Mpendwa 7
7
Amawila ya ntunguluzi
1Walanga Mose wamala kwimika Itaalu lya Ukongano, alino alipaka amafuta nga alipaatwila kuli Yawe kumwi ni viya vyonsi vyaliko, na kavuwa pamwi ni viombelo vyonsi vyakako. 2Alino akalamba ya nko, ali intunguluzi zya mitundu ya ina Izlaeli, yiiza yapeela ivyamawila yao, yaya kwene aangalilanga antu apenzilwe. 3Na mawila yano yapezile kuli Yawe aeya: amaceleta mutanda afupilizye na yamasaye ikumi na yaili, cila ntunguluzi yapezile masaye wenga, ni ntunguluzi ziili ziili zyapezile maceleta yaili afupilizye. Pacisila cakupeela vintu vii, 4Yawe anena Mose ati, 5“Pokelela amawila yaa akuomvya mu mulimo wa mwi Taalu lya Ukongano. Uyapeele ku ina Levi kulingana nu mwaela incito yao cila muntu.” 6Acino Mose atoola maceleta na yamasaye avipela ku ina Levi. 7Amaceleta yaili na yamasaye yani avipela ku luko lwakwe Gelisyoni, kulingana ni vyalondekwanga mu mulimo wao. 8Amaceleta yani na yamasaye cinani avipela ku luko lwakwe Melali, kulingana ni vyalondekwanga mu mulimo wao. Itamali, umwana wakwe Aaloni simapepo, wali ali kangalila wao. 9Lelo Mose atapezile celeta nanti lyonga nanti a masaye kwene ku aluko lwakwe Koati, pamulandu wakuti yene incito yao yali iyakupinga ivintu vyamuzilo pa viye vyao wa ncito ino yapezilwe kuwaka.
10Alino intunguluzi zyalesile ni vyamawila pa wanda uno yazevyanga kupaatwilwa kwa kavuwa nu kukapaka amafuta. Lino zyaiteyanya ukutwala amawila pa nkolelo ya kavuwa, 11Yawe anena Mose ati, “Cila wanda pa manda ikumi na yaili, wenga uwamu ntunguluzi alinzile apeele uwila wakwe wa kupaatwilwa kwa kavuwa.”
12Uwatandikile kutwala uwila wakwe pa wanda wakutandika, a Nasyoni umwana wakwe Aminadabu, uwamu mutundu wakwe Yuda. 13Uwila wakwe, walesile imbale yonga yakwe siluva iyanyomile kulingana na kilogalamu wenga na citika. Alino aikapo ni mbakuli yakwe siluva iyanyomile kulingana na magalamu imyanda cinimbali na makumi cinimbali. Zyonsi ziili acita kulingana ni cipimilo caku Ng'anda ikulu yakwe Leza, zizule usu utonyoleke ningo utikinkanye na mafuta pakuti yangiza yavipeele wa wila wa cakulya. 14Alino ni mbale yonga yakwe zaabu ino tungati yanyomile kota wakwe kilogalamu, umwali ubani. 15Alino na kacipambasi konga, na suuku wenga, nu mwana wa mfwele wenga wa mwaka onga. Vyonsi vii vya wila wakoca. 16Alino na sawe wenga uwa kupeela uwila wa kwelela amaifyo. 17Alino na yamasaye yaili, na yasuuku yasano, na yasawe yasano nga na ana ya mfwele yasano, tusuuku twa mwaka onga, vii vyonsi vyakoca wa wila wa utandano. Fwandi uu wali uwila wakwe Nasyoni umwana wakwe Aminadabu. 18Uwatwazile uwila wakwe pa wanda wakwe ciili a Netaneli umwana wakwe Zuali, intunguluzi ya mutundu wakwe Isakali. 19Uwila uno wene walesile wali imbale yonga yakwe siluva iyanyomile kulingana na kilogalamu wenga na citika, ni mbakuli yonga iyanyomile kulingana na magalamu imyanda cinimbali na makumi cinimbali. Zyonsi ziili acita kulingana ni cipimilo caku Ng'anda ikulu yakwe Leza, zizule usu utonyoleke ningo utikinkanye na mafuta pakuti yangiza yavipeele wa wila wa cakulya. 