Mateo 21

Yesu wingila nu ucindami mu Yelusalemu

(Mk 11:1-11; Luk 19:28-40; Yoa 12:12-19)

1Lino Yesu na alondezi yakwe yapalama ku Yelusalemu, iiza ku muzi wa Betifage, pa Mwamba wa Olivi. Yesu atuma alondezi yakwe yaili nkolelo. 2Ayanena ati, “Yangini ku muzi ulya uuli nkolelo inu, nga lilyo kwene lino mwafika, mumaya mukazane punda anyefilwe nga nu mwana aimi pa mbali. Muyasapule nu kuyaleta kunondi. 3Muntu umwi ndi walanda cintu cili consi kunomuli, mumunene muti, ‘Mwene akuyalonda’, nga nawe amamuzumilizya kuyasenda.” 4Vintu vii vyacitike kufikilizya vino kasema wavwanzile ati,

5 # Zak 9:9 “Nenini antu amu musumba wa Zioni muti,

‘Lolini, Mwene winu akwiza kunomuli!

Wene umufuke, nupya akwezile pali punda.

Wene akwiza nupya akwezile pali mwana punda.’ ”

6Alondezi yapita, yaya yacita vino Yesu wayanenyile. 7Yaleta punda nu mwana. Yanzapo ni nsalu zyao, nga Yesu akwelapo. 8Alino antu, iumba likulu cuze yaanza insalu zyao mu museo, nga yamwi nao yatema misambo ya miti iyali na mafwa yaanza mu museo. 9Antu ali nkolelo nga na alondile cisila yonsi pamwi yasanzula mazwi yao yati, “Mucinzi upelwe ku Mwana wakwe Davidi! Walongo awiyo akwiza mwi zina lya Mwene! Mucinzi upelwe kuli Leza uwa papelapela!” 10Lino Yesu wingila mu Yelusalemu, mu musumba onsi mukaya na see. Alino antu yaauzya yati, “Uzye wii aweni?” 11Antu amwi umba yaasuka yati, “Wi ali kasema, Yesu uwaku Nazaleti, ku Galile.”

Yesu wazinga aculuzi mu Ng'anda ikulu yakwe Leza

(Mk 11:15-17; Luk 19:45-48; Yoa 2:13-22)

12Yesu aingila mu Ng'anda ikulu yakwe Leza, azinga aculuzi na akauzyanyanga vintu vyao. Lyene apenola vipango vyakwe yakakauzya ya mpiya ni vilimba vyakwe yano akazyanga inkunda. 13Ayanena ati, “Calembwa mu malembelo cati, ‘Ing'anda yane ilaamwa ing'anda ya mapepo.’ Lelo mwemo mwaicita ininga ya iivi.” 14Impafu ni vilema iiza kunoli, ku Ng'anda ikulu yakwe Leza, nga nawe ayapozya. 15Lelo yasimapepo akalamba na yakasambilizya ya Masunde yasoka cuze pa kulola vintu vino wacisile vyakuzunguka, nga na vino ana anono yalaizyanga mu Ng'anda ikulu yakwe Leza, ala yakuti, “Mucinzi upelwe ku Mwana wakwe Davidi!” 16#Mas 8:2 Alino yuzya Yesu yati, “Uzye ukuuvwa vino ana yaa yakuvwanga?” Yesu nawe aasuka ati, “Ee. Uzye mutawelenga mu malembelo vino Leza wavwanga ati, ‘Watusambilizya ana anono nga nu tunya tukoonka kukulumbanya cifumaluke.’ ” 17Alino Yesu afuma mu musumba, ayasya aya ku Betaniya akuno waile asendama.

Yesu watipwila musamvu

(Mk 11:12-14, 20-24)

18Katondo tondo uwanda uwalondelile, lino akuwela ku musumba auvwa inzala. 19Lyene lino walola musamvu uwali umu mbali ya museo, ayako, lelo atazanyileko vizao, suka sile mafwa. Alino aunena ati, “Kufuma ndakai utakaseeke vizao nupya.” Lilyo kwene musamvu uma. 20Lino alondezi yalola cii, yazunguka cuze, nga yuzya yati, “Uzye musamvu uma zuwa uli?” 21#Mat 17:20; 1Kol 13:2 Yesu nawe aasuka ati, “Cumi namunena vino ndi mukweti utailo, ndi musyakutwisika, mulacita na cino nati ncita ku musamvu. Mulanena nu mwamba kwene uu, muti, ‘Katuka uisumbe muli yemba,’ nga cilacitika vivyo kwene. 22Na consi cino mwalenga mwi pepo, ndi mwataila mulapokelela.”

