2 Òkúta 2
2
Òkúta wà tɛ olí-Yèésù ŋa nɛ́sɛ̀ si ti nára-atsɛ̀kɔ́-òɖòbò ŋa
1Ó ɖi, atsìké-agbáfɔ̀-Ɔ̀ɖáyé fɔ̀† ŋa gbo gbé náàŋírĩ-ɔma-Ìsàràyɛ́lì† ŋa wáa lɔ náàsòkò nyɛ̀ŋɛ̀. Bɛ́ɛ̀ ké ní atsɛ̀kɔ́-òɖòbò ŋa gbo nákó gbé náàŋírĩ-ɛ̀ŋɛ gbo#ɛ́ ńnɛ̀ɛ́. À nákó wà yɔ́ ɛ̀kɔ́-òɖòbò ŋa tse náàŋírĩ-ŋɛ́ hɔ́ɛ́ɛ́ hɔ́ɛ́ɛ́. Tsí ɛ̀kɔ́ ŋa#á nákó tse tsí ɔ̀nyà ŋa nákó tsɛ̀rá. Atsɛ̀kɔ́-òɖòbò ŋa#á kɔ Ɔ̀gá yèé gbà ŋá dzɔ̀ɔ́ nɔ́wɔ́-ɔ̀tɛ̀-ŋa gìɖì gbo#ɛ́. Tsí kíbí à wà tse bɛ́ɛ̀#ɛ́, à wà bèrè fú ara-ŋa, tsí à nákó sì tsɛ̀rá bɛ́ gé gboŋu. 2Ɔ̀nyà kpíkpɔ̀ nákó wérè ŋá ńǹlò wérewère yèé à wà lò#ɛ́. Tsí náàtsùgbée tiŋa#á, ɔ̀nyà ŋa nákó mú ɔ̀nà-òtítɔ́#ɛ́, tsí wà ń tse. 3Owó gé ní atsɛ̀kɔ́-òɖòbò ŋa náa wà wò#ɛ́. Náàtsùgbée bɛ́ɛ̀ ní à náa wà ɖɔ̃ arũ fú ŋɛ́, tsí wà ń tɛ̀ ŋɛ́ dzɛ#ɛ́. Náàtsùgbée bɛ́ɛ̀#ɛ́, Ɔ̀ɖáyé ti kpaɖí si lɛ́lɛ́ǹlɛ̀lɛ̀, tsí kó ɖáàbi fú ŋa, tsí nákó ra ŋá gbo kpó bútúbútú.
4Fee, Ɔ̀ɖáyé kò kɔ àrìmáa fɛtí fú adzítsɛ́-ɔ̀rɔ̃† yèé ŋa dzàbi‐ɛ̀#ɛ́. Kà kàa bɛ́ɛ̀, ó kɛ́ ŋa sɔ lɔ ńfò lákṹ yèé kò nɛ́ ìkpàkũ#ɛ́ ni. Tsí ó mú ɛ̀ŋà si nɛ́sɛ̀ fú ŋa nóòkùkù#ɛ́ si bɛ̀ si títí fú ɔdzɔ́-ɛdzɔ́-kpíkpè#ɛ́. 