Mateo 9
9
Yesu wapozya cite
(Mk 2:1-12; Luk 5:17-26)
1Yesu apatama mu wato, alambila ku mbalama yuze yakwe yemba, nga aya ku musumba kuno wikalanga. 2Lyene lilyo kwene aonsi yamwi yamuletela umuntu wino uwali cite, ala aizi pa cintamba. Lino Yesu walola utailo wao, anena icite ati, “Mwanane utasakamala! Maifyo yako yelelwa.” 3Lyene yakasambilizya ya Masunde yamwi yaivwanzya aisikulu mu myenzo yao yati, “Umuntu wii akuvwanga mazwi ya misuli kuli Leza!” 4Lino Yesu wamanya vino yakwelenganya mu myenzo yao ayauzya ati, “Uzye pacani mukwelenganya viipe mu myenzo inu? 5Uzye icangupala icani, kunena umulwale ukuti, ‘Maifyo yako yelelwa,’ nanti ukuti, ‘Katuka utandike nu kupita?’ 6Nkasi musininkizye ukuti Mwana wa Muntu ali na maka muno nsi akwelela amaifyo.” Lyene avwanga ku cite ati, “Katuka, nyemula icintamba cako pitanga ukwako.” 7Umuntu nawe akatuka apita ukwakwe. 8Lelo lino maumba yacilola yuvwa intete, yalumbanya Leza, pa kupeela antu amaka ali ndi yaa.
Yesu waama mateo
(Mk 2:13-17; Luk 5:27-32)
9Lino Yesu wafumanga kuku, alola kasonkisya izina lyakwe a Mateo, ala atenzi mu ng'anda ya musonko. Alino Yesu amunena ati, “Ndondela.” Mateo nawe akatuka amulondela.
10Lino Yesu na alondezi yakwe yali pa cakulya mu ng'anda yakwe Mateo, yakasonkesya aingi na yakaifya kwene, iiza yalya pamwi nawe. 11Lino Afaliseo yacilola, yuzya alondezi yakwe yati, “Uzye pacani cino kasambilizya winu akalila pamwi na yakasonkesya na yakaifya?” 12Pa kuvwa cii, Yesu nawe ayanena ati, “Antu apuma yasilonda sing'anga, suka sile alwale. 13#Ose 6:6; Mat 12:7 Acino kasambililini mazwi mu malembelo vino yakusenula, yano akati, ‘Nkulonda kuti mwalanga uluse ku antu yauzo kuluta kundetela impolelwa.’ Ntiza kukwama aololoke, lelo nizila yakaifya.”
Kuizilizya ukulya
(Mk 2:18-22; Luk 5:33-39)
14Lyene alondezi yakwe Yoane kawatizya iiza kuli Yesu yamuzya yati, “Uzye pacani cino swemo pamwi na Afaliseo tukaizilizya ukulya, lelo alondezi yako yene yasyaizilizya ukulya?” 15Yesu aasuka ati, “Uzye asukilizi ali pa cimulo ca winga yangikala akungumale lino yali pamwi na siwinga? Citangaya vivyo! Lelo manda yaliza lino siwinga alasendwa kufuma pano yali, lyene alino yalaizilizya ukulya. 16Kusi umuntu akakampika cikampa cipya pa nsalu yampiti, pano cikampa cipya cilakambatuka ku nsalu yampiti nu kukuzya icipongo penepo. 17Nanti uzye antu yangitulwila waini mupya mu nyambi zyampiti? Ndi yacita vivyo, nyambi zingalepuka, na waini angitika, nga ni nyambi zyononeke. Lelo waini mupya alinzile kwitulwilwa mu nyambi zipya, kuti inyambi na waini vitononeka.”
