Mateo 26
26
Yapangana kukoma Yesu
(Mk 14:1-2; Luk 22:1-2; Yoa 11:45-53)
1Lino Yesu wamala kuvwanga vintu vii anena alondezi yakwe ati, 2#Kuf 12:1 “Mwati mumanya vino kwasyala manda yaili kufika pa wanda wa kuzevya Cimulo ca Ucilo, nga nu Mwana wa Muntu alapeelwa kuti yamutane pa lupanda.”
3Lyene yasimapepo akalamba nga na aikolo yakongana mu ng'anda yakwe Kayafa, Simapepo Mukulu. 4Alino yumana kapi kuti yaleme Yesu mu nkama nu kumukoma. 5Lelo yavwanga yati, “Tutalinzile kucita cii pa wanda wa kuzevya Cimulo ca Ucilo, pano antu yangacita mpanzela.”
Mwanaci mwi wapongolwela Yesu amafuta ku Betaniya
(Mk 14:3-9; Yoa 12:1-8)
6Yesu wali mu Betaniya mu ng'anda yakwe Simoni, wino uwalwile tembwe. 7#Luk 7:37 Lino walyanga, umwanaci umwi aiiza kunoli nu musazi uwazilemo amafuta acinunu cisuma nupya amutengo ukome, apongolwela pa mutwe wakwe Yesu. 8Lino alondezi yalola cii, yasoka cuze. Alino yuzya yati, “Uzye pacani cino ononela amafuta vii? 9Pano amafuta yaa acinunu cisuma yange yakaziwe pa mutengo ukome cuze, nga ni mpiya zipelwe ku apina.” 10Lino Yesu wamanya cii, ayanena ati, “Uzye pacani mukusakamika umwanaci wii? Wene watacita cintu cisuma cuze kunondi. 11#Malg 15:11 Apina mukaya nao pe, lelo nemo mutalaya nani pe. 12Umwanaci wii wali wapongolwela amafuta acinunu cisuma pa mwili wane kuti ateyanye kunzika. 13Cumi, namunena vino, konsi kuno Ilandwe Lisuma lilakosolwa mu nsi yonsi, cii cino umwanaci wii wacita cilalandwa kuti antu yamwiusya.”
Yuda wazumila kukoopa Yesu
(Mk 14:10-11; Luk 22:3-6)
14Lyene Yuda Iskalyoti, wenga uwamu alondezi ikumi na yaili, aya kuli yasimapepo akalamba, 15#Zak 11:12 ayauzya ati, “Uzye ndi namukoopela Yesu, mumampela cani?” Alino nao yamupeela impiya makumi yatatu zyakwe siluva. 16Kufuma lilya kwene Yuda atandika kulonda inzila iya kukoopelamo Yesu kunoyali.
Yesu walya Cimulo ca Ucilo pamwi na alondezi yakwe
(Mk 14:12-21; Luk 22:7-14, 21-23; Yoa 13:21-30)
17Pa wanda wakutandika kuzevya Cimulo ca Mukate usi na Citutumusi, alondezi iiza kuli Yesu yamuzya yati, “Uzye aukwi kuno ukulonda kuti tukakuteyanyizizye Cimulo ca Ucilo?”
18Yesu nawe aasuka ati, “Yangini mu musumba, ku muntu umwi, mumunene muti, ‘Kasambilizya wati, nsita yane yati palama. Alondezi yane pamwi nani tumaiza tuliile Cimulo ca Ucilo mu ng'anda yako.’ ” 19Caleka alondezi yacita vino wayanenyile, yaya yateyanya Cimulo ca Ucilo.
20Lyene lino kwaya manguzi, Yesu aikala nu kulya pa cipango pamwi na alondezi yakwe ikumi na yaili. 21Walanga yacili yakulya, Yesu ayanena ati, “Wenga uwa munomuli amankoopa.” 22Alondezi yasakamikwa cuze nga yatandika kumuuzya wenga wenga yati, “Mwene, uzye anene ukunena?” 23#Mas 41:10 Yesu aasuka ati, “Wino amateela umukate pali pamwi nani mu lweso, aliwe amankoopa. 24Mwana wa Muntu alafwa wakwe vino calembwa pali aliwe, lelo kalanda ku muntu wino amakoopa Mwana wa Muntu! Cange cizipe umuntu wiyo ndi atavilwe.” 25Lyene Yuda wino uwamukoofile, amuuzya ati, “Kasambilizya, uzye anene?” Yesu amwaasuka ati, “Wavwanga wemwisikulu.”