Yesu yamuzya kuno wafumya maka

(Mk 11:27-33; Luk 20:1-8)

23Lino wingila mu Ng'anda ikulu yakwe Leza, yasimapepo akalamba na aikolo ali ntunguluzi zya antu iiza kunoli ala akusambilizya, yamuzya yati, “Uzye maka cii yano ukweti akucita vintu vii? Uzye aweni uwakupeela maka kwene yaa?” 24Yesu nawe aasuka ati, “Nani kwene namamuzya iuzyo lyonga sile. Namwe ndi mwasuka namamunena uwampela maka akucita vintu vii. 25Uzye Yoane wafumizye kwi maka akuwatizya? Uzye akuli Leza nanti ku antu?” Nao yatandika kupazyanya aisikulu yati, “Uzye tumati uli? Ndi twati, ‘Wafumizye kuli Leza,’ nawe amati, ‘Uzye lyene, pacani mutataile Yoane?’ 26Nupya tutangati, ‘Wafumizye ku antu!’ Swemo tukoopa antu pamulandu wakuti yene yasininkizya vino Yoane wali akasema.” 27Acino yaasuka Yesu yati, “Tutamanyile.” Lyene Yesu nawe ayanena ati, “Nani kwene ntakumunena uwampela maka akucita vintu vii.

Mulumbe wa ana yaili aonsi

28“Alino Yesu avwanga ati, namamunena mulumbe wa muntu uwakweti ana yaili aonsi. Lyene namwe mumanena vino mukwelenganya. Umuntu wii waile ku mwana uwali silenzi wa muze, amunena ati, ‘Mwana we, ilelo yanga kaombe mu calo ca matingi.’ 29Lelo mwana aasuka ati, ‘Awe, ntakuya nkaombe.’ Pacisila apinduluka, aya aomba. 30Lyene aya na kuli wakwe ciili, amunena cili conga kwene. Nawe aasuka ati, ‘Mukwai namaya nkaombe.’ Lelo pacisila ataile akaombe. 31Uzye pali yaa yaili, aweni wacisile cino isi walondanga?” Nao yaasuka yati, “A silenzi wa muze.” Yesu nawe ayanena ati, “Cumi namunena vino yakasonkesya nga na yacizelele yalamukolelela kwingila mu Wene wakwe Leza. 32#Luk 3:12; 7:29 Pano Yoane wizile kunomuli nu kumulanga vino mungalondela nzila ya wololoke wakwe Leza, lelo mutamutaile. Yakasonkisya na yacizelele yene yamutaile. Lelo mwemo nanti angala mwaweni cii, mutazenzwike nu kumutaila.”

Mulumbe wa alimi ya calo ca matingi

(Mk 12:1-12; Luk 20:9-19)

33 # Eza 5:1 Yesu ayanena ati, “Uvwini mulumbe nauze. Kwali umuntu umwi uwa kweti impanga, muno walimile calo ca matingi apindila ni cimpinda. Lyene aimbamo ni ciwina ca kufenelamo matingi, nga akuula nu lupungu. Alino apanzisya icalo cakwe ku alimi, nga apita ku mpanga ya kutali. 34Lino nsita yakuzombola yafisile, atuma aomvi yakwe ku alimi kuti yakatole mulingo wakwe uwa vizao vya matingi. 35Alimi yalema aomvi yakwe, yuma wenga, yakoma muze, nga wakwe citatu wene yamutama na mawe. 36Nupya aca atuma aomvi yauze aingi. Lelo nao kwene yayacita cili conga. 37Lyene pacisila atuma mwana wakwe umonsi kuno yali, avwanga ati, ‘Umwanane wene yalamucindika.’ 38Lelo lino alimi yalola mwana, yalanda yati, ‘Wii, ali mwana wakwe aalatoola icuma. Tuini tumukome nga tutoole icalo.’ 39Caleka yalemile mwana, yamusumbila kunzi ya calo ca matingi, nga yamukoma.

40“Lyene lino mwine wa calo ca matingi aliza, uzye wene alacita uli ku alimi yaa?

41“Nao yaasuka yati, alakoma alimi yaa mu musango umwi uwipisye, nu kupanzisya calo ca matingi ku alimi yauze, yano alamupeela mulingo wa vizao vino alatola pa nsita ya kuzombola.” 42#Mas 118:22 Lyene Yesu ayauzya ati, “Uzye mutatala mwawelenga mu malembelo yano akati,

‘Iwe lino yakakuula yakanyile,

lyene lyacisilwe iwe lya pitungi lya ng'anda.

Mwene uwacita vii,

uzye catuzungusya uli mu manso itu?’

43“Caleka namunena vino isyuko lya kuya mu Wene wakwe Leza lilapokwa kufuma kunomuli nu kupelwa ku antu yauze, yano alacita milimo ino akalonda.” [44Wino wensi alaponela piwe lili wene alavuneka, lelo wino wensi wino iwe lili lilaponela wene alavungolwa.]

45Lino yasimapepo akalamba na Afaliseo yuvwa milumbe yakwe Yesu, yamanya vino akulanda pamulandu na alio. 46Lyene yalonda nzila yakumulemelamo, lelo yoopa iumba pano antu yataile vino Yesu akasema.

Currently Selected:

Mateo 21: MamL13

Highlight

Copy

Compare