀ɔ́ dzɔ̀ɔ́ ní Ɔ̀ɖáyé tsí arũ, tsí wíìnyɛ̀, tsí ń tse ìgbèrí, tsí ń tse ilɛ̀ gbo#ɛ́. Ó kɛ́ omi, tsí tse tsí ilɛ̀ bɔ́ ti ńnɔ́‐ɛ̀. 6Tsí omi ké ní ó kɛ́, tsí ń kɔ̃́ ìtalɛ̀#ɛ́ kpó rɔ̃gbɔ̃gbɔ̃ɔ̃, tsí ń ra ayé-dzɔ̀ɔ́ dzɔ̀ɔ́#ɛ́. 7Ó ɖi, ìgbèrí òŋu ilɛ̀ yèé àa wà rí nɔ́mbɛ́ báàyí#ɛ́, ìnyɛ̀#ɛ́ ké ní Ɔ̀ɖáyé wí, tsí ń nyà ŋá si nákpálà-kã̀ si, tsí kó wáa dzó ŋa ńná kpa kpó búláá#á. Ó nyà ŋá si nákpálà-kã̀ si fú ɔdzɔ́-ɛdzɔ́ kpíkpè#ɛ́ ni. Nɔ́dzɔ́#ɛ́ ní nákó tse tsí adzàbi ŋa nákó tsɛ̀rá#á.
8Àrínódzú-mi ŋa, fee, iŋɛ́-kã̀ ní wà, tsí kò wà ní e gbàgbé#ɛ́. Òŋu ní wà dzɛ́ ní nódzú-Ɔlɔ́dzɔ́ òŋu#ɛ́, ɔdzɔ́ ɔ̀kã̀ntso wà kíbí ɔɖɔ̃́ ɛgbɛ̀rú (1.000) bɛ́ ni, tsí ɔɖɔ̃́-ɛgbɛ̀rú gbo wà kíbí ɔdzɔ́ ɔ̀kã̀ntso bɛ́ ni. 9Kàkó kpɛ̃́, Ɔlɔ́dzɔ́ nákó sã àlé‐ɛ̀ ńǹsɛ̃̀ɛ̃́. Ó ɖi, ɔ̀nyà kã̀ŋa òŋu wà rí ní ó ɖi dzídzɛ̃̀. Fee, Ɔlɔ́dzɔ́ tse àtsùgbée tiŋɛ́, tsí gbódzú si ni. Iŋɛ́ yèé tse#ɛ́, kò wò ní ɔ̀nyà-kã̀ kpókpó kó tsɛ̀rá. Kà kàa bɛ́ɛ̀, ó wà wò ní ɔ̀nyà kpó kó nyáa nyíìlò kpaɖà ni. 10Ɔdzɔ́-Ɔlɔ́dzɔ́#ɛ́ nákó wáa bá wa bɛ́ gé gbùrù kíbí à kà módzú lé, tsí olè náa wáa tsolenɛ bɛ́#ɛ́ ni. Nɔ́dzɔ́-ɔdzɔ́ nyɛ̀ŋɛ̀#ɛ́, ìgbèrí nákó nɔ̀ ǹɖe bɛ́ hùùm, tsí àrã̀wo ŋa gbo nákó dzoná kpó. Tsí ayé gbaŋgba#á òŋu iŋɛ́ yèé ŋa ɔ̀nyà ŋa tse#ɛ́ nákó kí ńgbaŋgba, tsí Ɔlɔ́dzɔ́ kó kpɛdzɔ́ fú ŋa.#3:10 À nákó nyáa gbɔ́ òkpì-afɔ̀-ìkã́ã̀nyì#ɛ́ gbo ní: “Tsí Ɔlɔ́dzɔ́ nákó tãná gú ìtalɛ̀#ɛ́ òŋu iŋɛ́ yèé ŋa wà ńǹtá‐ɛ̀#ɛ́ kpó búláá.”
