Mateo 8
8
Yesu wapozya umuntu uwalwile tembwe
(Mk 1:40-45; Luk 5:12-16)
1Lyene lino watentemuka mwamba, maumba akulu cuze yamulondela. 2Lyene umuntu uwalwile tembwe aiiza kuli Yesu, afukama ati, “Mwene, ndu kasi ungampozya.” 3Yesu atambalika ikasa lyakwe amulemelela, nga amunena ati, “Nkasi, pola!” Lilyo kwene umuntu apoziwa kuli tembwe, 4#Levi 14:1 Yesu amunena ati, “Utanena umuntu nanti umwi pali cii. Lelo yanga kuli simapepo kuti akakulole, upele impolelwa ino Mose wamunenyile, pakuti yonsi yasininkizye vino watupoziwa.”
Yesu wapozya muomvi wakwe musika wa mpuka ya vita umwanda onga
(Luk 7:1-10)
5Lino Yesu wingila mu Kapenaumu, musika wa mpuka ya vita umwanda onga vya Ciloma aiiza kunoli amupapata 6ati, “Mwene, muomvi wane umulwale nupya ali ku ng'anda pa musanzi. Wene atangapita nupya akuwaika cuze.” 7Yesu nawe amunena ati, “Namaiza mupozye.” 8Lelo musika wa vita amunena ati, “Mwene nemo ntalinzile kuti wize mu ng'anda yane. Lelo vwanga sile izwi, nu muomvi wane amapola. 9Pano nani kwene, nene muntu uwalasikwa na maka ku uteko pi sika lya ntunguluzi zikulu. Nani kwene nakwata asilika yano nkaangalila. Ndi nanena wenga nati, ‘Pita!’ Nawe apita, nu ku muze inti, ‘Iza!’ Nawe aiiza, nupya ndi nanena muzya wane nati, ‘Cita cii!’ Nawe acita.” 10Lino Yesu uvwa cii, azunguka cuze, anena yano amusukilile ati, “Namunena vino ntatala nalola umuntu wa utailo wakwe uu. 11Cumi namunena nati, nayauze aingi yalafuma mu nsi yonsi nu kwikala pali pamwi na Abulaamu na Isaki na Yakobo mu Wene wa mwiyulu. 12#Mat 22:13; Mat 25:30; Luk 13:28 Lelo antu yano yange yaye mu wene yene yalasumbwa kunzi mu mfinzi, mumo muno yalalila nu kulumanya ncecete pamulandu wa kuwaika.” 13Lyene Yesu anena musika ati, “Pitanga, cimacitika ndi vino watutaila.” Nu muomvi wakwe apoziwa kasita kwene kako.
Yesu wapozya antu aingi
(Mk 1:29-34; Luk 4:38-41)
14Alino Yesu aingila mu ng'anda yakwe Petulo, nga azana nyinavyala Petulo aizi pa musanzi ala umulwale impepo. 15Lyene amukumya pi kasa ni mpepo nayo isila, nga umulwale akatuka atandika nu kumupeela ivyakulya. 16Lyene manguzi yamuletela antu aingi ali ni mipasi yankota, nawe aifumya kwi zwi nga apozya na alwale onsi. 17#Eza 53:4 Cii cacitike kuti cifikiliziwe cino kasema Ezaya wavwanzile ati, “Wene watozile indema zitu, asenda ni ndwala zitu.”
Antu alinzile kulondela Yesu
(Luk 9:57-62)
18Lino Yesu walola maumba yamuzinguluka anena alondezi yakwe kuti yalambe ku mbalama yuze. 19Kasambilizya wa Masunde umwi aiiza, amunena ati, “Namakulondela konsi kuno umaya.” 20Yesu amunena ati, “Yankusa yakwata ininga umwa kulala, ni vyunyi vyakwata ivinsanzo, lelo Mwana wa Muntu atakwata pa kusamila mutwe wakwe.” 21Nu mulondezi muze ati, “Mwene, leka ntale mpite kuti nkazike tata.” 22Lelo Yesu amunena ati, “Ndondela, leka afwe yazike afwe yao.”
Yesu walesya cipupu
(Mk 4:35-41; Luk 8:22-25)
23Yesu apatama mu wato pamwi na alondezi yakwe nga yapita nawe. 24Mukupumikizya cipupu cikatuka pali yemba, cakuti maimbi yaapuma ku wato na manzi yaasempukila mukasi kauko. Yesu wene ala akaswile. 25Lyene alondezi yakwe yaya kunoli, yamuzyula yati, “Mwene tutuule, pano tuli pipi nu kuundwa!” 26Yesu ayanena ati, “Mwe ya utailo unono! Uzye pacani muvwa intete?” Lyene Yesu akatuka, alesya cipupu na maimbi, nga kuya cele. 27Na antu yazunguka yati, “Uzye wii umuntu wa musango cii, wino cipupu na maimbi vyamuyela?”
Yesu wafumya mipasi yankota mu antu
(Mk 5:1-20; Luk 8:26-39)
28Lino Yesu wafika ku mbalama yuze yakwe yemba, mu mpanga ya Gadala, antu yaili ali ni mipasi yankota yafuma ku malindi, yamukomanya. Yene yali akali cuze cakuti kutali umuntu wapitanga mu museo ulya. 29Yakomanya Yesu, nga yapunda yati, “Yesu, we Mwana wakwe Leza, uzye ukulonda cani kunotuli? Uzye wati wiza kuno kuti utucuzye lino kasita katali kafike?” 30Kwali ufyo wakwe yakapoli ukulu cuze ala ukulya katalamukila kufuma pano yali. 31Caleka mipasi yankota ipapata Yesu iti, “Ndu matufumya, utuzinge tukingile mu ufyo wakwe yakapoli.” 32Lyene nawe anena mipasi yankota ati, “Pitangini”, nga mipasi yankota ifuma munoyali, iya ingila muli yakapoli. Alino ufyo onsi utantamukila ku lwema, uponela muli yemba, umwela.
33Acemanga yakapoli yasimula yaya ku musumba, yaya yalanda vyonsi ni cacitike kuli yano ali ni mipasi yankota. 34Lyene antu amu musumba yafuma kuya komanya Yesu, nga lino yamulola, yamupapata kuti afume mu mpanga yao.
Currently Selected:
Mateo 8: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013