Mateo 14
14
Imfwa yakwe Yoane Kawatizya
(Mk 6:14-29; Luk 9:7-9)
1Mu manda yalya, Helodi kateeka uwamu Galile uvwile mpwelo ya pali Yesu. 2Alino anena nkombe zyakwe ati, “Cumi kwene wii a Yoane Kawatizya uwatazyukuka kufuma ku afwe.” Acino akwatile na maka akucita vinjelengwe. 3#Luk 3:19 Pano nkolelo Helodi wapile ilamulo kuti yaleme Yoane, yamunyepe nu kumuyalila mu ng'anda yaminyololo. Wacisile cii pamulandu wakwe Helodia muci wakwe Filipo mwina wakwe. 4#Levi 18:16; 20:21; Luk 3:19 Pano Yoane wanenanga mwene Helodi ati, “Citaine ni sunde kutwala Helodia!” 5Helodi walondanga kukoma Yoane, lelo oofile Ayuda pano yene yataile vino Yoane akasema.
6Pa wanda wa kuzangila kuvyalwa kwakwe Helodi, kwali cimulo. Alino umwana umwanaci wakwe Helodia wizile acina inkolelo yakwe yao amilwe ku cimulo. Helodi nawe camuzanzizye cuze, 7cakuti amulaya nu mulapo ati, “Nalaya nu mulapo ukuti namakupeela consi cino umalenga!” 8Lyene nyina anena mwana ati, “Yanga kamulenge uti, ‘Umpeele ndakai kwene umutwe wakwe Yoane Kawatizya pa mbale.’ ” 9Cii, calenzile mwene kuya nu ulanda cuze. Lelo pamulandu wa mulapo wakwe uno wacisile pa manso yakwe yao amilwe ku cimulo, apeela ilamulo ku yaomvi yakwe kuti yapeele mwana cino akulonda, 10nga yaya mu ng'anda yaminyololo, yaputula umutwe wakwe Yoane. 11Lyene yaleta umutwe pa mbale, yaupeela ku mukazyana, nawe autwala kuli nyina. 12Na alondezi yakwe Yoane iiza yasenda icala cakwe yaya yazika, nga yapita yaya yanena Yesu.
Yesu wimula antu kuluta pa mazimbi yasano
(Mk 6:30-44; Luk 9:10-17; Yoa 6:1-14)
13Lino Yesu uvwa icaticicitika, apaatuka apita mu wato, aya ku cifulo cili cele. Lino maumba yuvwa ukuti watapita, yafuma mu misumba yapita ni ngazo, yamulondela. 14Lino Yesu wapatuka mu wato, alola iumba likulu cuze, nga aya na mizu, apozya yao ali alwale. 15Insita ya manguzi, alondezi yakwe yapalama kunoli, yamunena yati, “Kuno uku lwanga, nupya ilanzi lyatemba. Nena antu yapite, kuti yaye mu mizi yakaikalile vyakulya.” 16Yesu aasuka ati, “Cisyakulondekwa kuti yapite. Mwemwe kwene yapelini vyakuti yalye.” 17Nao yamunena yati, “Kuno tukweti sile mikate isano nga ni nswi ziili.” 18Nawe ayanena ati, “Letini kunondi.” 19Alino apeela ilamulo ku antu kuti ikale pa masote. Alino Yesu atoola mikate isano ni nswi ziili, alingamila kwiyulu, ataizya kuli Leza. Lyene amokoola mikate, nga apeela alondezi yakwe nga nao yapela antu. 20Onsi yalile iikuta. Lyene alondezi yasola imvungwa izyasile, yazuzya imise ikumi na iili. 21Na pali yao alile pali manye aonsi mazimbi yasano, kwaula kupenda anaci na ana.
Yesu wapita pa manzi
(Mk 6:45-52; Yoa 6:15-21)
22Manguzi kwene yalya Yesu anena alondezi yakwe kuti yapatame mu wato yamukolelele ku mbalama yuze yakwe yemba. Lelo wene asyala akunena antu kuti yapite kumwao. 23Pacisila lino waleka maumba yapita, apita aya akwela mwamba ku kupepa wenga. Lino kakuku katola wali wenga sile kweneko. 24Lelo uwato wene wali patali ni cituntu, ala ukupumwa na maimbi, pano cipupu cafumanga kuno uwato wayanga.
25Lyene pa macaca Yesu aiiza kunoyali ala akupita pa manzi. 26Lelo lino alondezi yamulola akupita pa manzi, yuvwa intete. Alino yapunda yati, “Umuyeye!”
27Lyene lilyo kwene Yesu nawe avwanga kunoyali ati, “Posyini! Anene! Mutoopa!” 28Lyene Petulo amunena ati, “Mwene nda wewe, unene kuti nize kunuli pa manzi.” Yesu nawe amunena ati, “Iza.”
29Alino Petulo afuma mu wato, apita pa manzi, alungama kuli Yesu. 30Lelo lino walola vino kwaya cipupu, auvwa intete, atandika kutuwila, nga akuta ati, “Mwene, ntuule.” 31Lilyo kwene Yesu atambika ikasa amulema. Alino amunena ati, “We wa utailo unono, uzye pacani watwisika?” 32Lyene oili yapatama mu wato, nga cipupu cilala. 33Alino alondezi yano ali mu wato, yamufukamila, yavwanga yati, “Cumi, wewe Mwana wakwe Leza.”
Yesu wapozya alwale ku Genesaleti
(Mk 6:53-56)
34Lyene lino yalamba mbalama yuze, yakooka pa Genesaleti. 35Lino antu amu mpanga ilya yalooka ukuti a Yesu, yamanyisya antu konsi konsi, vino wene wataiza nga nao yaleta alwale kunoli. 36Alino yaletela Yesu alwale yao onsi, nga yamulenga kuti aleke alwale yaleme nanti kwi sempele lya cizwalo cakwe. Na yano onsi alemileko yapoziwe.
Currently Selected:
Mateo 14: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
