Popular Bible Verses from Loma 3

Share

Pano antu yonsi iifya, nupya yali kutali na Leza wino akatuula. Lelo pamulandu wa wila wa cikuku cakwe Leza, wene akayalenga kuya aololoke kupitila muli Klistu Yesu wino akayalenga kuya antungwa.

Leza akacita antu kuya aololoke pa manso yakwe kupitila mu utailo wao muli Yesu Klistu. Leza akacita vivyo ku muntu wensi wataila muli Yesu Klistu, pano Leza ataya na kasoozi.

Leza wamutumile Klistu kuya impolelwa kuti mu mfwa yakwe amuno maifyo ya antu yangelelwa pa kutaila munoli. Leza wacisile vii pa kulanga ukuti wene mololoke. Mpiti Leza watekanga umwenzo nu kusulako ku maifyo yano antu yacitanga. Lelo Leza wimika Yesu pakuti alange kuti wene mololoke. Avino Leza umwine akailanga vino wene mololoke nu kucita muntu wensi kuya mololoke uwataila muli Yesu.

Pano kusi umuntu nanti wenga wino angaya mololoke pa manso yakwe Leza pa kuyela sile Masunde. Mulimo wa Masunde ukulanga vino umuntu wifya.

Ndi vino malembelo yakati, “Kusi umuntu nanti wenga mololoke! Kusi umuntu nanti wenga akauvwikisya, nanti akalonda Leza. Antu yonsi yafutatila Leza. Antu yonsi aponge, kusi umuntu nanti wenga akacita visuma, awe kusi nanti wenga.

Pano twasininkizya ukuti Leza akacita umuntu kuya mololoke pa manso yakwe kupitila sile mu utailo, lelo asi pamulandu wa kuyela sile Masunde.

Mucumi citangaya! Lelo Leza wene akalanda vya cumi. Nanti angala antu yonsi yaya antumpu. Cili wakwe vino calembwa mu malembelo cati, “We Leza, leka antu yamanye ukuti vino ukalanda ivya cumi, nu kuti ukayasinda ndi yakulolwesya mulandu.”