Cimulo ca Mwene
(Mk 14:22-26; Luk 22:14-20; 1Kol 11:23-25)
26Walanga yacili yakulya, Yesu atoola mukate, ataizya Leza, aumokoola, alino aupela ku alondezi yakwe avwanga ati, “Tolini mulye, uu uli mwili wane.” 27Lyene atoola ulwako, ataizya Leza, ayapeela nga avwanga ati, “Mwinimo mwensi kwene. 28#Kuf 24:8; Yel 31:31 Uu uwazi wane, uno Leza watama insimbi pa upangano, uno wapongololwa pamulandu wa antu aingi, kuti maifyo yao yelelwe. 29Namunena vino, ntalamwa nupya vifenwa vya vizao vya matingi kufika ku wanda uno ndamwa ivipya pali pamwi namwe mu Wene wakwe Tata.”
30Lyene lino iimba ulwimbo lwa kulumbanya Leza, yafuma yaya ku Mwamba wa Olivi.
Yesu wasowela vino Petulo amamukana
(Mk 14:27-31; Luk 22:31-34; Yoa 13:36-38)
31 #
Zak 13:7
Lyene Yesu nawe ayanena ati, “Usiku kwene uu, mwensi kwene mumamfutatila nu kunsya nenga, pano calembwa cati, ‘Ndakoma kacema nu ufyo wa mfwele ulasalangana. 32#Mat 28:16 Lelo lino ndazyukuka, ndamukolelela ku Galile.’ ” 33Alino Petulo avwanga ati, “Nanti yonsi yalakufutatila pamulandu wakwe vino vilakucitikila, nemo ntalacicita.” 34Yesu anena Petulo ati, “Cumi nakunena vino usiku kwene uu, lino mukolwe atacili alamule, wemo umankana maila yatatu ale ukuvwanga vino utamanyile.” 35Alino Petulo avwanga ati, “Nemo nanti cingaya cakuti imfwe pamwi nawe, ntangankukane inti ntakumanyile.” Na alondezi yonsi yavwanga cili conga.
Yesu wapepa mu Getesemani
(Mk 14:32-42; Luk 22:39-46)
36Lyene Yesu na alondezi yakwe yaya ku cifulo cino camwangwa Getesemani, alino anena alondezi yakwe ati, “Ikalini paa lino nkuya pa nkolelo ku kupepa.” 37Alino asenda Petulo na ana yakwe Zebedi yaili, nga atandika kunyunguluka nu kusakamikwa, 38alino ayanena ati, “Mwenzo wane wanyomelwa nu ulanda pipi ni mfwa. Syalini pano nu kupempula.” 39Apita katalamukila panono, afukama pansi ainime, nga apepa ati, “Tata ndi cingaya, leka ulwako luu lwa ucuzi lusisiwe kunondi. Kusi kulonda kwane, lelo kulonda kwako kucitike.”
40Lyene awela azana alondezi yatatu yakaswile. Anena Petulo ati, “Uzye mwemo musi na maka akupempula pali pamwi nani nanti kasita kanono? 41Pempulini nu kupepa kuti mutaponela mu matunko. Umwenzo ukulondesya, lelo umwili uutonte.”
42Nupya aswilila iila lyakwe ciili, apepa ati, “Tata, ndi citangaya kuti lwako luu lwa ucuzi lusisiwe kunondi suka nkamwemo, leka kulonda kwako kucitike.” 43Lyene lino wawela ku alondezi nupya kwene azana yakaswile, pano manso yao ala yati yanyoma nu tulo.
44Caleka nupya ayasya apita ku kupepa iila lyakwe citatu, ala akuvwanga mazwi ali yamwi kwene. 45Lyene awela ku alondezi, ayanena ati, “Uzye mucili mukaswile nu kupuza? Lolini! Kasita kati kafika nu Mwana wa Muntu akupelwa mu makasa yakwe yakaifya. 46Katukini, tuini twapita. Lolini, umuntu amankoopa wapalama.”
Kulemwa kwakwe Yesu
(Mk 14:43-50; Luk 22:47-53; Yoa 18:3-12)
47Walanga lino Yesu acili vwanga, Yuda, wenga uwamu alondezi ikumi na yaili, afika. Wali ni iumba likulu ilyasenzile mpanga ni zya ntuwa, ala yatumilwe na yasimapepo akalamba na aikolo amu Ayuda. 48Kakoopa wapile iumba cimanyililo ati, “Muntu wino namatonsola ale ali wiyo kwene wino mukulonda. Mumuleme.” 49Lyene Yuda aya kuli Yesu amunena ati, “Kwaita Kasambilizya!” Lyene amutonsola. 50Yesu avwanga ati, “Cuza wane, cita cino wizile. Alino iiza nkolelo yalema Yesu.” 51Lyene wenga wamuli yao ali pamwi na Yesu asomola lupanga lwakwe, asempa ikutwi lya muzya wakwe Simapepo Mukulu. 52Yesu nawe amunena ati, “Swilizya lupanga lwako mu cipata caluko, pano yano yonsi akalema lupanga yene yalafwila ku lupanga. 53Uzye ukwelenganya vino nemo ntangandenge kuli Tata, kuti ndakai kwene antumile maumba akulu ikumi na yaili avita vya angeli? 54Lelo malembelo asowela kuti cilinzile cicitike ndi cikwene, yangafikiliziwa uli?”
