Mateo 16
16
Afaliseo na asaduki yalonda cilangililo ca cinjelengwe
(Mk 8:11-13; Luk 11:16; 12:54-56; Mat 12:38-39)
1 #
Mat 12:38; Luk 11:16 Lyene Afaliseo na Asaduki yamwi iiza kuli Yesu kuti yamwezye mu mazwi. Caleka yamuzya kuti acite cilangililo ca cinjelengwe cakusininkizya vino wene watumwa na Leza. 2Nawe aasuka ati, “Manguzi lino ilanzi lyati lyawa, nga nu mwiyulu mwaenza, mwemo mukavwanga muti, ‘Mutondo muza ulaya cele, pano mwiyulu mwaenza.’ 3Alino katondo, mwiyulu ndi mwaenza, kuya ni cipupu, mwemo mukati, ‘Imvula imatonya pano mwiyulu mwaenza nu kufutika.’ Mwemo lino mukaceceta iyulu, mukalanda vino muza ulaya, lelo mutangamanya vikucitika ndakai! 4#Mat 12:39; Luk 11:29 Antu amu mukulo uu nupya aipe asi na utailo yakalonda cilangililo ca cinjelengwe! Lelo kusi cilangililo icilapelwa kunoyali, suka sile cilangililo cakwe kasema Yona.” Lyene Yesu apita, ayasya.
Citutumusi ca Afaliseo na Asaduki
(Mk 8:14-21)
5Lino alondezi yalamba mbalama yuze yakwe yemba, iilila kusenda mikate. 6#Luk 12:1 Yesu ayasoka ati, “Cenjelini nupya muye apempukile ku citutumusi ca Afaliseo na Asaduki.”
7Nao yalanzyanya aisikulu yati, “Akuvwanga cii pano tutasenzile mikate.”
8Yesu wamanyile cino yalanzyanyanga, caleka ayauzya ati, “Mwe ya utailo unono, uzye pacani mukulanzyanya pamulandu wakuti musi na mukate? 9#Mat 14:17 Uzye na ndakai kwene mutali mumanye? Uzye musyakwiusya lino namokoozile mikate isano nu kwimula antu mazimbi yasano? Uzye mwasozile muzuzya mise inga? 10#Mat 15:34 Uzye musyakwiusya mikate cinimbali ino namokoozile nu kwimula antu mazimbi yani. Uzye mwasozile muzuzya mise inga? 11Uzye na ndakai kwene mutali mumanye kuti ntakulanda kunomuli pamulandu wa mikate? Lelo cenjelini ku citutumusi ca Afaliseo na Asaduki”
12Lyene alondezi iiluka kuti atakuyanena kucenjela ku citutumusi cikaomviwa mu mukate, lelo kuti yacenjele ku usambilizyo wa Afaliseo na Asaduki.
Petulo waumbula ukuti Yesu ali Katuula Uwalavilwe
(Mk 8:27-30; Luk 9:18-21)
13Lyene lino Yesu wafika ku mpanga yapalime ku musumba wa Kesaliya Filipi, auzya alondezi yakwe ati, “Uzye antu yakati Mwana wa Muntu aweni?”
14 #
Mat 14:1; Mk 6:14; Luk 9:7 Nao yaasuka yati, “Yamwi yakati wewe Yoane Kawatizya. Yamwi yakati wewe Eliya. Alino yamwi nao yakati wewe Yelemiya, nanti wewe umwi wamuli yakasema.”
15Yesu nawe ayauzya ati, “Uzye mwemo mukati nene weni?”
16 #
Yoa 6:68
Simoni Petulo nawe aasuka ati, “Wewe Katuula uwalavilwe, Mwana wakwe Leza uwa umi.”
17Yesu amunena ati, “Walongo a wewe, Simoni mwana wakwe Yoane. Pano pasi umuntu uwataumbula cii kunuli. Lelo Tata uwa mwiyulu uwatakuumbwila. 18Petulo nakunena vino wewe lwala, na pa lwala luu apano ndakuula iuvi lyane, nga nanti maka ya mfwa yatalalicimvya. 19#Mat 18:18; Yoa 20:23 Namakupeela mfungulo zya wene wa mwiyulu. Consi cino wazumilizya pano pansi, na Leza kwene mwiyulu alazumilizya. Na consi cino wainda pano pansi, na Leza kwene mwiyulu alainda.”
20Lyene apeela ilamulo ku alondezi yakwe kuti yatanena umuntu nanti umwi vino wene ali Katuula uwalavilwe.
Yesu wasowela ucuzi, imfwa nu kuzyukuka kwakwe
(Mk 8:31-38; 9:1; Luk 9:22-27)
21Kufuma pa nsita kwene ilya nu kutwalilila, Yesu atandika kunena alondezi yakwe paswe ati, “Indi nu kuya ku Yelusalemu, kuno ndapelwa mu makasa ya ikolo ya Ayuda, yasimapepo akalamba na yakasambilizya ya Masunde, yano alancuzya cuze. Yalankoma, lelo pa wanda uwalenga yatatu ndazyukuka nu kuya nu umi.” 22Petulo amusenda pa mbali atandika kumukalipila ati, “Mwene cipelele kutali. Utakaleke cii cikuponele.” 23Lelo Yesu aseleuka, asinkola Petulo ati, “Fuma pano, Ciwa! Kunondi ukoline wa cisiki mu nzila, pano amelenganyo yako yatafumile kuli Leza, lelo auntunze.”
Kusenda lupanda nu kulondela Yesu
(Mk 8:34; Luk 9:23-27; Yoa 12:25)
24 #
Mat 10:38; Luk 14:27 Lyene Yesu anena alondezi yakwe ati, “Muntu umwi ndi akasi kundondela, aikanye, aisendele ulupanda nga andondele. 25#Mat 10:39; Luk 17:33; Yoa 12:25 Pano wino wensi akalonda kutuula umi wakwe, wene alauponzya. Lelo wino wensi amaponzya umi wakwe pamulandu wane, wene alauzana. 26Uzye umuntu alakwata muzano cii ndi walonka ivyamu nsi vyonsi, lelo waponzya umi wakwe? Awe kusi cimwi! Uzye kuli cimwi cino umuntu angalipa kuti umi wakwe umuwelele? 27#Mas 62:12; Mat 25:31; Lom 2:6 Pano Mwana wa Muntu aliiza pali pamwi na angeli yakwe mu lulumbi lwakwe Isi. Lyene alalambula nanti kuvunuka cila muntu kulingana ni vicitwa vyakwe. 28Cumi namunena vino, apano yali yamwi pano atalafwa kufika lino yalalola Mwana wa Muntu akwiza mu wene wakwe.”
Currently Selected:
Mateo 16: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
