Mateo 24

Yesu wasowela komoolwa kwa Ng'anda ikulu yakwe Leza

(Mk 13:1-2; Luk 21:5-6)

1Yesu afuma mu Ng'anda ikulu yakwe Leza, nga lino akupita, alondezi yakwe yapalama kunoli, yamusontelela vikulwa vya Ng'anda ikulu yakwe Leza. 2Lelo Yesu ati, “Endi, mukulola vikulwa vii vyonsi. Cumi namunena, vino kutalaya iwe nanti lyonga ililasyala pi we lyuze. Yonsi kwene yalomoolwa.”

Yesu walanda pa macuzi nu kuzunyiwa

(Mk 13:3-13; Luk 21:7-19)

3Lino Yesu watenzi pa Mwamba wa Olivi, alondezi iiza kunoli, yamuzya mu nkama yati, “Uzye alilaci lino cii cilacitika? Nupya icani cilaya cilangililo cakulanga ukwiza kwako nga ni mpelelekezyo ya nsi?”

4Yesu nawe aasuka ati, “Cenjelini, mutaleka umuntu nanti wenga amuponzye. 5Pano antu aingi yalizila mwi zina lyane nu kuti, ‘Nene ndi Katuula uwalavilwe!’ Yene yalaponzya antu aingi. 6Muluvwa inkondo ni mpupilizi zya nkondo kutali, lelo mutakasakamale. Vintu vii vilinzile kucitika, lelo visikulanga ukuti mpelelekezyo yatifika. 7Inko zilakatukilana, na mawene yalakatukilana. Kulaya vipowe ni vilundumusi mu ncende zimwizimwi. 8Vintu vii uli utandiko wa macuzi akulu cuze.

9 # Mat 10:22 “Lyene yalamulema, yalamuzunya nu kumukoma. Antu amu nko zyonsi yalamupata pamulandu wane. 10Pa nsita ilya, aingi yalafutatila utailo, nupya yalakoopana nu kupatana. 11Na yakasema yaufi aingi yalaloleka nu kusomba antu aingi. 12Pamulandu wakuti antu yalaifya kuluta, kutemwa mu antu aingi kulacepa. 13#Mat 10:22 Lelo wino wensi alaposya kufika nu ku mpelelekezyo wene alatuulwa. 14Ni Landwe Lisuma lii lya Wene lilakosolwa mu nsi yonsi kuya umboni ku antu amu nko zyonsi, alino mpelelekezyo iliiza.

Ca winyi ca ononyi

(Mk 13:14-23; Luk 21:20-24)

15 # Dan 9:27; 11:31; 12:11 “Mulalola ‘Ca winyi ca ononyi’ cino kasema Danieli wavwanzile, cimilila mu Ng'anda ikulu yakwe Leza.” (Kawelenga ailuke vino ci cikusenula.) 16“Lyene yonsi ali mu Yudeya yakuutukile ku myamba. 17#Luk 17:31 Wino ali pi paala lya ng'anda yakwe wene atakike nu kwingila mu ng'anda kuti atoole cimwi asende. 18#Luk 17:31 Wino ali mu calo atakaswilile ku ng'anda yakwe kuyatola cakuzwala. 19Kalanda ku anaci alasenda indilwa na yano alaonsya mu manda yalya! 20Pepini kuli Leza kuti kuutuka kwinu kutakacitike pa mwela nanti pa Sabata. 21#Dan 12:1; Umb 7:14 Pano pa nsita ilya, kulaya macuzi aipisye kuluta, yano atatazile yayeko kufuma lino insi yaumvilwe kufika na ndakai nupya yatalatala yayeko. 22Lelo Leza ndi atacefizye manda yalya, kusi nanti umwi angatuulwa. Na pamulandu wa asololwe yakwe, Leza alacefya manda yalya.

23“Lyene, umwi ndi wamunena wati, ‘Lolini, Klistu auwi kuno!’ Nanti, ‘Lolini Klistu awilya kuku!’ Mutakamutaile. 24Pano antu aufi yalaloleka, yano alailanda ukuti yene ali Klistu kwene, nupya ali yakasema. Yalacita vilangililo vikulu ni vizungusyo kuti yaponzye na asololwe kwene ndi cingaya. 25Uvwini! Nati munena cii lino nsita itali ifike.

26 # Luk 17:23 “Caleka antu ndi yaca yamunena yati, ‘Lolini, Klistu awilya kuku, mu lwanga!’ Mutakayeko. Nanti ndi yaca yamunena yati, ‘Klistu ali kuno, mu miputule ya mukasi ka ng'anda.’ Mutakayataile. 27#Luk 17:23 Pano ukwiza kwa Mwana wa Muntu kulakolana wa nkuwa ino ikamyansya kucilinganya ulwelele lonsi kufuma ku ufumondaka nu kufika ku uwondaka.

