Mateo 27
27
Yatwala Yesu kwakwe Pilato
(Mk 15:1; Luk 23:1-2; Yoa 18:28-32)
1Lyene katondo, yasimapepo akalamba onsi, nga na aikolo yalanzyanya vya kucita pa kukoma Yesu. 2Alino yamunyepa yamusenda, nu kumupeela kuli Pilato uwali mulasi.
Imfwa yakwe Yuda
(Mil 1:18-19)
3 #
Mil 1:18
Lyene lino Yuda, wino uwamukoofile walola vino yavunuka Yesu kuti afwe, auvwa ulanda cuze pali vino watacita, nga awezezya yasimapepo akalamba na aikolo impiya makumi yatatu zyakwe siluva. 4#Mil 1:18 Lyene ayanena ati, “Nati nifya pa kukoopa umuntu uwakaele kuti afwe.” Nao yamunena yati,
“Uzye cico cingatusakamika? Wewe umanye vyakucita.” 5#Mil 1:18 Caleka Yuda asya wasumbila impiya zyakwe siluva mu Ng'anda ikulu yakwe Leza. Alino apita aya aikulika. 6#Mil 1:18 Yasimapepo akalamba yasola impiya zizyo, yavwanga yati, “Citaine na masunde ukwika impiya zizyo zyakwe siluva mu cipao ca mpiya camu Ng'anda ikulu yakwe Leza pano izya wazi.” 7#Mil 1:18 Caleka yalanzyanya, yuvwana kuti yaziomvye ukukala calo cakwe kamata wa nyungu, kuti ciye cakuzikamo ainamasi. 8#Mil 1:18 Uli mulandu kufika na pa wanda kwene uu, cikaamwa ukuti, “Calo ca wazi.” 9#Zak 11:12 Lyene cifikiliziwa cino Leza wavwanzile kupitila muli kasema Yelemiya cikati, “Yatozile impiya makumi yatatu, mutengo uno aina Izlaeli yazumilizye pali aliwe. 10#Zak 11:12 Yaziomvya ukukala calo cakwe kamata wa nyungu, ndi vino Mwene wanenyile.”
Pilato uzya Yesu Mauzyo
(Mk 15:2-5; Luk 23:3-5; Yoa 18:33-38)
11Alino yatwala Yesu ku mulasi, yamwimika inkolelo yakwe, nga mulasi uwaku Loma amuuzya ati, “Uzye wewe uli Mwene wa Ayuda?” Yesu nawe aasuka ati, “Watuvwanga.” 12Lelo lino yasimapepo akalamba na aikolo yakumulongwela, Yesu wene atavwanzile nanti cimwi. 13Lyene Pilato amuuzya ati, “Uzye utuvwile umboni uno yakukulongwela?” 14Lelo Yesu wene ataswike nanti izwi lyonga, nga mulasi azunguka cuze.
Yesu wapingwilwa ukufwa
(Mk 15:6-15; Luk 23:13-25; Yoa 18:39, 40; 19:1-16)
15Pa nsita ya kuzevya Cimulo ca Ucilo lwali ulutambi lwa mulasi kusapwila iumba munyepwe wenga wino yakasi. 16Pa kasita kaka yakweti munyepwe wenga mulumbuke cuze, wino zina lyakwe a Balaba. 17Caleka lino iumba lyakongana, Pilato ayauzya ati, “Uzye mukulonda kuti musapwile weni? Uzye a Balaba nanti a Yesu wino akaamwa ukuti Klistu?” 18Pano wamanyile vino yasimapepo akalamba yapile Yesu kunoli pamulandu sile wa uzuwa wao.
19Lelo lino Pilato watenzi pa cilimba ca kuputwila milandu, muci atuma izwi kunoli ati, “Utacita cintu nanti cimwi ku muntu wiyo uwakaele, pano usiku nali nalota vintu vingi pamulandu wakwe.”
