Mapinda 2
2
Usuma wa mano
1Mwanane, uwasambilila vino nkukunena.
Utezya uwailila vino nkukukonkomezya ukucita.
2Uwateya amatwi ku mano nu kwezya ukwiluka.
3Uwalenga ukwiluka nu kupapatila ukucenjela.
4Uwavilondelela kuno vili kwati a siluva nanti icuma cimwi cino yafisa.
5Ndi wacita vivyo, lyene uliluuka ukoopa Yawe vino kwaya,
nu kuzana vino ukumanya Leza kwaya.
6Pano Yawe aliwe akapeela amano,
aliwe kwene ali ntulo ya kumanya nu kwiluka
7Wene akaazwilizya antu akacita vyaololoke nupya acumi nu kuyacingilila.
8Akawaka inzila zya aololoke nu kucingilila yao ataila munoli.
9Wemo ndi cakuti umanguvwila, umamanyanga ivintu ivisuma,
ivilungame, ivyampomvu. Umamanyanga navino uli nu kucita.
10Pano umakwatisyanga amano, nu kusansamuka,
umasansamukanga apa mano yako.
11Ukucenjela kwako kulakulinda nu kwiluka kwako kulakusunga.
12Nupya ali vino vilakufuntusya uku misango iipe,
nu ku antu angaleta icimvulunganya mu mivwangile yao,
13yayo akatazyela imikalile yampomvu
apakuti yasyale sile yakupita umu misango yawinyi,
14yayo akazangila umu kucita iviipe,
nu kusekelela lino yacita cimwi ica muselu.
15Inzila zyao izya ucenjezi, zino umuntu nanti umwi atange ataile foo.
16Amano ndi yiza munuli ali yano yamakufuntusyanga uku ntalanganyi
ya mwanaci ali wensi, angiza kunuli na mazwi akukulyongofya,
17umwanaci wiyo atafukila iya, akailila cipangano cino wapangine na Leza.
18Pasi pano wensi akaya uku ng'anda yakwe, ale akulowa.
Ukuya ukwakwe, ali kupalamila uku mpanga ya afwe.
19Apa onsi yonsi yano yakaya ukwakwe,
pataya nanti wenga uwawela kweneko.
Pasi nanti wenga akawela umu nzila iya umi.
20Ali cino fwandi mwanane, uwakolanya imisango ya antu asuma,
uwakwata ni mikalile isuma.
21Pano antu asuma, akaele, ali yano yalikala muno nsi,
akaele ali yano yalakwata mwenemo icifulo cao.
22Alino antu aipe yene Leza alayafumya umu mpanga,
nupya alafumyamo yakaifya ndi vino antu yakaipula ivikona mu calo.
Mambwe-Lungu Bible © The Bible Society of Zambia, 2013