Mateo 10
10
Atumwa yakwe Yesu ikumi na yaili
(Mk 3:13-19; Luk 6:12-16)
1Yesu aama alondezi yakwe ikumi na yaili, ayapeela amaka akufumya mipasi yankota nu kupozya indwala zya misango yonsi nga ni ndema.
2Yaa, ali mazina ya atumwa ikumi na yaili: Wakwe conga, Simoni, (wino izina lyakwe a Petulo), na Andeleya mwina wakwe. Yakobo mwana Zebedi na Yoane mwina wakwe. 3Filipo na Batolomeo. Tomasi na Mateo uwali kasonkisya. Yakobo mwana Alufeo na Tandeo. 4Simoni kalwisya wa untungwa, nga na Yuda Iskalyoti uwakoofile Yesu.
Yesu watuma atumwa yakwe ikumi na yaili
(Mk 6:7-13; Luk 9:1-6)
5Lino Yesu watuma atumwa ikumi na yaili ayapeela amalamulo ati, “Mutaya ku Akulukuwa nanti ukwingila mu musumba uli onsi uwa ina Samaliya. 6Lelo mutale muye ku ina Izlaeli, yao ali wa mfwele ziponge. 7Lino mukupita, mwakosola ilandwe lii, muti, ‘Uwene wa mwiyulu wati upalama pipi.’ 8#Luk 10:4 Pozyini alwale, tutululini afwe, pozyini yakwe tembwe, mufumye ni mipasi yankota. Mwapelwa amaka yakucita vii uwila, caleka namwe kwene kacitilini antu uwila. 9Mutasenda impiya zya musango wakwe zaabu, siluva nanti zya mukuwa mu vikwama vinu. 10#1Kol 9:14; 1Tim 5:18 Mutasenda mufuko wa kulengelamo vimwi pa lwendo lwinu, nanti cakuzwala na cuze, nanti ndyatu nanti intuwa. Pano muomvi camulinga kupelwa vilondwa vyakwe.
11“Mu musumba onsi nanti muzi uno mwingilamo, londini umuntu angamupokelela, mwikale mu ng'anda yakwe kufika na lino mulafumamo mu cifulo cico. 12Na lino mwingila mu ng'anda ilya mutale muti, ‘Mutende uye namwe.’ 13Ine ya ng'anda ndi yamuzengela, mutende winu ulaya panoyali, lelo ndi yakana kumuzengela, mutende winu ulamuwelela. 14#Luk 10:4; Mil 13:51 Umuntu ali wensi wino atalamuzengela, nanti kuvwa mazwi inu, muce mufume mu ng'anda nanti mu musumba uo, nu kukunta ulukungu lwaku ngazo zinu. 15#Uta 19:24; Mat 11:24; Luk 10:4 Cumi namunena vino pa wanda wa upinguzi Leza alaya na mizu kuli Sodoma na Gomola kuluta musumba uwo.
Alondezi yakwe Yesu yalazunyiwa
(Mk 13:9-13; Luk 21:12-17)
16 #
Luk 10:3
“Lolini namutuma wa mfwele pakasi ka mimbulu. Caleka mucenjele wa nzoka lelo mufuke wa nkunda. 17#Mk 13:9; Luk 12:11; 21:12 Lelo mucenjele na antu, pano yalamutwala ku vilye vya milandu, nupya yalamuma ivikoti mu mang'anda ya mapepo. 18Yalamulema nu kumutwala ku ntunguluzi na yakateeka pamulandu wane, kuti muye yakambone yane kunoyali nu ku Akulukuwa. 19Lelo lino yalamulema, mutakalanguluke nkolelo pali vino mulavwanga nanti musango uno mulavwangilamo. Lino nsita iliza mulapelwa cino mulavwanga. 20Pano mazwi yano mulavwanga yatalaya mazwi inu, lelo yalafuma kuli Mupasi Wamuzilo. 21#Mk 13:12; Luk 21:16 Antu yalakoopa aina yao aonsi kuti yakomwe. Mu musango uli onga na yaisi yalakoopa ana yao. Ana yalakatukila akwasi yao nu kuyakomisya. 22#Mat 24:9, 13; Mk 13:13; Luk 21:17 Onsi yalamupata pamulandu wane. Lelo wino wensi alaposya kufika nu ku mpelelekezyo, wene alatuulwa. 23Lelo lino antu amu musumba umwi yamucuzya, utukilini ku musumba uze uli pipi na kuko. Cumi namunena vino mutalamala kuomba milimo mu mizi yamu Izlaeli lino Mwana wa Muntu atali kuti aiize.
