Mateo 22
22
Mulumbe wa cimulo ca winga
(Luk 14:15-24)
1Nupya Yesu avwanga kunoyali mu milumbe ati, 2“Uwene wa mwiyulu wakolana ni cacitike lino mwene umwi wacitile mwana wakwe cimulo ca winga. 3Alino atuma aomvi yakwe kuli yano amilwe, ku kuyanena kuti iize ku cimulo ca winga. Lelo nao yakana kwiza. 4Nupya atuma aomvi yauze ayanena ati, ‘Pitini, kanenini yao amilwe ukuti nati nteyanya cimulo. Nati nkoma tucipambasi twine nupya tunone. Vintu vyonsi vyati viteyanyiziwa. Izini ku cimulo ca winga.’ 5Lelo yao amilwe yatiisileko mano. Yamwi yaya ku vyalo vyao nga na yamwi yaya ku milimo yuze ya uculuzi. 6Asyala nao yalema aomvi yakwe, yayacuzya nu kuyakoma. 7Lelo Mwene asoka cuze, nga atuma asilika yakwe kuya koma inkomi zizyo nu kooca misumba yao iikulu. 8Alino anena aomvi yakwe ati, ‘Cimulo ca winga cati citeyanyiziwa, lelo yao amilwe yatasakamile ukwiza. 9Yangini mu miseo mukaame ali wensi wino mumazana, aiize ku cimulo ca winga.’ 10Caleka aomvi yapita yaya mu miseo, yakonganika antu yonsi aipe na asuma yano yazanyile, nu muputule usuka ucepa.
11“Lelo lino mwene wingilamo kukulola yano amilwe, alola umuntu umwi mwenemo, wino atazwite vizwalo vya pa winga. 12Alino amuuzya ati, ‘Cuza, uzye wali wingila uli muno kwaula kuzwala vizwalo vya pa winga?’ Lelo umuntu atakweti cakuvwanga. 13Alino mwene anena aomvi yano alipo ati, ‘Munyepini makasa nga ni ngazo alino mumusumbile kunzi mu mfinzi, muno alalila nu kulumanya ncecete.’ ”
14“Pano aamwa aingi lelo asololwa anono.”
Iuzyo lya pa musonko
(Mk 12:13-17; Luk 20:20-26)
15Lyene Afaliseo yapita, yapangana vya kumuteya mu mauzyo. 16Yatuma alondezi yao nga na antu yakwe Helodi kuli Yesu yamuzya yati, “Kasambilizya twamanya vino ukavwanga icumi. Lelo ukasambilizya Masunde yano Leza akalonda kuti antu yayela. Wemo usioopa umuntu nupya utaya na kasoozi. 17Lyene tunene vino ukwelenganya. Uzye ciine na Masunde yakwe Leza kuti twasonka kuli Kesa#22:17 Kesa: Kesa wali mwene waku Loma. nanti foo?” 18Lelo lino Yesu wamanya mapange yao aipe, avwanga ati, “Mwe yasomvi mwe, uzye pacani mukungezya? 19Ndangizyini lupiya longa lukaomviwa ku kulipa musonko.” Nao yamuletela lupiya longa, 20nga nawe ayauzya ati, “Uzye usyu uu, uwakwe weni? Uzye izina lii, ilyakwe weni?” 21Nao yamwasuka yati, “Ivyakwe Kesa.” Alino nawe ayanena ati, “Caleka pelini Kesa vyakwakwe, Leza nawe mumupele vyakwakwe.” 22Lino yuvwa cii, yazunguka cuze. Caleka yamusya yapita.
Iuzyo lya pamulandu wa kuzyukuka kufuma ku afwe
(Mk 12:18-27; Luk 20:27-40)
23 #
Mil 23:8
Pa wanda uwo kwene Asaduki (yano akati antu yatalazyukuka kufuma ku afwe), iiza kuli Yesu yamunena yati, 24#Malg 25:5 “Kasambilizya, Mose wavwanzile ati, ‘Muntu ndi wafwa nu kusya umuci, lelo ukwaula ana, umwina wakwe alinzile kupyana silenzi kuti amuvyalile ana.’ 25Kwali aina cinimbali aikalanga naswe. Uwakutandika watwite mama, nga afwa kwaula kusya nanti umwana. Alino umwina wakwe ciili, apyana silenzi. 26Cali cili conga na kuli wakwe ciili na wakwe citatu, nga kufika na kuli wakwe cinimbali kwene. 27Lyene umwanaci uwasyalikizye ukufwa. 28Uzye lyene, pa wanda wa kuzyukuka wene alaya muci wakwe weni? Pano yonsi kwene yamutwite.” 29Yesu nawe aasuka ati, “Mwaponga, pano mutamanya malembelo, nanti maka yakwe Leza. 30Pano lino afwe yalazyukuka, yatalatwala nanti kutwalwa, lelo yalakolana wa angeli ya mwiyulu. 31Pamulandu wa kuzyukuka kwa afwe, uzye mutawelenga vino Leza wavwanga kunomuli? 32#Kuf 3:6 ‘Wene watile nene Leza wakwe Abulaamu, na wakwe Isaki na Yakobo.’ Wene asi Leza wa afwe, lelo a Leza wa antu aumi.” 33Lino maumba yuvwa cii, yazunguka cuze pa usambilizyo wakwe.
Isunde likulu kuluta
(Mk 12:28-34; Luk 10:25-28)
34Lelo lino Afaliseo yuvwa vino Yesu watamyalalika Asaduki, yakongana pali pamwi. 35#Luk 10:25 Na wenga uwa munoyali, uwali nkonkotela ya Masunde, amuuzya iuzyo kuti amwezye, ati, 36#Luk 10:25 “Kasambilizya, pa masunde yakwe Leza onsi, uzye isunde cii likulu kuluta?” 37#Malg 6:5; Luk 10:25 Yesu nawe aasuka ati, “ ‘Uwatemwa Mwene Leza wako nu mwenzo wako onsi, nu umi wako onsi, na mano yako yonsi.’ 38#Luk 10:25 Lii lili sunde likulu nupya ilya cindama kuluta Masunde onsi. 39#Levi 19:18; Luk 10:25 Na lyakwe ciili likoline na lii, nalyo likati, ‘Uwatemwa umuzo ndi vino waitemwa.’ 40#Luk 10:25 Masunde alembwa mu mpapulo zyakwe Mose nga nu mu mpapulo zyakwe yakasema yonsi kwene yemelela pa Masunde yaa, oili.”
Iuzyo lya pali Katuula Uwalavilwe?
(Mk 12:35-37; Luk 20:41-44)
41Lino Afaliseo yakongana pali pamwi, Yesu ayauzya ati, 42“Uzye mukwelenganya uli pali Katuula uwalavilwe? Uzye wene amwana weni?” Nao yaasuka yati, “Umwana wakwe Davidi.”
43Alino Yesu ayauzya ati, “Uzye lyene pacani Mupasi Wamuzilo walenzile kuti Davidi amwame ati, ‘Mwene?’ Davidi wavwanzile ati,
44 #
Mas 110:1
‘Mwene wanenyile Mwene wane ati,
Ikala kwi kasa lilunji lyane
kufika lino ndakucimvizya anisi yako.’
45Davidi ndi wamwamile ati, ‘Mwene,’ Uzye Katuula uwalavilwe angaya uli umwana wakwe Davidi?” 46Kutali umuntu nanti wenga wakuti amwasuke. Nupya kufuma pa wanda kwene ulya kutali umuntu nanti wenga wezizye kumuuzya iuzyo na lyuze.
Currently Selected:
Mateo 22: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