28 # Luk 17:37 “Konsi kuno icala cili, akuno na makozi yakakongana.”

Ukwiza kwa Mwana wa Muntu

(Mk 13:24-27; Luk 21:25-28)

29 # Eza 13:10; 34:4; Eze 32:7; Yow 2:10, 31; 3:15; Umb 6:12 “Lelo zuwazuwa pacisila ca ucuzi uwamu manda yalya, ilanzi lilafita, umwezi utalawala, intanda zilapona kufuma mwiyulu, na maka amu lwelele yalatenta. 30#Dan 7:13; Zak 12:10; Umb 1:7 Pa nsita ilya, cilangililo ca Mwana wa Muntu cilaloleka mwiyulu. Na antu amu nko zyonsi mu nsi yalalosya lino yalalola Mwana wa Muntu akwiza mu makumbi na maka nu lulumbi lukulu. 31Izwi likulu lya ntandala liluvwika nga nawe alatuma angeli yakwe kukukonganika asololwe yakwe kufuma ku mpela yonga ya nsi kufika nu ku yuze kwene.

Isambililo lya pa musamvu

(Mk 13:28-31; Luk 21:29-33)

32“Sambililini pa musamvu. Lino misambo yakweo yatandika kulemba na mafwa yalelema mukamanya vino cisiku capalama. 33Mu musango uli onga, lino mulalola vintu vii vyonsi vikucitika, mulamanya vino Mwana wa muntu ali pipi lwa pa mulyango kwene. 34Cumi, namunena vino, vintu vii vyonsi vilacitika lino antu amu mukulo uu onsi yatali yafwe. 35Iyulu ni nsi vitalikalilila manda pe, lelo mazwi yane yene yalikalilila manda pe.

Kusi wamanya kwiza kwa wanda ulya nanti kasita

(Mk 13:32-37; Luk 17:26-30, 34-36)

36“Kusi nanti wenga wamanya kwiza kwa wanda ulya nanti kasita. Angeli ya mwiyulu nanti Mwana kwene yatamanya, suka sile Tata. 37#Uta 6:5 Vino cali mu manda yakwe Nowa, avino cilaya pa kwiza kwa Mwana wa Muntu. 38Pano mu manda yalya, lino mulamba atali aiize, antu yalyanga nu kumwa, yatwalanga nu kutwalwa, kufika na pa wanda uno Nowa wingile mu cange. 39#Uta 7:6 Lelo yatamanyile icali nu kucitika kufika lino mulamba wizile asenda yonsi kwene. Mu musango uli onga avino cilaya pa kwiza kwa Mwana wa Muntu. 40Pa nsita ilya antu yaili yalaomba mu calo. Wenga yalamusenda, nu muze yalamusya. 41Anaci yaili yalaasya pa mawe. Wenga yalamusenda, nu muze yalamusya.

42“Caleka pempulini, pano mutamanyile wanda uno Mwene winu aliza. 43#Luk 12:39 Nupya manyini ukuti mwine ng'anda ndi amanyile insita ino aivi yakwiza, atangakasula nupya atangaleke yatame ng'anda yakwe. 44#Luk 12:39 Caleka namwe kwene mulinzile muiteyanye, pano Mwana wa Muntu aliza pa nsita ino mutenekile.

Muomvi mutailwe na asi mutailwe

(Luk 12:41-48)

45“Uzye lyene, muomvi mutailwe nu wamano aweni? Awiyo wino mwene wakwe wamucita kangalila uwakulolela aomvi amu ng'anda yakwe, nu kuyapela vyakulya vyao pa nsita ilinge. 46Walongo umuomvi wiyo wino mwene wakwe alazana akucita wakwe vii lino aliza. 47Cumi, namunena vino mwene alamucita kangalila wa vintu vyonsi vino akweti. 48Lelo muomvi wiyo ndu mwipe wene alelenganya mu mwenzo wakwe ati, ‘Mwene wane walengela kwiza,’ 49lyene atandika kuuma aomvi yauze, aalya nu kumwa pamwi na akolesi, 50lyene mwene wa muomvi aliza pa wanda uno asikwenekela, na pa kasita kano atamanyile. 51Wene alamuvunuka cuze nupya alamusumbila ukunzi ku cifulo ca asomvi kuko kuno alalila nu kulumanya ncecete.

Currently Selected:

Mateo 24: MamL13

Highlight

Copy

Compare