Mpendwa 8
8
Ukuteyanya ukwika inyali
1 #
Kuf 25:31-40; 37:17-24 Yawe anena Mose ati, 2“Nena Aaloni ukuti lino umakozya inyali cinimbali, zili nu kwaka pankolelo ya cakutekapo inyali.” 3Ali vino Aaloni wacisile, akozya inyali cakuti lino zyaka, izipeela uluswepo pankolelo ya vyakutekapo inyali, wakwe vino Yawe wapeezile ilamulo kuli Mose. 4Fwandi vii avili vino ivyakutekapo inyali vyapangilwe na zaabu musule, ukutandikila sile pa vikalilo mpaka apapela. Ivyakutekapo inyali vyapanzilwe mu musango sutu uno kasosala kapangwa mu mwata uwa kwene uno Yawe walangilile Mose.
Lutambi lwa kuswefiwa nu kupaatulwa kwa ina Levi
5Yawe anena Mose ati, 6“Fumya aina Levi mu yauze aina Izlaeli pakuti uyasangulule, uyaswefye. 7Na pakuyasangulula, uwacita vii. Uwayakanyila amanzi pa kuyasisizya inkota zyao. Nupya yalinzile yapele apali ponsi ku mwili wao, alino nu kufula insalu zyao zyakuzwala, ale alino yasangululwa. 8Nupya muleke yatole kacipambasi pamwi nu wila wa cakulya, alino nu usu utonyoleke utikinkanye na mafuta. Alino lyene utoole kacipambasi kakwe ciili aka kupeela uwila wa kwelela amaifyo. 9Alino uleke aina Levi yize yimilile pankolelo yi Taalu lya Ukongano. Ukonganike na ina Izlaeli yonsi. 10Nga waleta aina Levi pa manso yakwe Yawe, alino lyene aina Izlaeli yaiikepo makasa pa mitwe yao. 11Lyene Aaloni wenga sile mu kwimilila aina Izlaeli, aliwe ali nu kumpaatwila aina Levi, mu kuswelula ikasa lyakwe. Ale lyene aina Levi yaya na maka akuombela Yawe. 12Pacisila cakwe vivyo aina Levi kwene yike amakasa yao pali yacipambasi. Alino nawe utoole cipambasi wenga nu kumufyula, umuswelwile pa manso yakwe Yawe wa wila wakuswelula maifyo yao, nga umuze nawe wa wila wakoca, kuti acitile aina Levi ulutambi lwa kufuta amaifyo.”
13“Uleke aina Levi yize iimilile inkolelo yakwe Aaloni na ana yakwe, nga lyene uyapeele kuli Yawe wa wila wakuswelula ikasa. 14Fwandi mu musango kwene uu, avino uwacita pa kupaatwila aina Levi kuli Yawe ukufuma mu ina Izlaeli asyala, nga nayo yamaya akwane. 15Pacisila ca kuswefya nu kumpaatwila aina Levi, mukuswelula ikasa, lyene yalaya alinge ukuomba mwi Taalu lya Ukongano. 16Fwandi lyene yao ali ina Izlaeli akwane kololo. Nayatola mu cifulo ca mayeli yonsi aonsi ya ina Izlaeli, nga yakwene akwane. 17#Kuf 13:2 Pasi pano ali vino caya ukuti mu ina Izlaeli, iyeli lyonsi ilya muntu nanti ilya nyama, ilyakwe Yawe. Lino nakomozile mayeli yonsi mu Eguputo, naipaatwilile mayeli yonsi ya ina Izlaeli na mayeli yonsi ya nyama. 18Fwandi ali vino nintola aina Levi mu cifulo ca mayeli yonsi ya ina Izlaeli. 19Nayapaatula ku ina Izlaeli nu kuyapela uwila kuli Aaloni na ana yakwe, pakuti yaomba umulimo mwi Taalu lya Ukongano uno ukumile aina Izlaeli, nga na kuti yacitile aina Izlaeli ulutambi lwa kufuta amaifyo pa maifyo yao nu kulesyanya uzanzo uli onsi kuti utayaponela ndi cakuti yapalama pipi ni Ncende Yamuzilo.”
20Acino Mose na Aaloni pamwi ni uvi lyonsi lya ina Izlaeli iyacitila aina Levi kulingana na vino Yawe wapeezile ilamulo kuli Mose. 21Awe na cendi aina Levi ali pakuisangulula, iyafula ni nsalu zyao. Aaloni nawe ali pakuyapaatwila kuli Yawe wa wila wakuswelula, nga ayacitila ulutambi lwa kufuta amaifyo yao kuti ayaswefye. 22Alino lyene aina Levi ali pakuya alinge ukuomba umulimo wao uwa mwi Taalu lya Ukongano. Aaloni na ana yakwe nayo yaya yakapitao kunoyali. Yacitile aina Levi vii vyonsi wakwe vino Yawe wapeezile ilamulo kuli Mose.
23Nupya Yawe anena Mose ati, 24“Umwina Levi wensi kutandikila uwa myaka amakumi yaili na isano nanti ukuluta alinzile ukuomba imilimo yakwe mwi Taalu lya Ukongano. 25Nga lelo ndi cakuti wakumanya imyaka amakumi yasano, awe lyene ale wapezuka, asi nu kuomba nupya foo. 26Lelo ukwazwilizya kwene yangazwilizyako yao akuomba mwi Taalu lya Ukongano, ukwaula kuti yayasingamike incito. Fwandi vii, ali vino ulinzile ukucita pamulandu wa kwankanya aina Levi imilimo.”
Mambwe-Lungu Bible © The Bible Society of Zambia, 2013