1 Tìmɔ̀té 3

Kpɔ́lù wà fɔ afɔ̀-ìlò-onùgbó-ɛgbɛ́-Kírísítò ŋa òŋu àtsìtsɛ́-ɛgbɛ́-Kírísítò ŋa

1Afɔ̀ yèé ǹ bòkó fɔ̀ fɛ́ɛ#ɛ́, àkaralé wà ńnɛ̀. Bí ɔ̀nyà-kã̀ wà wò ní òŋu kó dzɛ́ onùgbó-ɛgbɛ́-Kírísítò#ɛ́, itsɛ́-ire ní ó wà wo kó tse#ɛ́.

2Kíbí ó dzɛ́ itsɛ́-ire ní ó dzɛ́#ɛ́, ó wà ní onùgbó-ɛgbɛ́-Kírísítò#ɛ́, ɔ̀nyà-kã̀ kpókpó kó máa nyáa dzinya-ìlò‐ɛ̀. Kó nɛ́ aya ɔ̀kã̀ntso gbo, tsí aya#á kó tóo. Kó wà mú ara‐ɛ̀ gbo rere, tsí kó wà tse iŋɛ́-ɔ̀nyà gbo. Ńŋɛ́ ɔ̀kã̀lɔ́ɔ̀kã̀ kpó#ɛ́, ó wà ní kó wà gbɛ̃́ ara‐ɛ̀ gbo rere. Tsí kó wà gba àledzò gbo rere, tsí kó nyáa tsɛ̀kɔ́ fúnɛ gbo. 3Kó máa dzɛ́ àmɔ̀tíŋɔ́ gbo. Kó máa dzɛ́ ɛnɛ yèé náa tse àhã́rã́máɖí#ɛ́ gbo. Kà kàa bɛ́ɛ̀, kó dzɛ́ ɔ̀nyà tútù-kã̀ fú ara‐ɛ̀ gé, tsí odzú‐ɛ̀ gbo kó máa gù si ńǹtá-owó.

4Kó wà gbɛ̃́ kpàtá tòŋu ká‐ɛ̀ rere. Tsí ɔma‐ɛ̀ ŋa ká wà gbɔ̃́ɔ̃̀rã̀ fúu, tsí ká máa wà tse iŋɛ́ kòdzɔkòdzɔ. 5Ó ɖi, ɛnɛ yèé kò nyáa wà gbɛ̃́ kpàtá tòŋu ká‐ɛ̀#ɛ́, kàkó nyáa gbɛ̃́ ɛgbɛ́-Ɔ̀ɖáyé gbo.

6Ó bèrè gbo ró ní onùgbó-ɛgbɛ́-Kírísítò#ɛ́ kó máa dzɛ́ ɛnɛ yèé gba Yèésù Kírísítò gbɔ́, tsí kò dzɛ̃̀ wòná#á. Bí ó dzɛ́ ɛnɛ yèé gba Yèésù Kírísítò gbɔ́ titɔ̃#ɛ́, nákó wà kɛ́ ara‐ɛ̀, tsí Ɔ̀ɖáyé nákó kpɛdzɔ́ múu kíbí Ètsù† gbo tse, tsí ó kpɛdzɔ́ múu#ɛ́. 7Ó wà ní ɛnɛ yèé kò wà nɛ́gbɛ́-Kírísítò ŋa gbo#ɛ́, àŋa gbo, ká rí ní ìlò‐ɛ̀ ɖíirí, tsí ká wà nɛ́ àrísá fúu. Ó ɖi, bí ìlò‐ɛ̀ kò wà bɛ́ɛ̀#ɛ́, ɔ̀nyà ŋa nákó fɔ afɔ̀-íbàɖí nára‐ɛ̀, tsí Ètsù nákó sɔ fɛ́tsa múu.

8Àtsìtsɛ́-ɛgbɛ́-Kírísítò ŋa gbo ká máa wà tse iŋɛ́ kòdzɔkòdzɔ. Afɔ̀ gbo kó gãgã nárũ fú ŋa. Ká máa wà mɔtí gbegbé. Tsí owó rírí gbo kó máa dzɛ́ awù-ŋa, tsí ká wà ɖí ɔ̀nyà ŋa si. 9Ɛ̀kɔ́-òtítɔ́#ɛ́ wà, tsí Ɔ̀ɖáyé tsí atsɔ nódzú‐ɛ̀ fú wa kíbí àa gba Yèésù gbɔ́#ɛ́. Ńbɛ̀ɛ́, ó wà ní àtsìtsɛ́-ɛgbɛ́-Kírísítò ŋa#á ká banɛ́‐ɛ̀ rere, tsí sídzó sídzó-kã̀ kó máa wà nɛ́ɛ̀ɖɔ̃̀-ŋa. 10Ká tse àɖã́wò fú ŋa tã́ná, tsí bí à kò rí íbàɖí-kã̀ fɔ̀ nára-ŋa ná, à nákó nyáa dzɛ́ àtsìtsɛ́-ɛgbɛ́-Kírísítò ŋa ńǹkɛ̀ɛ́.