20Alino ni mbale yonga yakwe zaabu ino tungati yanyomile kota wakwe kilogalamu, umwali ubani. 21Alino na kacipambasi konga, na suuku wenga, nu mwana wa mfwele wenga wa mwaka onga. Vyonsi vii vya wila wakoca. 22Alino na sawe wenga uwa kupeela uwila wa kwelela amaifyo. 23Alino na yamasaye yaili, na yasuuku yasano, na yasawe yasano nga na ana yamfwele yasano, tusuuku twa mwaka onga, vii vyonsi vyakoca uwila wa utandano. Fwandi uu wali uwila wakwe Netaneli umwana wakwe Zuali. 24Uwatwazile uwila wakwe pa wanda uwalenga yatatu a Eliabu umwana wakwe Heloni, intunguluzi ya luko lwakwe Zebuluni. 25Uwila wakwe, walesile imbale yonga yakwe siluva iyanyomile kulingana na kilogalamu wenga na citika. Alino aikapo ni mbakuli yakwe siluva iyanyomile kulingana na magalamu imyanda cinimbali na makumi cinimbali. Zyonsi ziili acita kulingana ni cipimo icazumiliziwa icamu ncende iziliziwe, zizule usu utonyoleke ningo, uno yakandilinkanya na mafuta pakuti yangiza yavipeele wa wila wa cakulya. 26Alino ni mbale yonga yakwe zaabu ino tungati yanyomile kota wakwe kilogalamu, umwali ubani. 27Alino na kacipambasi konga, na suuku wenga, nu mwana wa mfwele wenga wa mwaka onga. Vyonsi vii vya wila wakoca. 28Alino na sawe wenga uwa kupeela uwila wa kwelela amaifyo. 29Alino na yamasaye yaili, na yasuuku yasano, na yasawe yasano nga na ana yamfwele yasano, tusuuku twa mwaka onga, vii vyonsi ivyakoca uwila wa utandano. Fwandi uu wali uwila wakwe Eliabu umwana wakwe Heloni. 30Uwatwazile uwila wakwe pa wanda wakwe ciini a Elizuli umwana wakwe Syedeuli, intunguluzi ya mutundu wakwe Lubeni. 31Uwila uno wene walesile wali imbale yonga yakwe siluva iyanyomile kulingana na kilogalamu wenga na citika, ni mbakuli yonga iyanyomile kulingana na magalamu imyanda cinimbali na makumi cinimbali. Zyonsi ziili acita kulingana ni cipimilo caku Ng'anda ikulu yakwe Leza, zizule usu utonyoleke ningo uno yakandilinkanya na mafuta pakuti yangiza yavipeele wa wila wa cakulya. 32Alino ni mbale yonga yakwe zaabu ino tungati yanyomile kota wenga wakwe kilogalamu, umwali ubani. 33Alino na kacipambasi konga, na suuku wenga, nu mwana wa mfwele wenga wa mwaka onga. Vyonsi vii vya wila wakoca. 34Alino na sawe wenga uwa kupeela uwila wa kwelela amaifyo. 35Alino na yamasaye yaili, na yasuuku yasano, tusuuku twa mwaka onga, vii vyonsi vyakoca uwila wa utandano. Fwandi uu wali uwila wakwe Elizuli umwana wakwe Syedeuli. 36Uwatwazile uwila wakwe pa wanda uwalenga yasano a Syelumieli umwana wakwe Zulisyadai, intunguluzi ya mutundu wakwe Simeoni. 37Uwila uno wene walesile wali imbale yonga yakwe siluva iyanyomile kulingana na kilogalamu wenga na citika, ni mbakuli yonga iyanyomile kulingana na magalamu imyanda cinimbali na makumi cinimbali. Zyonsi zii acita kulingana ni cipimilo caku Ng'anda ikulu yakwe Leza, zizule usu utonyoleke ningo utikinkanye na mafuta pakuti yangiza yavipeele wa wila wa cakulya. 