Loma 3
3
1Uzye lyene Ayuda yaluta Akulukuwa? Nanti uzye muzano cii uwaya mu kusilamulwa? 2Endi, umu nzila zingi, mwaya muzano wakuya Muyuda! Ca nkolelo, mazwi yakwe Leza yavwanzilwe ku Ayuda. 3Nanti angala yamwi munoyali yatali akutailwa, uzye kuntaya akutailwa ukungalanga ukuti Leza nawe ataya uwakutailwa? 4#Mas 51:4 Mucumi citangaya! Lelo Leza wene akalanda vya cumi. Nanti angala antu yonsi yaya antumpu. Cili wakwe vino calembwa mu malembelo cati,
“We Leza, leka antu yamanye ukuti vino
ukalanda ivya cumi, nu kuti ukayasinda
ndi yakulolwesya mulandu.”
5Ndi twacita viipe ala cikulanga ukuti Leza wene mololoke, uzye lyene tungati uli? Uzye tungati Leza asyalungika lilyo lino akatuvunuka? Nkulanda ndi vino antu yakalanda 6Awe citangaya! Ndi Leza asi mololoke, uzye lyene angapingula uli amu nsi? 7Lelo ndi cumi cakwe Leza calumbanyiwa pa kutumpoka kwane, uzye pacani cino ningavunukwa wakwe kaifya? 8Uzye lyene pacani tutangavwanga tuti, “Katwacita viipe pakuti visuma viloleke?” Avino na antu yamwi yakansausya pa kutumpoka ukuti nani avino nkalanda! Yene yalavunukwa wakwe vino cingayalinga.
Kutaya muntu Mololoke
9Uzye lyene caya uli? Uzye swe Ayuda twaluta antu yauze? Awe cisi vivyo! Twati tulondolola mpiti ukuti Ayuda pamwi na Akulukuwa yonsi kwene yatekwa uzya na maifyo. 10#Mas 14:1; 53:1 Ndi vino malembelo yakati,
“Kusi umuntu nanti wenga mololoke!
11Kusi umuntu nanti wenga akauvwikisya,
nanti akalonda Leza.
12Antu yonsi yafutatila Leza.
Antu yonsi aponge,
kusi umuntu nanti wenga akacita visuma,
awe kusi nanti wenga.
13 #
Mas 5:9; 140:3 Milomo yao yakolana wi lindi lili casi.
Indimi zyao zikavwanga ivyaufi
pa milomo yao pakafuma ulembe
ngati uwakwe cipili.
14 #
Mas 10:7
Mu milomo yao mwazula intipu zipisye.
15 #
Eza 59:7
Yene yakampuka kucisa nu kukoma auze.
16Konsi kuno yapita, yakasya uononyi nu ulanda.
17Yatamanya kwikala mu mutende.
18 #
Mas 36:1
Yene yasyaoopa nanti a Leza kwene.”
19Lelo swemo twamanya ukuti vyonsi ivyaya mu Masunde vyakuma antu kwene yao apilwe Masunde, pakuti kutaya umuntu nanti wenga uwakuipela insambu, nga na pakuti amu nsi yamanye vino Leza alayapingula. 20#Mas 143:2; Gal 2:16 Pano kusi umuntu nanti wenga wino angaya mololoke pa manso yakwe Leza pa kuyela sile Masunde. Mulimo wa Masunde ukulanga vino umuntu wifya.
Vino Leza akatucita kuya aololoke
21Ndakai Leza watasokolola inzila yakwe yakucitilamo antu yaye aololoke pa manso yakwe kwaula Masunde. 22#Gal 2:16 Leza akacita antu kuya aololoke pa manso yakwe kupitila mu utailo wao muli Yesu Klistu. Leza akacita vivyo ku muntu wensi wataila muli Yesu Klistu, pano Leza ataya na kasoozi. 23Pano antu yonsi iifya, nupya yali kutali na Leza wino akatuula. 24Lelo pamulandu wa wila wa cikuku cakwe Leza, wene akayalenga kuya aololoke kupitila muli Klistu Yesu wino akayalenga kuya antungwa. 25Leza wamutumile Klistu kuya impolelwa kuti mu mfwa yakwe amuno maifyo ya antu yangelelwa pa kutaila munoli. Leza wacisile vii pa kulanga ukuti wene mololoke. Mpiti Leza watekanga umwenzo nu kusulako ku maifyo yano antu yacitanga. 26Lelo Leza wimika Yesu pakuti alange kuti wene mololoke. Avino Leza umwine akailanga vino wene mololoke nu kucita muntu wensi kuya mololoke uwataila muli Yesu.
27Uzye lyene tungailumba pacani? Pasi! Uzye lyene ale apamulandu cii? Uzye apamulandu wakuti tukayela Masunde? Awe! Lelo apamulandu wakuti twataila. 28Pano twasininkizya ukuti Leza akacita umuntu kuya mololoke pa manso yakwe kupitila sile mu utailo, lelo asi pamulandu wa kuyela sile Masunde. 29Nanti uzye Leza a Leza wa Ayuda sile? Uzye na Akulukuwa kwene asi a Leza wao? Cumi kwene a Leza wao. 30#Malg 6:4; Gal 3:20 Leza a wenga, nupya alacita Ayuda kuya aololoke pa manso yakwe kupitila mu utailo wao. Na Akulukuwa nao kwene alayacita kuya aololoke pa manso yakwe kupitila mu utailo wao. 31Uzye lyene tungati pa utailo kwene uu twafutatila Masunde? Awe, cisi vivyo! Mu cifulo cakwe cii, tukakomelezya kuyela Masunde.
Abulaamu cili cilangililo cakwe yao autailo
Currently Selected:
Loma 3: MamL13
Highlight
Share
Compare
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
