Mapinda 4
4
1Mwe ana, si mwauvwila amasunde yakwe yaso,
kutikini apakuti mukwate amalango yakumanyilako ivintu.
2Nemo namamupeela amalango asuma,
mutezya mufume muli vino nkumusambilizya.
3Lino nemo nali munono umu ng'anda ya akwasi yane,
mumo kwene amuno naicefyanga nu kupeela umucinzi kuli yamayo,
4yatata yansambilizyanga na mazwi ala yakuti,
“Uwake umu mwenzo wako vyonsi vii vino nkukunena,
usunge amasunde yane, pakuti uye nu umi.
5Uwalonda amano, uwalonda nu kwiluka,
utailila, utaezya nu kusula amazwi yane.
6Utatazyela amano, ali yano yamakusunganga.
Uwayatemwa nayo yamakulindanga.
7Amano cili cintu cikulu. Caleka kwata amano.
Pakulola amalango, ulinzile wasumbilapo ivyuma vyako vyonsi.
8Temwa amano, nayo yalakucindamika.
Uyazengele nga nayo yamakuletela ululumbi.
9Yamakuzwika ingala iyembe uku mutwe wako,
nu kukupeela inkata ya ucindami.”
10Uvwa kuno mwanane, pokelela amazwi yane,
ndi wacita cico amanda yako yalavula pano nsi.
11Nemo nakulanga imisango yakukwatilamo amano,
nu kukutungulula umu nzila zya ulungami.
12Ndi cakuti walondela mwenemo,
lyene kutalatala kuye icintu icakukucilikila inzila,
ndi wasimula mwenemo utalapumika foo.
13Sunga masunde yane, utayasuula.
Uyawake pano uli umi wako.
14Utaingila umu nzila ya antu aipe,
utapita umu nzila ya vipondo.
15Uwafuntukako, utapitamo,
alulukamo, upambate.
16Pano yene pakulala utulo, suka yatala yaifya.
Yasilola utulo suka sile yatala yacitapo cimwi iciipe uku muntu.
17Pano yene icakulya cao ukuulungana na ukaleta nzololo.
Ni cakumwa cao, ukakasi.
18Inzila ya antu asuma, yaya wa luswepo lwa pamacaca,
lulo ulukakulilako mpaka ilanzi ilisanzama.
19Inzila ya antu aipe, yaya wa mfinzi usiku,
yene yatange yamanye cino yakupumikako.
20We mwanane, kutika uku mazwi yane,
teya amatwi kuli vino nkulanda.
21Utaleka vifume umu manso yako,
uwaviwaka umu mwenzo wako.
22Pano vyene uli umi kuli yayo akavizana,
vikapeela umutende ku mwili onsi.
23Apa vintu vyonsi uwasunga umwenzo wako.
Pano umwaya intulo izikapela umi.
24Uwafutatila akanwa akakalanda ivyaufi,
nu kufuntuka ku milomo ya ucenjezi.
25Leka amanso yako yalolekesye uku nkolelo,
nu kutontomezya amanso apalungatane nawe.
26 #
Aye 12:13
Leka inzila yako iye itambalale,
na pali ponsi pano ukupita paye apakome ndii.
27Utapalukila kwilunji nanti kwimani,
funtusya ingazo zyako uku ui.
Mambwe-Lungu Bible © The Bible Society of Zambia, 2013