38Alino ni mbale yonga yakwe zaabu ino tungati yanyomile kota wenga wakwe kilogalamu, umwali ubani. 39Alino na kacipambasi konga, na suuku wenga, nu mwana wa mfwele wenga wa mwaka onga. Vyonsi vii vya wila wakoca. 40Alino na sawe wenga uwa kupeela uwila wa kwelela amaifyo. 41Alino na yamasaye yaili, na yasuuku yasano, tusuuku twa mwaka onga, vii vyonsi vyakoca uwila wa utandano. Fwandi uu wali uwila wakwe Syelumieli umwana wakwe Zulisyadai. 42Uwatwazile uwila wakwe pa wanda uwalenga mutanda a Eliyasafu umwana wakwe Deueli, intunguluzi ya mutundu wakwe Gadi. 43Uwila uno wene walesile wali imbale yonga yakwe siluva iyanyomile kulingana na kilogalamu wenga na citika, ni mbakuli yonga iyanyomile kulingana na magalamu imyanda cinimbali na makumi cinimbali. Zyonsi ziili acita kulingana ni cipimilo caku Ng'anda ikulu yakwe Leza, zizule usu utonyoleke ningo utikinkanye na mafuta pakuti yangiza yavipeele wa wila wa cakulya. 44Alino ni mbale yonga yakwe zaabu ino tungati yanyomile kota wenga wakwe kilogalamu, umwali ubani. 45Alino na kacipambasi konga, na suuku wenga, nu mwana wa mfwele wenga wa mwaka onga. Vyonsi vii vya wila wakoca. 46Alino na sawe wenga uwa kupeela uwila wa kwelela amaifyo. 47Alino na yamasaye yaili na yasuuku yasano, tusuuku twa mwaka onga, vii vyonsi vyakoca uwila wa utandano. Fwandi uu wali uwila wakwe Eliyasafu umwana wakwe Deueli. 48Uwatwazile uwila wakwe pa wanda uwalenga cinimbali a Elisyama umwana wakwe Amiudi, intunguluzi ya mutundu wakwe Efulemu. 49Uwila uno wene walesile wali imbale yonga yakwe siluva iyanyomile kulingana na kilogalamu wenga na citika, ni mbakuli yonga iyanyomile kulingana na magalamu imyanda cinimbali na makumi cinimbali. Zyonsi ziili acita kulingana ni cipimilo caku Ng'anda ikulu yakwe Leza, zizule usu utonyoleke sana uno yakandilinkanye na mafuta pakuti yangiza yavipeele wa wila wa cakulya. 50Alino ni mbale yonga yakwe zaabu ino tungati yanyomile kota wenga wakwe kilogalamu, umwali ubani, ukulingana ni cipimilo caku Ng'anda ikulu yakwe Leza. 51Alino na kacipambasi konga, na suuku wenga, nu mwana wa mfwele wenga wa mwaka onga. Vyonsi vii vya wila wakoca. 52Alino na sawe wenga uwa kupeela uwila wa kwelela amaifyo. 53Alino na yamasaye yaili, na yasuuku yasano, tusuuku twa mwaka onga, vii vyonsi vyakoca uwila wa utandano. Fwandi uu wali uwila wakwe Elisyama umwana wakwe Amiudi. 54Uwatwazile uwila wakwe pa wanda wakwe cinani a Gamalieli umwana wakwe Pedazuli, intunguluzi ya mutundu wakwe Manase. 55Uwila uno wene walesile wali imbale yonga yakwe siluva iyanyomile kulingana na kilogalamu wenga na citika, ni mbakuli yonga iyanyomile kulingana na magalamu imyanda cinimbali na makumi cinimbali. Zyonsi ziili acita kulingana ni cipimilo caku Ng'anda ikulu yakwe Leza, zizule usu utonyoleke ningo uno yakandilinkanya na mafuta pakuti yangiza yavipeele wa wila wa cakulya. 