Mateo 17
17
Yesu wakaoka pa mwamba
(Mk 9:2-13; Luk 9:28-36)
1 #
2Pet 1:17
Pacisila ca manda mutanda Yesu asenda Petulo, Yakobo na Yoane mwina wakwe ayatungulula yaya pa mwamba utali, kuno yene yali onga. 2#2Pet 1:17 Lyene yalola Yesu wakaoka, ni cinso cakwe ciyengesa cuze wi lanzi, nga ni vizwalo vyakwe viyengesa viya vitiswe wa luswepo. 3#2Pet 1:17 Lilyo kwene alondezi yalola Mose na Eliya, ala yakuvwanga na Yesu. 4#2Pet 1:17 Petulo anena Yesu ati, “Mwene, catuzipila kuti twali tutenzi kuno kwene. Ndu kasi, namakuula insakwe zitatu, yonga iyakwako, yuze iyakwe Mose, nayuze iyakwe Eliya.” 5#Uta 22:2; Malg 18:15; Mas 2:7; Eza 42:1; Mat 3:17; 12:18; Mk 1:11; Luk 3:22; 2Pet 1:17 Lino acili akuvwanga, ikumbi liyengese cuze liyavimba, ni izwi lyuvwika kufuma mwi kumbi liti, “Wii, Mwanane mukundwe. Munoli nkuzanga cuze. Mwamuvwa.” 6Lino alondezi yuvwile izwi, yuvwa intete cuze cakuti yapona pansi yafupime. 7Lelo Yesu aiiza ayakumya ni kasa lyakwe, avwanga ati, “Katukini, mutuvwa intete.” 8Lino yasanzula amanso, yataweni umwi suka sile Yesu.
9Lyene lino yacili tentemuka mwamba, Yesu ayapeela ilamulo ati, “Mutanena nanti umwi pa cilolwa cino mwalola, kufika lino Mwana wa Muntu alazyukuka kufuma ku afwe.” 10Alondezi yamuzya yati, “Lyene uzye, pacani yakasambilizya ya Masunde yakati Eliya aliiza inkolelo?” 11Yesu nawe aasuka ati, “Cumi, Eliya ali nu kwiza, kuti nupya alungike vintu vyonsi. 12#Mat 11:14 Lelo namunena vino Eliya wiza mpiti, nga antu nao yatamulooka. Lelo antu yati yamucitila vyonsi vino yakasi. Mu musango uli onga kwene, avino yalacuzya Mwana wa Muntu.” 13Lyene alondezi iiluka kuti akuvwanga kunoyali pali Yoane kawatizya.
Yesu wapozya umwana mulumendo uwali nu mupasi wankota
(Mk 9:14-29; Luk 9:37-43)
14Lyene lino iiza yuminkana ni umba, umuntu umwi aiiza afukama inkolelo yakwe Yesu. 15Amunena ati, “Mwene, ya na mizu pa mwanane umonsi. Cifumfumi cikamucuzya nupya maila aingi cikamuponya mu moto nga limwi mu manzi. 16Nali naleta mwanane ku alondezi yako, lelo yali yaposiwa kumupozya.” 17Yesu ayanena ati, “Ala! Uzye namaya namwe kufika lilaci? Mwe antu amu mukulo usi na utailo nupya uvulungane! Uzye namamutekelela kufika lilaci? Leta mwana wako mulumendo kunondi.” 18Yesu akalipila mupasi wankota, nao ufuma mu mulumendo, nga lilyo kwene apoziwa. 19Lyene pacisila cakwe cii, alondezi iiza kuli Yesu lino ali wenga. Alino yamuzya mu nkama yati, “Uzye pacani cino swemo twali twaposiwa kufumya mupasi wankota?” 20#Mat 21:21; Mk 11:23; 1Kol 13:2 Alino nawe aasuka ati, “Apamulandu wakuti mukweti utailo unono.” Cumi namunena vino, “Ndi mukweti utailo nanti unono wa lumbezu lwakwe musunta, munganena umwamba uu muti, ‘Sungutila’ nga nao ulasungutila. Kusi cimwi cino mungaposiwa kucita.”
[21Lelo kusi cuze cingafumya mupasi wankota uwa musango uu, suka sile mwapepa nu kuizilizya ukulya.]
Yesu wasowela nupya pa mfwa yakwe
(Mk 9:30-32; Luk 9:43-45)
22Lino alondezi yakongana pamwi mu Galile, Yesu ayanena ati, “Mwana wa Muntu alakoopelwa ku antu. 23Yene yalamukoma, lelo pacisila ca manda yatatu alazyukuka nu kuya nu umi.”
Yesu wapela musonko wa Ng'anda ikulu yakwe Leza
24 #
Kuf 30:13; 38:26 Lino Yesu na alondezi yakwe iiza ku Kapenaumu, yano asonkesyanga musonko wa Ng'anda ikulu yakwe Leza iiza kuli Petulo. Alino yamuzya yati, “Uzye kasambilizya winu akasonka musonko wa Ng'anda ikulu yakwe Leza?” 25Petulo nawe amwaasuka ati, “Endi, wene akasonka.” Lino Petulo wingile mu ng'anda, Yesu uwatandike kuvwanga kunoli, amuuzya ati, “Simoni, uzye wemo ukwelenganya uli pali cii? Uzye akuli yaweni kuno aene ya nsi yakasangulisya musangulo, nga nu kusonkesya musonko? Uzye ku antu yao nanti ku antu yauze?” 26Petulo nawe aasuka ati, “Ku antu yauze.” Yesu avwanga ati, “Lyene kuli kuti antu yao yatalinzile kusangula nanti kusonka. 27Lelo pakuti tutaya nu mulandu kunoyali, yanga kuli yemba, usumbilemo iswelo. Utoole inswi ino umatandika ukuswela, uyasamule mulomo, nga umazanamo lupiya. Utoole ulupiya lulo ukalipe musonko witu sweili.”
Currently Selected:
Mateo 17: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
