1 Tìmɔ̀té 4

Kpɔ́lù wà wí fú Tìmɔ̀té ní kó múgírí tsitsɛ́, tsí kó dzɔdzú-Ɔ̀ɖáyé

1Ńbɛ̀ɛ́, Mímí-Ɔ̀ɖáyé† wí gãgã ní: Nɔ́dzɔ́-ìkã́ã̀nyì ŋa#á, ɔ̀nyà kã̀ŋa nákó kɔ àkaralé yèé à nɛ́ si ńǹtá-Yèésù#ɛ́ dzɔ̀ɔ́, tsí káà tɛ̀ náànyì-edzò† ŋa. Edzò ŋa#á nákó rú ŋa, tsí tsɛ̀kɔ́-òɖòbò ŋa fú ŋa. 2À nákó wà wíìnyɛ̀ fú ŋa gbà ńǹtá-ɔ̀nyà ŋa. À nákó dzɛ́ ɔ̀nyà-atsendzɔdzú ŋa, tsí wà tsòɖòbò gbo. Ó wà kíbí Ètsù† mú ɔgã́ gbígboná bu lolo si ńǹsérè-ŋa si bɛ́ ni. 3À náa kɔ̀ fú ɔ̀nyà ŋa ní ká máa náya nàmí ká máa nɔ́kɔ. Tsí à náa ɖá ɛ̀wɔ̀ gbo fú ŋa ní ká máa dzɛ dzídzɛ-ìrɔ́ kã̀ŋa òŋu ɛrã-ìrɔ́ kã̀ŋa. Tsí dzídzɛ nyɛ̀ŋɛ̀ ŋa#á, Ɔ̀ɖáyé ní sì ɖá ŋa#á. Tsí olí-Yèésù ŋa, àŋa yèé ma òtítɔ́#ɛ́, à nákó nyáa gbàá, tsí wúùre fú Ɔ̀ɖáyé, tsí ɖɔ́kpɛ́ fúu, tsí dzɛɛ́.

4Ó ɖi, iŋɛ́ ɔ̀kã̀lɔ́ɔ̀kã̀ kpó yèé Ɔ̀ɖáyé ɖá#á dzɛ́ iŋɛ́-ire, tsí ɔ̀kã̀ kpókpó kò nɛ́ ká ń taánù. Ó wà ní ká gbàá, tsí ɖɔ́kpɛ́ fú Ɔ̀ɖáyé fúu ni. 5Dzídzɛ ɔ̀kã̀lɔ́ɔ̀kã̀ sã̀ ní ká dzɛ, iŋɛ́ yèé tse#ɛ́, ìre wúwú òŋu afɔ̀ yèé Ɔ̀ɖáyé fɔ̀ si#ɛ́ náa sɔɔ́ ɖi iŋɛ́-ire nódzú-Ɔ̀ɖáyé.

6Bí ò tsɛ̀kɔ́ yèé ŋa nyí kpó fú ìnàbí-wa ŋa, nàa dzɛ́ àtsìtsɛ́-ire ti Yèésù Kírísítò. Bí ò wà tse bɛ́ɛ̀, nàa wà tã afɔ̀-Yèésù wò rere, tsí nàa wà tã inɔ́‐ɛ̀kɔ́-òtítɔ́#ɛ́ gbo wò, ɛ̀kɔ́ yèé ò ti gbà#á. Bí ò tse bɛ́ɛ̀#ɛ́, nàa wà ɖonùgbó ńnɛ̀ làkóò.

