Mateo 20
20
Mulumbe wa yaomvi mu calo ca matingi
1“Uwene wa mwiyulu ukoline na vii. Umuntu umwi walavile katondo tondo kuya lemba aomvi akuomba mu calo cakwe ca matingi. 2Pacisila lino yazumilizyanya na aomvi kuti ayapeele malipilo ya wanda onga, ayatuma kuyaomba mu calo. 3Alino nupya afuma pa 9 koloko, alola yauze yaimi mu museo wi sokoni aula cakuomba. 4Alino ayanena ati, ‘Namwe kwene yangini mukaomba mu calo cane ca matingi, nga nani namaiza mulipile kulinga ni cipimo cilingane.’ 5Caleka yapita. Nupya pa 12 koloko na pa 3 koloko umuntu wilya apita, azana nayauze kwene, maila yoili ala akucita cili conga kwene. 6Lyene manguzi pa 5 koloko apita nupya aya azana nayauze kwene ala yaimi. Alino ayauzya ati, ‘Pacani muimi pano musanya onsi kwaula kuomba?’ 7Nao yamwasuka yati, ‘Pano kusi umwi wakutulemba incito.’ Nawe ayanena ati, ‘Namwe kwene yangini mukaomba mu calo cane ca matingi.’
8 #
Levi 19:13; Malg 24:15 “Lyene manguzi, mwine wa calo ca matingi anena kapitao wakwe ati, ‘Ama aomvi kuti njapele malipilo yao, kutandika na yao alemvilwe cisila usyalikizye na yao alemvilwe nkolelo.’ 9Lyene lino yao alemvilwe pa 5 koloko iiza, apeela kuli cila wenga malipilo ya wanda onga. 10Caleka lino yao alemvilwe nkolelo iiza, yapaalila kulipilwa kuluta pali yaa. Lelo na kuli yakwene wapile kuli cila wenga malipilo ya wanda onga. 11Lyene lino yalipilwa, yatandika kuilizyanya ku mwine wa calo, yati, 12‘Antu yaa, alemvilwe cisila yene yali yaomba aawa wenga sile, lelo wemo wayalipila cili conga naswe, swe muno twati tuomba kuluta nga nu kupya na kasanya.’ 13Lelo wene aasuka wenga uwa munoyali, ati, ‘Cuza, nemo ntakucenjizye. Uzye tutali twazumilizyanya kuti mupele malipilo ya wanda onga? 14Toola malipilo yako pitanga. Nemo nkasi kupeela wino uwalemvilwe cisila malipilo ali yamwi kwene na yano nati mpela kunuli. 15Uzye ntakweti nsambu yakucita cisuma cino nkasi pa mpiya zyane? Uzye pacani wanzuwila pa nsambu yane.’ ”
16 #
Mat 19:30; Mk 10:31; Luk 13:30 “Caleka acisila yalaya ankolelo, na ankolelo yalaya acisila.”
Yesu wasowela iila lyakwe citatu pa mfwa yakwe
(Mk 10:32-34; Luk 18:31-34)
17Lino Yesu akuya ku Yelusalemu, asenda alondezi yakwe ikumi na yaili pa mbali, ayanena ati, 18“Uvwini, tukuya ku Yelusalemu kuno Mwana wa Muntu alakoopelwa kuli yasimapepo akalamba na kuli yakasambilizya ya Masunde, nu kumuvunuka kuti afwe. 19Alakoopelwa ku Akulukuwa yano alamusaalula, yalamuma ivikoti nga nu kumutana pa lupanda. Lelo pa wanda wakulenga yatatu alazyukuka aye umumi.”
Kulenga kwakwe nyina wakwe Yakobo na Yoane
(Mk 10:35-45; Luk 22:24-27)
20Lyene nyina wa ana yakwe Zebedi aonsi, aiiza kuli Yesu pamwi na ana yakwe oili, afukama, nga amulenga cimwi. 21Yesu nawe amuuzya ati, “Uzye ukulonda cani?” Nawe aasuka ati, “Lino ulaateka mu wene wako, nkulenga kuti uce uzumilizye ana yane yaa oili yace ikale pali pamwi nawe. Wenga kwi kasa lilunji nu muze kwi mani lyako.” 22Lelo Yesu ayanena ati, “Mutamanyile cino mukulenga. Uzye mungamwa mu lwako lwa ucuzi luno nasya imwemo?” Nao yaasuka yati, “Tungacita.” 23Yesu nawe ayanena ati, “Icacumi mungamwa mu lwako lwane. Lelo ntakweti nsambu yakusolola wino angikala kwi kasa lilunji nanti kwi mani lyane. Tata alapeela vifulo vii kuli yano wateyanyizizya.”
24Lino alondezi yauze ikumi yacuvwa, yasokela yaa yaili ali aina. 25#Luk 22:25 Caleka Yesu aama yonsi pali pamwi ayanena ati, “Mwamanya ukuti yakateeka ya antu atataila Leza yakwata maka pa antu yao, nga ni ntunguluzi zyao nazyo zyakwata uwangalizi. 26#Luk 22:25 Lelo cisi vivyo muli mwemwe. Wino wensi wamuli mwemwe akulonda kuya mukulu, alinzile kuya muomvi wa yauze, 27#Mk 9:35; Luk 22:26 na wino wensi wamuli mwemwe akulonda kuya ntunguluzi, nawe alinzile kuya muzya winu, 28wakwe vino Mwana wa Muntu atizile kuti atumikilwe, lelo kuti atumikile yauze nu kupeela umi wakwe kuti akulule antu aingi.”
Yesu wapozya antu yaili ali mpafu
(Mk 10:46-52; Luk 18:35-43)
29Lyene lino Yesu wafumanga ku Yeliko pali pamwi na alondezi yakwe, iumba likulu limulondela. 30Mpafu ziili zyatenzi pa mbali ya museo, nga lino zyuvwa vino Yesu akupita penepo zisanzula mazwi ziti, “Mwene! We Mwana wakwe Davidi! Uye na mizu kunotuli!” 31Antu ali mwi umba yazikalipila, yazinena kuti zimyalale. Lelo zyene zisanzula mazwi kuluta ziti, “Mwene! We Mwana wakwe Davidi! Uye na mizu kunotuli!” 32Yesu aimilila, nga azyama azyuzya ati, “Uzye mukulonda kuti mucitile cani?” 33Nazyo zimunena ziti, “Mwene, tukulonda kuti twalola.” 34Alino Yesu aya na mizu panozili, azilema mu manso, nga lilyo kwene nazyo zitandika kulola, zimulondela.
Currently Selected:
Mateo 20: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