Yesu wapozya mwana yailo nu mwanaci umwi
(Mk 5:21-43; Luk 8:40-56)
18Lino acili akuvwanga amazwi yaa kunoyali, umwi uwali intunguluzi iyamu cifulo cii, aiiza kunoli. Alino amufukamila, amunena ati, “Mwanane kaci wafwa likwene. Lelo tuye ukamwikepo ikasa lyako, nga amaya umumi.” 19Alino Yesu pamwi na alondezi yakwe yakatuka, yapita nawe. 20Umwanaci umwi uwalwile cendamongo pa myaka ikumi na iili aiiza kucisila cakwe Yesu. Alino akumya kwi sempele lya nsalu yakwe, 21ala akwelenganya ati, “Ndi ningakumya nanti ku nsalu yakwe sile, namapola.” 22Lelo Yesu aseleuka amulola, amunena ati, “Kaciwe, teku mwenzo utasakamala! Utailo wako wakupozya.” Pa kasita kwene kako mwanaci apola.
23Lyene Yesu aingila mu ng'anda ya ntunguluzi yamu cifulo cici. Alino alola antu alizyanga mitolilo,#9:23 Antu alizyanga mitolilo: Kwali antu yamwi alembwanga incito yakulosya. Limwi limwi antu yaa yalizyanga mitolilo pa ndosya. nga ni umba lya antu ilyalosyanga. 24Lyene avwanga ati, “Fumini! Umukazyana atafwile, lelo watakasula sile.” Lelo yene yamuseka. 25Pacisila ca kufumya iumba panzi, Yesu aingilamo, alemelela umukazyana ikasa, nga nawe akatuka. 26Awe mpwelo ya cintu cii isalangana mu mpanga yonsi.
Yesu wapozya impafu ziili
27Lino Yesu wafumanga kuku, impafu ziili zimulondela zilaizya ziti, “We Mwana wakwe Davidi, ya na mizu kunotuli!” 28Lino wingila mu ng'anda, impafu ziya kunoli, nga Yesu azyuzya ati, “Uzye mukutaila vino ningamupozya?” Alino nazyo zimwasuka ziti, “Endi Mwene.” 29Lyene azikumya mu manso ati, “Pamulandu wa utailo winu, ciye vivyo kwene.” 30Alino yatandika kulola. Lyene Yesu ayapeela ilamulo kuti yatanena umuntu nanti umwi. 31Lelo yene yapita nu kusalanganya ilandwe mu mpanga ilya yonsi.
Yesu wapozya ciulu
32Lino antu yaa yaili apoziwa yakufuma, antu yamwi yaletela Yesu umuntu uwali nu mupasi wankota, nupya wali a ciulu. 33Lyene lino Yesu wafumya mupasi wankota, umuntu atandika kuvwanga. Iumba nalyo lizunguka cuze, liti, “Cintu ca musango uu citatala caloleka mu Izlaeli.” 34#Mat 10:25; 12:24; Mk 3:22; Luk 11:15 Lelo Afaliseo yavwanga yati, “Mu maka ya mwanangwa wa mipasi yankota amuno akafumizya mipasi yankota.”
Yesu waya ni nkunkunsi pa antu
35 #
Mat 4:23; Mk 1:39; Luk 4:44 Lyene Yesu apitana mu misumba nu mu mizi yonsi kwene, ino yali pipi na yemba uwaku Galile. Wene asambilizya mu mang'anda ya mapepo nu kukosola Ilandwe Lisuma lya Wene wakwe Leza, nu kupozya indwala zya misango yonsi, ni ndema. 36#Mpe 27:17; 1Yam 22:17; 2Mil 18:16; Eze 34:5; Mk 6:34 Walanga walola maumba, aya ni nkunkunsi pano yali apelelwe nupya aculisye, kwati imfwele izitakweti kacema. 37#Luk 10:2 Alino anena alondezi yakwe ati, “Uzombozi uukulu cuze, lelo aomvi yati yacepa. 38Caleka pepini ku mwine wa uzombozi kuti atume aomvi nayauze ku uzombozi wakwe.”
Currently Selected:
Mateo 9: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013