7Ó ɖi, máa wà rɛ̃tígbè-ɛ̀rɔ́-òɖòbò ŋa, ɛ̀rɔ́ yèé onùgbó ŋa náa wà kpa#á. À kò ɖé bá òtítɔ́-Ɔ̀ɖáyé. Múgírí, tsí o wà tse iŋɛ́ yèé náa dzɔdzú-Ɔ̀ɖáyé#ɛ́. 8Bí ò múgírí tsitsɛ́, tsí ara-ɛ̀ɛ là#á, èrè oɖé tsígíɖí wà ńnɛ̀. Ó ɖi, bí ò múgírí, tsí dzɔdzú-Ɔ̀ɖáyé#ɛ́, èrè yèé kò nɛ́ títã́#á ní wà ńnɛ̀#ɛ́. Èrè#ɛ́ ní dzɛ́ ní nàa rí àyɛ̀ ńǹtalɛ̀ bí, tsí rí àyɛ̀-àrìtã́ gbo. 9Afɔ̀ yèé ǹ wà fɔ̀ fɛ́ɛ#ɛ́, àkaralé wà ńnɛ̀, tsí ó dzɔ ní ɔ̀nyà kpó kó gbàá gbɔ́. 10Àtsùgbé-afɔ̀#ɛ́ ní àa ɖìgírí si kũkũ, tsí wà tsitsɛ́#ɛ́. Iŋɛ́ yèé tse#ɛ́, àa módzú-wa si nɔ́ɔ̀nà si fú Ɔ̀ɖáyé Oláàyɛ̀. Òŋu ní dzɛ́ Agbanɛlà fú ɔ̀nyà kpó#ɛ́, tsí ɛnɛ yèé ŋa gbàá gbɔ́#ɛ́, nákó gbà ŋá là.

11Iŋɛ́ yèé wà ní o wí fú ŋa ní ká tse, tsí o wà tsɛ̀kɔ́-ɛ̀ gbo fú ŋa#á ńnɛ̀ɛ́.

12Máa dzɛ́ gìɖì, tsí ɔ̀nyà-kã̀ kpókpó kó múɛ kpe kí ŋa ńnɛ̀ɛ́ ń ti yèé ò kò dzɛ́ onùgbó#ɛ́. Kà kàa bɛ́ɛ̀, nà dzɛ́ ɔ̀nyà-ká rí tse fú olí-Yèésù ŋa ńǹnyɛ̀-arũ-ɛ̀ɛ òŋu ńǹgbèngbé-ɛ̀ɛ. Nà nɛ́ àmúɖɔ̃̀ fúnɛ, tsí nà nɛ́ àkaralé gbo si ńǹtá-Yèésù, tsí iŋɛ́ tsítse-ɛ̀ɛ ŋa kpó kó dzɛ́ iŋɛ́ mímá. Tsí o dzɛ́ ɔ̀nyà-ká rí tse fú ŋa. 13Tã́ná n wá#á, nà ɖìgírí, tsí wà kã afɔ̀-Ɔ̀ɖáyé fú ɔ̀nyà ŋa, tsí nà tsɛ̀kɔ́ fú ŋa, tsí nà ɖáàmí le ŋá gbo ní ká gbàá gbɔ́.

14Dzɔ̀ɔ́ dzɔ̀ɔ́#ɛ́, agbáfɔ̀-Ɔ̀ɖáyé fɔ̀†-kã̀ wíìnyɛ̀, tsí onùgbó-ɛgbɛ́-Kírísítò ŋa mɔ́wɔ́ lé ńǹtá-ɛ̀ɛ, tsí Ɔ̀ɖáyé fɛ́ɛ ńkpá-ɔ̀fɛ́-kã̀. Ikpá#á, nà múu, tsí ń tsitsɛ́.#4:14 Dzɔ̀ɔ́ dzɔ̀ɔ́#ɛ́, bí à mɔ́wɔ́ lé ńǹtá-ɔ̀nyà-kã̀, tsí wúùre fúu#ɛ́, ó wà nyà ɖíre ní Ɔ̀ɖáyé tsã ɛnɛ nyɛ̀ŋɛ̀ ní kó tsitsɛ́-kã̀ fú òŋu ńnɛ̀ɛ́.

15Iŋɛ́ yèé ǹ fɔ̀ fɛ́ɛ ŋa#á, nà mú ŋa tsitsɛ́. Tsí nà mú ìsérè-ɛ̀ɛ òŋu àmí-ɛ̀ɛ kpó, tsí ń si ńnɛ̀, tsí ɔ̀nyà kpó kó rí ní ò wà lɔ ńwádzú. 16Nà tɔ́dzú-ìlò-ɛ̀ɛ òŋu ɛ̀kɔ́ yèé ò wà tse fú ɔ̀nyà ŋa#á rere. Nà gbódzú si ró, tsí wà tse iŋɛ́ ŋa#á kpó. Tsí Ɔ̀ɖáyé nákó gbàɛ́ là, tsí nákó gba ɛnɛ yèé wà rɛ̃tígbè-ɛ̀ɛ ŋa#á gbo là.

Currently Selected:

1 Tìmɔ̀té 4: ngl

Highlight

Copy

Compare