Mateo 28
28
Yesu wazyukuka kufuma ku Afwe
(Mk 16:1-8; Luk 24:1-12; Yoa 20:1-10)
1Lino Sabata lyapita, lyene ku macaca pa wanda walondelela wakutandika mulungu, Maliya uwaku Magadala nga na Maliya muze yaya kukulola ilindi. 2Awe lilyo kwene kuya ni cilundumusi cikulu, pano mungeli wa Mwene wika mwiyulu, aiiza akunkulusya iwe, alifumya nga aikalapo. 3Kuloleka kwakwe kwakoline wa nkuwa, ni vizwalo vyakwe vyali vitiswe kuluta umula. 4Yakalinda yuvwa intete, yazakaza nu kufwa mutombo.
5Alino mungeli anena anaci yaya ati, “Mutoopa, pano manyile vino mukulonda Yesu, wino watanyilwe pa lupanda. 6Asimo muno, watazyukuka wakwe vino wavwanzile. Izini mulole pano wala izi. 7Lyene yangini zuwazuwa mukanene alondezi yakwe muti, ‘Watazyukuka kufuma ku afwe, nupya amamukolelela kuya ku Galile. Kuku akuno mumaya mukamulole.’ Acino nati niza kuti imunene.” 8Caleka anaci yakumpeka kufuma kwi lindi, ala yakuuvwa intete, mbali yali nu luzango cuze, yasimula kuti yakanene alondezi yakwe.
9Mukupumikizya Yesu ayakomanya, ayanena ati, “Mutende uye namwe.” Alino nao yamupalamila, yalemelela ngazo zyakwe, yamupepa. 10Lyene Yesu ayanena ati, “Mutoopa! Yangini mukanene aina yane yaye ku Galile. Kuku akuno yalandola.”
Ilandwe kufuma kuli yakalinda
11Lino anaci yacili yakupita, yakalinda nao yaya ku musumba nu kulandila yasimapepo akalamba vyonsi vino angeli yacisile kwi lindi. 12Lino yasimapepo akalamba yakongana na aikolo yumana kapi nga yapela asilika cipendo ca mpiya cikulu. 13Alino yayanena yati, “Mukalande muti, alondezi yakwe yali iiza iiya icala usiku ala swemo twati tukasula. 14Mulasi ndi uvwa cii, tulasininkizya kunoli ukuti mwemwe yakaele. Acino mwemo mutakwata nanti masakamiko yamwi.” 15Caleka asilika yatoola impiya nu kucita vino yasimapepo akalamba yayanenyile, nga ni landwe lii lisalangana monsi mu Ayuda, kufika ni lelo kwene.
Yesu waloleka ku alondezi yakwe
(Mk 16:14-18; Luk 24:36-49; Yoa 20:19-23; Mil 1:6-8)
16 #
Mat 26:32; Mk 14:28 Alondezi ikumi na wenga yapita ku Galile ku mwamba uno Yesu wayanenyile kuyako. 17Lyene lino yamulola, yamupepa. Lelo yamwi yene yatwisika. 18Yesu nawe ayanena ati, “Napelwa maka pa viumbwa vyonsi mwiyulu na pano nsi. 19#Mil 1:8 Caleka yangini konsi mu nsi mucite antu amu nko zyonsi kuya alondezi yane. Mwayawatizya mwi zina lyakwe Tata, nu Mwana, nu Mupasi Wamuzilo, 20nu kuyasambilizya kucita vyonsi vino namunenanga. Lyene nani namayanga pamwi namwe lyonsi kufika na pa wanda wa mpelelekezyo ya nsi.”
Currently Selected:
Mateo 28: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013