Mateo 15
15
Intambi zya vikolwe vya Ayuda
(Mk 7:1-13; Luk 11:37-41)
1Uwanda umwi Afaliseo na yakasambilizya ya Masunde yamwi afumile ku Yelusalemu iiza kuli Yesu. Alino yamuzya yati, 2“Uzye pacani alondezi yako yasyayela intambi zino vikolwe vitu vyatusilile? Pano yene yakalya ni minwe ya mifitalila kwaula kufulala ku minwe kulingana nu lutambi lwa vikolwe vitu.” 3Yesu aasuka ati, “Uzye pacani cino mwemo pakwemelela ku ntambi zinu musyayela masunde yakwe Leza? 4#Kuf 20:12; 21:17; Levi 20:9; Malg 5:16 Pano Leza wakonkomizye ati, ‘Cindika so na nyoko. Wino wensi asicindika isi nanti nyina alinzile ukufwa.’ 5Lelo mwemo mukasambilizya ukuti umuntu ndi akweti cimwi cino angapeela kwazwa isi nanti nyina, lelo ndi wati, ‘Uu, uwila kuli Leza,’ wene atangapeelwa mulandu pa kuntazwa isi nanti nyina. 6Mu nzila ii mukalenga antu kusula masunde yakwe Leza pamulandu wa ntambi zinu. 7Mwe yasomvi mwe! Ezaya wali ningo lino wasemile pali mwemwe, ati,
8 #
Eza 29:13
‘Antu yaa yakancindika sile mu mazwi yao.
Lelo melenganyo yao yali kutali kufuma kunondi.
9 #
Eza 29:13
Nanti yakumpepa icasilesile,
pano yakasambilizya masunde ya
untunze kwati ali masunde yane!’ ”
Ivintu ivikakowezya umuntu
(Mk 7:14-23; Luk 6:39)
10Lyene Yesu aama iumba kunoli alinena ati, “Uvwini kunondi mwensi, nu kumanya. 11Pasi cimwi cino cikaingila mu mulomo wa muntu cingamukowezya, lelo cino cikafuma mu mulomo wa muntu cene cingamukowezya.”
12Lyene alondezi iiza kunoli yamuzya yati, “Uzye watumanya vino Afaliseo yafwitoka pali vino walanda?” 13Ayanena ati, “Muti onsi uno Tata wa mwiyulu atalemile ulipulwa kumwi ni misisi. 14#Luk 6:39 Lekini yaye. Yene intunguluzi mpafu. Impafu ndi yatungulula impafu yuze, ale zyoili kwene zingaponela mu ciwina.” 15Petulo avwanga ati, “Tunene vino mulumbe uu ukusenula.” 16Yesu ayauzya ati, “Uzye namwe kwene mutilwike? 17Uzye mutamanyile vino consi icikaingila mu mulomo cikaya munda nga cifumila kunzi? 18#Mat 12:34 Lelo vintu vino vikafuma mu mulomo vyene vikafuma mu mwenzo nupya vikakowezya umuntu. 19Pano mu mwenzo mukafuma amelenganyo yankota akamutungulula ku kukoma, kulongozya, nu kucita vintu vya winyi, uwivi, umboni waufi, kutumpwila. 20Vintu vii vyene vikakowezya umuntu. Lelo kulya ni minwe ya mifitalila kutangakowezya muntu.”
Utailo wa mwanaci umwina Kenani
(Mk 7:24-30)
21Lyene Yesu afuma ku cifulo cici aya ku mpanga ya mupipi ni misumba ya Tuli na Sidoni. 22Lyene umwanaci umwina Kenani uwikalanga pipi nu ku cifulo cii aiiza alaizya ati, “Mwene, we mwana wakwe Davidi, ya na mizu kunondi! Mwanane kaci akacuziwa cuze nu mupasi wankota.”
23Lelo Yesu atavwanzile nanti izwi. Alino alondezi iiza yamupapata yati, “Muzinge pano akutwanoola.”
24Lelo wene avwanga ati, “Natumwa sile ku ina Izlaeli, yao ali wa mfwele ziponge.”
25Lyene umwanaci aiiza amufukamila ati, “Mwene ungazwe!”
26Yesu amunena ati, “Cisi cisuma kutoola vyakulya vya ana nu kusumbila yasimbwa.”
27Lelo umwanaci avwanga ati, “Endi, Mwene na yasimbwa kwene yakalya vilakasi vya vyakulya vya ana vino vikapona pa cipango cakwe wino uwayateeka.”
28Alino Yesu nawe amunena ati, “Mwanaci we, utailo wako ukulu cuze! Umacitilwa cino ukulonda.” Lyene mwana wakwe kaci apoziwa pa kasita kwene kako.
Yesu wapozya antu aingi
29Alino Yesu afuma kuku, apita mu nkumba yakwe yemba wa Galile. Lyene akwela umwamba aikala. 30Lyene maumba akulu cuze iiza kunoli, ala yasenzile vilema, impafu, vite, yaciulu nga nayauze aingi a ndema zipusanepusane. Alino yayateka inkolelo yakwe Yesu, nawe ayapozya. 31Caleka antu yonsi yazunguka lino yalola vino yaciulu yakuvwanga, vilema vyapoziwa, vite navyo vikupita, nga na vino impafu zyatandika kulola. Alino yalumbanya Leza wa Izlaeli.
Yesu wimula antu kuluta pa mazimbi yani
(Mk 8:1-10)
32Yesu aama alondezi yakwe kunoli ayanena ati, “Naya na mizu pa antu yaa, pano yali nani manda yatatu lelo yatakweti cakuti yalye. Ntakasi kuti yapite kumwao kwaula kulya cimwi, pano yamaongoka mu nzila.” 33Alondezi yakwe nao yamuzya yati, “Uzye aukwi mu lwanga kwene muu kuno tungazana vyakulya vya kwimula iumba likulu ndi lii?” 34Yesu ayauzya ati, “Uzye mukweti mikate inga?” Nao yaasuka yati, “Tukweti mikate cinimbali, nga nu tuswi tunono.” 35Alino Yesu apeela ilamulo kwi umba kuti likale pansi. 36Lyene atoola mikate cinimbali nu tuswi, nga pacisila ca kutaizya kuli Leza, aimokoola, apeela alondezi yakwe, nao yapela kwi iumba. 37Antu yonsi yalya iikuta. Lyene pacisila alondezi yasola imvungwa izyasile, yazuzya imise cinimbali. 38Na pa antu yano alile pali aonsi mazimbi yani, kwaula kupenda anaci na ana. 39Alino Yesu yapakasyanya na antu, nga apatama mu wato, aya ku mpanga yali pipi nu ku Magadani.
Currently Selected:
Mateo 15: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