5Ɛnɛ yèé gbé wáa lɔ dzɔ̀ɔ́ dzɔ̀ɔ́ lɛ́lɛ́ǹlɛ̀lɛ̀ ŋa#á, Ɔ̀ɖáyé kò kɔ̀ àŋa gbo dzɔ̀ɔ́ náàrì fɛtí fú ŋa. À kɔ̀ ní àŋa kàkó nɛ́ àrísá fúu, tsí Ɔ̀ɖáyé tse tsí òdzò lákṹ-kã̀ rɔ̀ gbɛ̀, tsí omi kɔ̃́ ìtalɛ̀#ɛ́ kpó rɔ̃gbɔ̃gbɔ̃ɔ̃, tsí mu ìɖì kíìɖì kpó tsúrɛ̃́ tsúrɛ̃́, tsí ra ŋá kpó. Ó ɖi, ó gba Nòwᆠòŋu ɔ̀nyà méedze là. Nòwá#á ní dzíkɔ̀ ní ɔ̀nyà ŋa ká tse òtítɔ́#ɛ́. 6Ɔ̀ɖáyé tãná gú ìlú-Sòɖómì òŋu Gòmɔ́rà méèdzì gbo, tsí à dzoná búláá, tsí ɖi eérú. Ó tse bɛ́ɛ̀, tsí ń ɖáàbi fú ŋa, tsí ń ra ŋá gbo kpó ni, àtsùgbée ɔ̀la ɔ̀nyà ŋa ká mà si ní iŋɛ́ yèé bàkó wáa bá ɔ̀nyà-íbàɖí ŋa náànyìwà#á ńnɛ̀ɛ́. 7-8Ńǹwèrè yèé Lɔ́tì gbé wáa lɔ#ɛ́, ó gbé náàŋírĩ-ɔ̀nyà-íbàɖí ŋa ńǹlú-Sòɖómì#ɛ́ ni. Ó ɖi, atsòtítɔ́-kã̀ ní ó dzɛ́ nódzú-Ɔ̀ɖáyé#ɛ́. Tsí ìlò wérewère yèé à náa wà lò ŋa#á kà tì gba ɛ̀ɖɔ̃̀ fúu gìɖì ɖã́wò. Yèé òŋu dzɛ́ atsòtítɔ́#ɛ́, bí ó wà rí ìríkirí nyɛ̀ŋɛ̀ ŋa, tsí wà gbɔ́ ìgbɔ́kigbɔ́ nyɛ̀ŋɛ̀ ŋa gbo gé#ɛ́, náa ɖɔ̃̀ɔ̃́ tó bɛ́ɛ̀. Ó ɖi, Ɔ̀ɖáyé gba òŋu là. 9Iŋɛ́ yèé ŋa nyí kpó wà nyà ɖíre ní Ɔlɔ́dzɔ́ ma kíbí náa tse gbà, tsí gba ɛnɛ yèé ŋa náa nɛ́ àrísá fúu#ɛ́ nɔ́wɔ́-àɖã́wò#ɛ́. Tsí ɛnɛ yèé ŋa gbo náa tse íbàɖí#ɛ́, ó ma kíbí náa tse gbà, tsí mú ŋa si nákpálà-kã̀ si, tsí kó wáa fɛtí fú ŋa nɔ́dzɔ́-ɛdzɔ́ kpíkpè#ɛ́. 10Ɔ̀nyà kã̀ŋa wà, tsí à kò wà mú Ɔ̀ɖáyé Ɔlɔ́dzɔ́, tsí wà ń kpe iŋɛ́-kã̀, tsí ìlò gbígbɛ̃ɛ̃́rĩ́ yèé ŋa náa ti ńɖi-kíbí ɔ̀nyà yà gbà#á gbo gé ní à náa wà ń lílò si#ɛ́. Ɛnɛ nyɛ̀ŋɛ̀ ŋa gìɖì ní Ɔlɔ́dzɔ́ nákó fɛtí fú lárè kpó#ɛ́.