24 #
Luk 6:40; Yoa 13:16; 15:20 “Kasambilila ataluta kasambilizya wakwe, nanti muomvi ataluta mwene wakwe. 25#Mat 9:34; 12:24; Mk 3:22; Luk 11:15 Calinga ukuti kasambilila alingane na kasambilizya wakwe, muomvi nawe alingane nu mwene wakwe. Mwine wa ng'anda ndi akaamwa ukuti a Belezebu, uzye yauze amu ng'anda yalaamwa uli?
Wino tungoopa
(Luk 12:2-7)
26 #
Mk 4:22; Luk 8:17 “Caleka mutaoopa antu. Kusi cimwi icafisama icitalasokololwa paswe, nanti cimwi cino icafiswa icitalaumbulwa. 27Vintu vino namunena mu mfinzi, mulinzile kuvilanda paswe, na vyonsi vino muvwila mu kapopo, kakosolini mu misolo. 28Mutaoopa yano akakoma umwili, lelo yatangakoma mupasi. Lelo mwaoopa Leza, wino ali na maka akonona umwili nga nu mupasi kwene mu Gehena. 29Uzye utunyi twiili tusikalwa pi kowili lyonga? Lelo pasi akunyi konga kangapona pansi ukwaula kuti Leza ali So winu amanye. 30Nupya inyele zyonsi zyaku mitwe inu nazyo kwene wazipenda zyonsi. 31Caleka mutaoopa, pano mwemwe yamutengo kuluta utunyi utwingi.
Kukaana Yesu pa manso ya antu
(Luk 12:8-9)
32“Cumi, namunena nati, wino wensi walanda paswe ukuti uwakwane, nani ndamucitila cili conga pa manso yakwe Tata uwa mwiyulu. 33#2Tim 2:12 Lelo wensi alankana pa manso ya antu, nani ndamukana pa manso yakwe Tata uwa mwiyulu ukuti ntamumanyile.
Yalapusana pamulandu wakwe Yesu
(Luk 12:51-53; 14:26-27)
34“Mutelenganya vino niiza ku kuleta mutende muno nsi. Ntiza leta mutende, lelo niiza leta nkondo. 35#Mik 7:6 Pano niza pusanya umwana umonsi ni isi. Umwana kaci nanyina, nu mwana kaci na nyinavyala. 36Amu ng'anda ya muntu yalaya ali anisi yakwe aipisye. 37Wino wensi uwatemwa isi na nyina kuluta nene wene ataine kuya mulondezi wane. Na wino wensi uwatemwa umwana umonsi nanti kaci kuluta nene, wene ataine kuya mulondezi wane. 38#Mat 16:24; Mk 8:34; Luk 9:23 Na wino wensi asisenda ulupanda lwakwe nu kundondela, wene ataine kuya mulondezi wane. 39#Mat 16:25; Mk 8:35; Luk 9:24; 17:33; Yoa 12:25 Na wiyo akalonda kutuula umi wakwe, wene alaulovya. Lelo wino uwaponzya umi wakwe pamulandu wane, wene alauzana.
Kupelwa cilambu
(Mk 9:41)
40 #
Mk 9:37; Luk 9:48; 10:16; Yoa 13:20 “Wino wensi uwamuzengela, ala wanzengela. Na wino wensi uwanzengela, ala wazengela wino uwantuma. 41Wino wensi alazengela kasema pamulandu wakuti akasema, alapeelwa cilambu cakwe kasema. Na wino wensi alazengela umuntu umololoke pano wene akacita ivyawololoke pa manso yakwe Leza, alapeelwa cilambu ca muntu umololoke. 42Na wino wensi alapeela lwako lwa manzi azuke kuli wenga uwamu alondezi yane, pamulandu wakuti wene mulondezi wane, cumi namunena vino Leza atalaposiwa kumulambula.”
Currently Selected:
Mateo 10: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013