11Kíbí ó dzɛ́ ní ayé gbaŋgba#á kpó bàkó wáa nɔ̀ ǹɖe bɛ́ɛ̀#ɛ́, ɛ̀ŋɛ ká-ŋɛ́ è ti ma ɛsɛ̀ yèé è nákó wà ń tɛ̀#ɛ́ si nɔ̀? Ó wà ní e wà lìlò-ire, tsí kó nyà ɖíre ní è dzɛ́ ti Ɔ̀ɖáyé, tsí e wà nɛ́ àrísá gbo fúu. 12Tsí è náa wà ɖóro wo ɔdzɔ́-Ɔ̀ɖáyé gbo ní kó wá, tsí è náa wà fɔ̀ gìɖì gbo ní ɔdzɔ́#ɛ́ kò yaà wá. Nɔ́dzɔ́ nyɛ̀ŋɛ̀#ɛ́, iná nákó dzó ìgbèrí kpa kpó búláá, tsí gbígboná lákṹ-kã̀ nákó tse tsí àrã̀wo ŋa gbo nákó yɔ́. 13Ó ɖi, Ɔ̀ɖáyé tàlé si ní ìgbèrí titɔ̃-kã̀ òŋu ilɛ̀ titɔ̃-kã̀ nákó wá, tsí àŋa ní àa wà ɖóro wò#ɛ́. Ńbɛ̀ ní atsòtítɔ́ ŋa nákó gbé#ɛ́.
14Náàtóoríi bɛ́ɛ̀#ɛ́, àrínódzú-mi ŋa, tã́ná ɔdzɔ́ yèé è wà ɖóro wò#ɛ́ kó wá#á, ó wà ní e wà tsikpá, tsí nɔ́dzɔ́-ɔdzɔ́ nyɛ̀ŋɛ̀#ɛ́, Ɔ̀ɖáyé kó rí ní àbi-ŋɛ́ ŋa wɛ̀ ǹɖe, tsí è wà nɔ́wɔ́ nɔ́wɔ́ gbo si, tsí ɛ̀ŋɛ‐ɛ̀ méèdzì e gbé rere. 15Kó yé ŋɛ́ si ní Ɔlá-wa gbódzú si ni. Àtóoríi bɛ́ɛ̀ ní ɔ̀nyà ŋa nákó nyáa rí ɔlà#á. Kpɔ́lù dzɛ́ ìnàbí-wa òŋu àrínódzú-wa. Tsí afɔ̀#ɛ́ ké ní òŋu gbo fɔ̀ sí ńǹwé fú ŋɛ́#ɛ́. Ó fɔ̀ɔ́ òŋu ifɛ̀ɛ́nɔ́ ìmarũ yèé Ɔ̀ɖáyé fúu#ɛ́. 16Tsí iŋɛ́#ɛ́ ké ní ó fɔ̀ si ńǹwé yèé ó tse ŋa kpó, tsí wíìnyɛ̀ ti nára-afɔ̀ nyɛ̀ŋɛ̀ ŋa#á. Ńǹwé yèé ó tse ŋa#á, ìɖì kã̀ŋa wà, tsí iŋɛ́ yèé ó fɔ̀ bɛ̀#ɛ́, òkpì‐ɛ̀ gbígbɔ́ náa le. Tsí ɛnɛ yèé ŋa kò gba ɛ̀kɔ́-kã̀ kpókpó, tsí àkaralé-ŋa gbo kò wɔlɛ̀#ɛ́, à náa nya òkpì‐ɛ̀ nóòmírɛ̃̀. Bɛ́ɛ̀ ké ní à náa tse fú ìwé-àtíbɔ̀ yèé ŋa gbo wà ńǸwé-Ɔ̀ɖáyé†#ɛ́. Tsí àŋa ká-ŋa gé ní bàkó tsɛ̀rá bɛ́ɛ̀#ɛ́.
17Ó ɖi, àrínódzú-mi ŋa, ɛ̀ŋɛ òŋu, ǹ tɛ̀ ŋɛ́ nɛ́sɛ̀ si ná. Ńbɛ̀ɛ́, è tsɔ́ éwo-ara-ŋɛ́ ŋa rere. Tsí bí è tse bɛ́ɛ̀#ɛ́, ɔ̀nyà-íbàɖí ŋa kàkó nyáa mú ŋɛ́ nɔ̀, tsí è kàkó tsubú dzì náàbi gbo. È nákó ɖóro rìgírìgí si kíbí è ɖóro gbà si báàyí#ɛ́. 18Ó ɖi, odzú-ŋɛ́ kó wà tsí máa làkóò si ńǹtá-ore-ɔ̀fɛ́ yèé Yèésù Kírísítò Ɔlá-wa òŋu Agbanɛlà-wa wà tse fú ŋɛ́#ɛ́. Tsí è náa wà màá máa gbo làkóò. Ɔkpɛ́ kɔ́kpɛ́ ni ɔkpɛ́‐ɛ̀ ni ti nɔ́mbɛ́ títí lɔ náàrìtã́. Ɛ̀tsɛ.
© (Active), Wycliffe Bible Translators, Inc. All rights reserved.