20Alino yasimapepo akalamba na ikolo yatunkola iumba kuti lilenge Pilato kuti ayasapwile Balaba, lelo Yesu wene akomwe. 21Mulasi nawe ayauzya ati, “Uzye pali yaa yaili mukulonda ukuti imusapwile weni?” Nao yaasuka yati, “Balaba.” 22Pilato ayauzya ati, “Uzye lyene namacita uli pali Yesu wino akaamwa kuti Klistu?” Onsi yaasuka yati, “Atanwe pa lupanda!” 23Pilato ayauzya ati, “Uzye wataifya cani?” Nao yapundisya yati, “Atanwe pa lupanda.” 24#Malg 21:6 Lino Pilato walola vino waposiwa cakucita, lelo kuluta kuti mpanzela ikatuke, atoola manzi afulala minwe pa manso yi umba avwanga ati, “Nemo insi na mulandu wa kukoma umuntu wii uwakaele. Mwemwe mumanye vyakucita.” 25Antu yonsi yavwanga yati, “Lekini mulandu wa mfwa yakwe wii uye panotuli na ana itu.” 26Lyene ayasapwila Balaba, lelo apingula kuti yume Yesu vikoti, nga ayapeela kuti yamutane pa lupanda.
Asilika yasoweka Yesu
(Mk 15:16-20; Yoa 19:2-3)
27Lyene asilika yatwala Yesu mu kasi ka musolo wi sano lya mulasi, yakonganika mpuka yonsi ya asilika kumuzinguluka. 28Alino yamuzula vino wazwite, nga yamuzwika mwingila uyenzu, 29yaluka ingala ya myunga, yamuzwika ku mutwe. Lyene yamufumbatika intuwa mwi kasa lilunji, yafukama nkolelo yakwe, yamusoweka yati, “Kwaita, Mwene wa Ayuda!” 30Alino yamuswila mati, yatoola intuwa yamupoola pa mutwe. 31Lino yamala kumusoweka, yamuzula mwingila alino yamuzwika vizwalo vyakwe. Lyene yamusenda kunzi kuti yakamutane pa lupanda.
Yesu watanwa pa Lupanda
(Mk 15:21-32; Luk 23:26-43; Yoa 19:17-27)
32Lino yakufuma yakomanya umuntu uwaku Kuleni, wino zina lyakwe a Simoni, nga yamupatikizya kusenda lupanda lwakwe Yesu. 33Alino yafika ku cifulo camwangwa Gologota, cikusenula ukuti, “Pa cifulo ci panga.” 34#Mas 69:21 Kuku yamupile waini muminkane ni vintu vimwi vilule.#27:34 vintu vimwi vilule: vintu vimwi vilule avino yapelanga ku muntu wino iyatana kuti vilesye kuwaya. Vintu vii avino yakaama ukuti Mule. Lelo lino wamyanta, akana kumwa.
35 #
Mas 22:18
Lyene lino yamutana pa lupanda, yaankana ni vizwalo vyakwe, pacisila ca kupendola. 36Alino iikala papa kwene iyamulinda. 37Apapela ya mutwe wakwe iikapo cimpampa icalemvilwepo cimanyisyo ca mulandu uno wapilwe, cakuti, “Wii, ali Yesu, Mwene wa Ayuda.” 38Lyene yatana vipondo viili pali pamwi na Yesu, conga kwi kasa lilunji ni cuze kwi mani lyakwe.
39 #
Mas 22:7; 109:25 Na antu apitanga mu pipi yapukunya mitwe yao nu kusoweka Yesu yati, 40#Mat 26:61; Yoa 2:19 “We muno ungomoola Ng'anda ikulu yakwe Leza, nu kuikuula mu manda yatatu! Ituule ndi wewe Mwana wakwe Leza! Ika ku lupanda!” 41Vivyo kwene yasimapepo akalamba na yakasambilizya ya Masunde nga na aikolo yamuseka yati, 42“Watuulanga auze, lelo wene atangaituule! Ndi cakuti wene Mwene wa Izlaeli, lekini aike ku lupanda ndakai kwene. Lyene tumataila! 43#Mas 22:8 Wene wataila Leza. Ndakai lekini Leza amutuule nda kasi, pano wavwanzile ukuti wene Mwana wakwe Leza.” 44Vivyo kwene ni vipondo ivyatanyilwe pamwi nawe, navyo kwene vimusausya.