56Alino ni mbale yonga yakwe zaabu ino tungati yanyomile kota wenga wakwe kilogalamu, umwali ubani. 57Alino na kacipambasi konga, na suuku wenga, nu mwana wa mfwele wenga wa mwaka onga. Vyonsi vii vya wila wakoca. 58Alino na sawe wenga uwa kupeela uwila wa kwelela amaifyo. 59Alino na yamasaye yaili, na yasuuku yasano, tusuuku twa mwaka onga, vii vyonsi vyakoca uwila wa utandano. Fwandi uu wali uwila wakwe Gamalieli umwana wakwe Pedazuli. 60Uwatwazile uwila wakwe pa wanda wakwe fundimbali a Abidani umwana wakwe Gidyoni, intunguluzi ya mutundu wakwe Benjamini. 61Uwila uno wene walesile wali imbale yonga yakwe siluva iyanyomile kulingana na kilogalamu wenga na citika, ni mbakuli yonga iyanyomile kulingana na magalamu imyanda cinimbali na makumi cinimbali. Zyonsi ziili acita kulingana ni cipimilo caku Ng'anda ikulu yakwe Leza, zizule usu utonyoleke ningo utikinkanye na mafuta pakuti yangiza yavipeele wa wila wa cakulya. 62Alino ni mbale yonga yakwe zaabu ino tungati yanyomile kota wenga wakwe kilogalamu, umwali ubani. 63Alino na kacipambasi konga, na suuku wenga, nu mwana wa mfwele wenga wa mwaka onga. Vyonsi vii vya wila wakoca. 64Alino na sawe wenga uwa kupeela uwila wa kwelela amaifyo. 65Alino na yamasaye yaili, na yasuuku yasano, tusuuku twa mwaka onga, vii vyonsi vyakoca uwila wa utandano. Fwandi uu wali uwila wakwe Abidani umwana wakwe Gidyoni. 66Uwatwazile uwila wakwe pa wanda uwalenga ikumi a Aiezeli umwana wakwe Amisyadai, intunguluzi ya mutundu wakwe Dani. 67Uwila uno wene walesile wali imbale yonga yakwe siluva iyanyomile kulingana na kilogalamu wenga na citika, ni mbakuli yonga iyanyomile kulingana na magalamu imyanda cinimbali na makumi cinimbali. Zyonsi ziili acita kulingana ni cipimilo caku Ng'anda ikulu yakwe Leza, zizule usu utonyoleke ningo utikinkanye na mafuta pakuti yangiza yavipeele wa wila wa cakulya. 68Alino ni mbale yonga yakwe zaabu ino tungati yanyomile kota wenga wakwe kilogalamu, umwali ubani. 69Alino na kacipambasi konga, na suuku wenga, nu mwana wa mfwele wenga wa mwaka onga. Vyonsi vii vya wila wakoca. 70Alino na sawe wenga uwa kupeela uwila wa kwelela amaifyo. 71Alino na yamasaye yaili, na yasuuku yasano, tusuuku twa mwaka onga, vii vyonsi vyakoca uwila wa utandano. Fwandi uu wali uwila wakwe Aiezeli umwana wakwe Amisyadai. 72Uwatwazile uwila wakwe pa wanda uwalenga ikumi na onga a Pagieli umwana wakwe Okalani, intunguluzi ya mutundu wakwe Asyeli. 73Uwila uno wene walesile wali imbale yonga yakwe siluva iyanyomile kulingana na kilogalamu wenga na citika, ni mbakuli yonga iyanyomile kulingana na magalamu imyanda cinimbali na makumi cinimbali. Zyonsi ziili acita kulingana ni cipimilo caku Ng'anda ikulu yakwe Leza, zizule usu utonyoleke ningo utikinkanye na mafuta pakuti yangiza yavipeele wa wila wa cakulya. 74Alino ni mbale yonga yakwe zaabu ino tungati yanyomile kota wenga wakwe kilogalamu, umwali ubani. 