55 #
Luk 19:47; 21:37 Pa kasita kaka, Yesu anena iumba ati, “Uzye mwizile kuli nene ni mpaanga ni zya ntuwa pa kundema, ungati nene cipondo? Manda aingi nazanwanga mu Ng'anda ikulu yakwe Leza, ala nkusambilizya, nga namwe mutandemile. 56Lelo vyonsi vii vyati vicitika pakuti vino yakasema yalemvile vifikiliziwe.” Alino alondezi yonsi kwene yutuka yamusya wenga.
Yesu mwi Tengo lya Ayuda
(Mk 14:53-65; Luk 22:54-55, 63-71; Yoa 18:13-14, 19-24)
57Yao alemile Yesu yamusenda ku ng'anda yakwe Kayafa Simapepo Mukulu, kuno yakasambilizya ya Masunde pali pamwi na aikolo yakongine. 58Lelo Petulo wene amulondela katalamukila nga afika nu mu musolo kwene wa ng'anda yakwe Simapepo Mukulu, nga aikala na yakalinda amu Ng'anda ikulu yakwe Leza kuti alole icimacitika. 59Yasimapepo akalamba ni nkombe zyonsi zya mwi Tengo yezya kulonda umboni waufi pali Yesu kuti yamukome. 60Lelo yatazanyile nanti umwi, nanti angala yakambone aufi aingi yaile inkolelo 61#Yoa 2:19 ku kumulongwela. Mukusyalikizya, antu yaili yaile inkolelo yavwanga yati, “Muntu wii wavwanzile ati, ‘Ningomoola Ng'anda ikulu yakwe Leza nu kuikuula mu manda yatatu.’ ”
62Lyene Simapepo Mukulu aimilila, auzya Yesu ati, “Uzye usi na cakuvwanga pali vino yakukulongwela?” 63Lelo Yesu aya cele. Alino Simapepo Mukulu amunena ati, “Nakunena, Lapa pa manso yakwe Leza umumi, utunene ndi wewe uli Katuula uwalavilwe, Mwana wakwe Leza.” 64#Dan 7:13 Yesu aasuka ati, “Watuvwanga. Lelo nkunena mwensi kwene vino mulalola Mwana wa Muntu atenzi kwi kasa lilunji lyakwe Leza Wamaka yonsi nu kwiza mu makumbi.” 65#Levi 24:16 Lyene Simapepo Mukulu alepula mwingila wakwe, avwanga ati, “Watuvwanga mazwi ya misuli apali Leza. Tusikulonda umboni nauze! Ndakai mwati muvwa mazwi ya misuli apali Leza. 66#Levi 24:16 Uzye mukwelenganya uli?”
Yaasuka yati, “Alinzile ukufwa.”
67 #
Eza 50:6
Lyene yamuswila mati pa manso nu kumuma. Yamwi nao yamuma impi. 68Yavwanga yati, “Sema tuvwe, we Katuula! Ale tunganya uzye aweni uwakuma?”
Petulo wakana Yesu
(Mk 14:66-72; Luk 22:56-62; Yoa 18:15-18, 25-27)
69Lyene Petulo watenzi mukasi ka musolo wi Tengo, nga umukazyana wenga uwamu yaomvi yakwe Simapepo Mukulu aiiza panoli amunena ati, “Nawe kwene wali pamwi na Yesu uwaku Galile.” 70Lelo Petulo akana pa manso yakwe yonsi ati, “Nemo ntamanyile cino ukuvwanga.” 71Alino afumapo aya ku mulyango, nga lino umukazyana muomvi namuze wamulola, anena yano aimi pipi ati, “Muntu wii, nawe kwene wali na Yesu uwaku Nazaleti.” 72Petulo akana nupya nu mulapo ati, “Ntamanyile umuntu wii.” 73Lino papita kasita kanono yano aimi pipi yapalama kuli Petulo, yamunena yati, “Cumi nawe kwene wewe uwa munoyali, pano milandile yako ikukusinila.” 74Alino Petulo alapa avwanga ati, “Ntamanyile umuntu wino mukulandapo! Ndi nkutumpoka, Leza andye.” Lilyo kwene mukolwe alamula. 75Lyene Petulo aiusya vino Yesu wamunenyile ati, “Lino mukolwe atacili alamule, wemo umankana maila yatatu ale ukuvwanga vino utamanyile.” Alino Petulo afumila panzi nga alila minsozi nu ulanda ukulu cuze.
Currently Selected:
Mateo 26: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013