11Ɔnɔbɛ̃̀ɛ̃ yèé ŋa dzɛ́ àtsìtsɛ́-ɛgbɛ́-Kírísítò#ɛ́, àŋa gbo ká máa wà tse iŋɛ́ kòdzɔkòdzɔ. Ká máa dzɛ́ ɔ̀nyà-abàdzɛ́nɛ ŋa gbo. Ká dzɛ́ ɔnɔbɛ̃̀ɛ̃ yèé náa nyáa banɛ́ ara-ŋa rere#ɛ́. Tsí ɔ̀nyà ŋa ká nɛ́ àkaralé si ńǹtá-ŋa ńŋɛ́ ɔ̀kã̀lɔ́ɔ̀kã̀ kpó.

12Àtsìtsɛ́-ɛgbɛ́-Kírísítò ŋa#á, ká nɛ́ aya ɔ̀kã̀ntso, tsí aya-kṹnukṹ kó tóo. Tsí ká dzɛ́ ɛnɛ yèé ŋa náa gbɛ̃́ ɔma-ŋà ŋa òŋu kpàtá-ŋà ŋa rere#ɛ́. 13Ó ɖi, àtsìtsɛ́-ɛgbɛ́-Kírísítò ŋa yèé wà tsitsɛ́-ŋa rere#ɛ́, à náa ɖi ɔ̀nyà yèé ŋa à wà bu ìɖì si fú#ɛ́. Tsí bí à wà wíìnyɛ̀ ti nára-Yèésù Kírísítò òŋu kíbí ó wà ní ká gbàá gbɔ́ gbà#á, à náa wíi òŋu ɛ̀ɖɔ̃̀ kíkã̀, tsí àkaralé gbo náa wà ńnɛ̀.

14Ǹ wà tse ìwé yèé fɛ́ɛ, tsí ǹ módzú si ní èmi ká-èmi gìɖì màa wáa ríɛ nára-ɔdzɔ́. 15Ó ɖi, bí ǹ kò nyáa wá kóyá, ìwé yèé nákó mɔ́wɔ́ gbè fɛ́ɛ, tsí nàa ma bí ó wà ní ká gbé gbà náàŋírĩ-ɔma-Ɔ̀ɖáyé ŋa#á. Àŋa ní dzɛ́ ɛgbɛ́-Ɔ̀ɖáyé Oláàyɛ̀#ɛ́, tsí dzɛ́ ìtɛ̀lɛ̀ yèé gba òtítɔ́ ti nára-Yèésù#ɛ́ ɖóro si#ɛ́.

16Ìɖéǹɖè#ɛ́, ɛ̀kɔ́ ti nára-Yèésù#ɛ́, Ɔ̀ɖáyé nyàá ɖíre fú wa, tsí ó dzɛ́ iŋɛ́ lákṹ kpàtàkìì-kã̀ ni. Òŋu ní wà dzɛ́ ní fee, Yèésù, ó wá ńǹtalɛ̀ bí, tsí à rí ní ɔ̀nyà ni. Mímí-Ɔ̀ɖáyé† nyàá ɖíre ní ó dzɛ́ ɔ̀nyà-atsòtítɔ́. Adzítsɛ́-ɔ̀rɔ̃ ŋa gbo rí iyì‐ɛ̀. À dzíkɔ̀‐ɛ̀ wérí ìlú ŋa kpó, tsí ɔ̀nyà ŋa gbo gbàá gbɔ́ náyé gbaŋgba#á. Tsí Ɔ̀ɖáyé kɛ́ɛ lɔ nɔ́ɔ̀rɔ̃, tsí iyì-Ɔ̀ɖáyé wà ńǹtá‐ɛ̀ si.

Currently Selected:

1 Tìmɔ̀té 3: ngl

Highlight

Copy

Compare