À náa tse ǹ tó fú ara-mi, tsí à náa tse kɛ́rɛ́kɛ́rɛ́ gbo. À kà nɛ́ àrísá fú ɛnɛ yèé ŋa wà nɔ́ɔ̀rɔ̃#ɛ́, olí-iyì ŋa. Kà kàa bɛ́ɛ̀, à náa wà bú ŋa ni. 11Adzítsɛ́-ɔ̀rɔ̃ ŋa yèé gìɖì nɛ́ àmí, tsí nɛ́kpá gbo lárè#ɛ́, àŋa òŋu, à kà kpɛdzɔ́ bá ɛnɛ yèé ŋa wà nɔ́ɔ̀rɔ̃#ɛ́, olí-iyì ŋa, tsí à kà bú ŋa gbo nódzú-Ɔlɔ́dzɔ́. 12Ó ɖi, ɛnɛ nyɛ̀ŋɛ̀ ŋa òŋu, iŋɛ́ yèé à kò mà ŋa#á, à náa wà bú ŋa. À náa tse iŋɛ́ ŋa#á bɛ́ gé kíbí ɛrã ŋa ńkóko gbo wà, tsí à kò nɛ́ ìsérè#ɛ́ ni. Ɛrã ŋa bɔ̀ si fú ká mú ŋa, tsí kpa ŋá gé ni. Tsí ńǹrɔ́-kíbí ɛrã ŋa ńkóko nákó tsɛ̀rá gbà#á, bɛ́ɛ̀ ké ní ɛnɛ nyɛ̀ŋɛ̀ ŋa gbo nákó tsɛ̀rá#á. 13Íbàɖí yèé à tse bá ɔ̀nyà ŋa#á, òŋu#ɛ́ ké ní à nákó ń sã ɛŋɛ̀ fú ŋa#á. Ká lìlò-wérewère yèé ŋa náa wù ŋá#á nóòsã́ gãgã gé ní náa wà mú ayè tɛ́ ŋa#á. Èérĩ́ ní à dzɛ́ si#ɛ́, tsí à wà ɖánɔ́ mú ŋɛ́. Tsí bí à wà dzɛ ɔɖɔ̃́ bá ŋɛ́, à náa ɖa inɔ́ ɖà ńlɛ̀, tsí wà dzɛ, tsí wà mɔ, tsí wà rú ŋɛ́ gbo, tsí náa dzɛ́ aréma si fú ŋa, tsí à náa wà tse. 14Odzú-ŋa náa wà ńǹtá-ɔnɔbɛ̃̀ɛ̃ ŋa si ní àŋa kó wà sũ̀ bá ŋa gé ni. Tsí íbàɖí tsítse gìɖì gbo kà sú ŋa láyé. Àbìtì-ŋa náa wà ré kpa ɛnɛ yèé ŋa àkaralé-ŋa kò wɔlɛ̀ rere#ɛ́, tsí odzú-ŋa náa kí ńǹtá-iŋɛ́ kpó títí iŋɛ́ yèé à nɛ́ si#ɛ́, à náa wà wò máa gé ni. Èré-Ɔ̀ɖáyé gbo má ŋa si. 15À kɔ ɔ̀nà sísɛ̃́#ɛ́ dzɔ̀ɔ́, tsí à nɔ̀ si. À fa ɛkpa yèé Bàlámì, ɔma-Bòsórì gbo fà#á. Bàlámì#ɛ́, owó yèé à bàkó sã fúu#ɛ́, ó ɖɔ̃̀ fúu, tsí ó dzɛ́, tsí tse íbàɖí. 16Ó ɖi, Ɔ̀ɖáyé báa fɔ̀, iŋɛ́ yèé tse#ɛ́, kò gbɔ́ɔ̀lú fúu. Fee, kɛ́tɛ́kɛ́tɛ́-kã̀ ǹɖe gé, tsí kpé ìnyɛ̀ wíwí kíbí ɔ̀nyà náa wíìnyɛ̀#ɛ́. Kíbí ó tse bɛ́ɛ̀#ɛ́, ìlò-éwo kò sí fúnɛ yèé Bàlámì, agbáfɔ̀-Ɔ̀ɖáyé fɔ̀ wà lò#ɛ́, ó ń kì.#2:16 È káà kã ɛ̀rɔ́-Bàlámì#ɛ́ ńǸwé-Ìrɛ̃̀ nɔ́ɔ̀ɖã̀ 22:1-35 (Nombres 22:1-35).