Imfwa yakwe Yesu
(Mk 15:33-41; Luk 23:44-49; Yoa 19:28-30)
45Lino ilanzi lyafika umutwe papela (12 koloko), impanga yonsi inyepwa ni mfinzi kufika na pano ilanzi lyatemba (3 koloko). 46#Mas 22:1 Ukulingana na lino ilanzi lyatemba (3 koloko), Yesu alaizya ni zwi likulu ati, “Eli, Eli, lama sabakatani?” Cikusenula ukuti, “Leza wane, Leza wane, pacani wantazyela.” 47Lino yamwi aimi pipi yuvwa cii yati, “Muntu wii akwama Eliya!” 48#Mas 69:21 Lilyo kwene wenga uwa munoyali asimula aya atoola umwepu, auombeka muli waini musasalume. Alino autunga ku kamuti, amutambikila pa mulomo kuti amwe. 49Asyala yonsi nao yati, “Tekelini, tulole ndi Eliya amaiza amutuule.” 50Lyene Yesu alaizya ni zwi likulu, nga afwa.
51 #
Kuf 26:31
Lilyo kwene cisalu camu Ng'anda ikulu yakwe Leza cilepuka pakasi kufuma papela kufika na pansi. Insi nayo isunkana kuya cilundumusi, nga nu lwala nalo lulepoka. 52Malindi nayo yayulika, nga na antu yakwe Leza aingi, yao afwile mpiti, yazyukuka yaya nu umi. 53Antu yalya yasya malindi, nga pacisila ca kuzyukuka kwakwe Yesu kufuma ku mfwa iingila mu Yelusalemu Musumba Wamuzilo nu kuloleka ku antu aingi.
54Musika wa mpuka ya vita na yano wali nao, alindanga Yesu, yuvwa cilundumusi nu kulola vyonsi vyacitike. Alino yuvwa intete nga yavwanga yati, “Cumi, wene wali Mwana wakwe Leza!” 55#Luk 8:2 Anaci aingi yali katalamukila, ala yakulola, yano alondile Yesu kufuma ku Galile, nu kumutumikila. 56#Luk 8:2 Pali yaa, pali Maliya uwaku Magadala, Maliya nyina wakwe Yakobo na Yosefu, nga nu muci wakwe Zebedi.
Kuzikwa kwakwe Yesu
(Mk 15:42-47; Luk 23:50-56; Yoa 19:38-42)
57Manguzi, kwiza mukama umwi uwaku Alimatiya, izina lyakwe a Yosefu, nawe kwene wali mulondezi wakwe Yesu. 58Wene aya kuli Pilato kuya lenga icala cakwe Yesu. Lyene Pilato apeela ilamulo kuti icala cipelwe kunoli. 59Alino Yosefu atoola icala, acipomba mu nsalu itiswe yamutengo, 60aya aciika mwi lindi ilyakwakwe, lino umwine wafukwile mwi we. Lyene akunkulusizyapo iwe likulu pa mulyango wi lindi nga apita. 61Maliya uwaku Magadala na Maliya muze yatenzi pipi ulunga ni lindi.
Yika Yakalinda kwi Lindi lyakwe Yesu
62Pa wanda walondelile, pa Sabata, yasimapepo akalamba na Afaliseo yakongana kwakwe Pilato. 63#Mat 16:21; 17:23; 20:19; Mk 8:31; 9:31; 10:33; Luk 9:22; 18:31 Yamunena yati, “Musambazi, tukwiusya vino musomvi wilya wavwanzile, lino atali kuti afwe ati, ‘Pacisila ca manda yatatu ndazyukuka nupya.’ 64Acino pela ilamulo ukuti ilindi lilindwe kufika pa manda yatatu. Pano ndu tacisile vivyo, ale limwi alondezi yakwe yangiza iiye icala cakwe Yesu nu kunena antu yati watazyukuka. Kusomba ku kwakusyalikizya kwene kulaya ukwipisye kuluta kwankolelo.” 65Pilato nawe ayanena ati, “Nga vino asilika muli nayo, yasendini pitini nao mukaalinda ilindi ningo ndi vino mwavwanga.” 66Caleka yapita yaya yalinda ilindi ningo. Yika cimanyililo piwe lya pa mulyango, cakumanyila umwi ndi walikunkulusya, kulifumyapo. Alino yasyapo na yakalinda akuti yalindapo.
Currently Selected:
Mateo 27: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013