75Alino na kacipambasi konga, na suuku wenga, nu mwana wa mfwele wenga wa mwaka onga. Vyonsi vii vya wila wakoca. 76Alino na sawe wenga uwa kupeela uwila wa kwelela amaifyo 77Alino na yamasaye yaili, na yasuuku yasano, tusuuku twa mwaka onga, vii vyonsi vyakoca uwila wa utandano. Fwandi uu wali uwila wakwe Pagieli umwana wakwe Okalani. 78Uwatwazile uwila wakwe pa wanda uwalenga ikumi na yaili a Aiila umwana wakwe Enani, intunguluzi ya mutundu wakwe Nafutali. 79Uwila uno wene walesile wali imbale yonga yakwe siluva iyanyomile kulingana na kilogalamu wenga na citika, ni mbakuli yonga yakwe siluva iyanyomile kulingana na magalamu imyanda cinimbali na makumi cinimbali. Zyonsi ziili acita kulingana ni cipimilo caku Ng'anda ikulu yakwe Leza, zizule usu utonyoleke ningo utikinkanye na mafuta pakuti yangiza yavipeele wa wila wa cakulya. 80Alino ni mbale yonga yakwe zaabu ino tungati yanyomile kota wenga wakwe kilogalamu, umwali ubani. 81Alino na kacipambasi konga, na suuku wenga, nu mwana wa mfwele wenga wa mwaka onga. Vyonsi vii vya wila wakoca. 82Alino na sawe wenga uwa kupeela uwila wa kwelela amaifyo. 83Alino na yamasaye yaili, na yasuuku yasano, tusuuku twa mwaka onga, vii vyonsi vyakoca uwila wa utandano. Fwandi uu wali uwila wakwe Aiila umwana wakwe Enani. 84Yaa ali mawila yano intunguluzi zya ina Izlaeli zyapezile pa wanda uno kwali kupaatula nu kupaka kavuwa amafuta: imbale zyakwe siluva zyali ikumi na ziili, ingeso zya kukanyizizya zyakwe siluva zyali ikumi na ziili, nga ni mbale zyakwe zaabu zyali ikumi na ziili. 85Cila mbale yakwe siluva yanyomile kulingana na kilogalamu wenga na citika. Nga cila mbale yakukanyila yakwe zaabu nayo yanyomile kulingana magalamu imyanda cinani. Nga ni mbale zyakwe siluva zyonsi pamwi nazyo zyanyomile kulingana makilogalamu amakumi yaili na cinimbali na citika, ukulingana ni cipimilo caku Ng'anda ikulu yakwe Leza. 86Imbale ikumi na ziili zyakwe zaabu zino zyazilemo ubani nazyo cila yonga yanyomile kulingana na magalamu umwanda onga ni kumi, kulingana ni cipimilo caku Ng'anda ikulu yakwe Leza, na zyonsi pamwi zyanyomile kulingana kilogalamu wenga na citika. 87Impendwa ya nyama zya wila wakoca zino yapezile yali ndi vii: tucipambasi ikumi na twiili, yasuuku ikumi na yaili, nga nu twana twa mfwele ikumi na twiili, twa mwaka onga, kwikapo nu wila wa cakulya uno yapeelanga pamwi nazyo. Yasawe ikumi na yaili ayano yaomvyanga pa kupeela uwila wa kwelela amaifyo. 88Inyama zya kupeela uwila wa utandano zyonsi pamwi zyali ndi vii: yamasaye amakumi yaili na yani, yasuuku amakumi mutanda, yasawe amakumi mutanda nga na ana ya mfwele amakumi mutanda, a mwaka onga. Yaa, ali mawila yano yapile pa wanda wa kupaatula kavuwa nu kukapaka amafuta.
89Lino Mose wingile mwi Taalu lya Ukongano ku kulanda na Yawe, wene uvwile izwi ukufuma pakasi kakwe yakelubi, papela ya ntupiko ya Mbokosi ya Upangano, ala likulanda kunoli. Nga nawe avwanga na aliwe.
Mambwe-Lungu Bible © The Bible Society of Zambia, 2013