17Atsɛ̀kɔ́-òɖòbò ŋa#á, éwo-oɖò yèé gbɛ̃ ŋa#á ní à dzɛ́#ɛ́. Tsí à wà kíbí òdzò gbo náa tsú, tsí awu lákṹ náa tse gbàgbàgbà, tsí kóo lɔ#ɛ́ bɛ́ ni. Ìɖì yèé Ɔ̀ɖáyé kpaɖí si fú ŋa#á ní dzɛ́ òkùkù lákṹ kpìrìm#ɛ́. 18Afɔ̀ lákṹ lákṹ ŋa ní náa wà fùɖá nárũ fú ŋa#á. Tsí afɔ̀ ŋa#á kà sì dzɛ́ afɔ̀-òtítɔ́-kã̀ bɛ́. Ɔ̀nyà kã̀ŋa wà#á, ńǹsɛ̃̀ɛ̃́ gé ní à bɔ́ nɔ́wɔ́-ìlò yèé ɛnɛ yèé ŋa kò wà nɔ́ɔ̀nà-òtítɔ́#ɛ́ náa wà lò#ɛ́. Tsí afɔ̀ lákṹ lákṹ yèé atsɛ̀kɔ́-òɖòbò ŋa#á náa wà fɔ̀#ɛ́, náa dzí awù-íbàɖí-ŋa wá ró, tsí à náa sɛ̃̀ tsubú dzì náàbi ró. 19À náa wà tàlé fú ɔ̀nyà titɔ̃ ŋa#á ní à nákó kí nɔ́wɔ́-ara-ŋa. Tsí àŋa ká-ŋa ńnɛ̀ɛ́, à sì dzɛ́ arú si fú ìlò wérewère yèé ŋa náa múnɛ tsɛ̀rá#á. Iŋɛ́ yèé tse#ɛ́, bí iŋɛ́-kã̀ nɛ́ ɛ̀tsɛ si ńǹtá-ɛ̀ɛ#ɛ́, mà si gé ní ò ɖi arú‐ɛ̀ ńnɛ̀ɛ́. 20Fee, kíbí à ma Yèésù Kírísítò Ɔlá-wa òŋu Agbanɛlà-wa#á, ó tse tsí à bɔ́ nɔ́wɔ́-ìlò gbígbɛ̃ɛ̃́rĩ́ yèé ŋa ɔ̀nyà-ìtalɛ̀ bí ŋa náa wà lò#ɛ́. Ó ɖi, bí ó dzɛ́ ní à sɛ̃̀ kpé ìlò ŋa#á lílò ró#ɛ́, ìlò ŋa#á nákó nɛ́kpá si ńǹtá-ŋa ró, tsí ayé-ŋa nákó tsɔ̀bɔ̀ láre ti dzɔ̀ɔ́. 21Iŋɛ́ yèé tse#ɛ́, à kàá ma ɔ̀nà-òtítɔ́#ɛ́, ó má sã̀ fú ŋa láre kíbí à màá tã́ báàyí, tsí wà kɔ ɛ̀kɔ́-Kírísítò yèé à ń bɔwɔ́-ŋa ní ká wà tse si ńǹtá‐ɛ̀#ɛ́. 22Kíbí iŋɛ́ ŋa#á lɔ fú ŋa gbà#á, ó wà nyà ɖíre ní òwe yèé à kpa si#ɛ́ dzɛ́ òtítɔ́ ńnɛ̀ɛ́. Òwe#ɛ́ wà fɔ̀ ní: “Adzá sɛ̃̀ lɔ káà kɛ́ iŋɛ́ yèé ó kpɔ̀ si#ɛ́ dzɛ.”#2:22 Ìwé-Òwe ŋa 26:11 (Proverbes 26:11) Nàmí: “À wɛ̀ fú ɔ̀hà tã́, tsí ó sɛ̃̀ lɔ káà nyíǹká ńkpɛ̀tɛ̀kpɛ́tɛ́ ró.”
© (Active), Wycliffe Bible Translators, Inc. All rights reserved.