Mateo 11
11
Yoane Kawatizya watuma inkombe kuli Yesu
(Luk 7:18-35)
1Pacisila lino Yesu wamala kusunda alondezi yakwe ikumi na yaili, afumako ku cifulo cici, aya ku kusambilizya nu kukosola mu misumba yuze iyaya mu Galile.
2Lino Yoane kawatizya wali mu ng'anda yaminyololo uvwile ivya milimo yakwe Klistu. Alino atuma alondezi yakwe kuya uzya yati, 3“Uzye wewe uli wino Yoane walanzile ukuti akwiza, nanti tumalolelanga muze?” 4Yesu ayanena ati, “Pitini mukanene Yoane vintu vino mukuuvwa nu kulola. 5#Eza 35:5; 61:1 Impafu zikulola, vilema vikupita, yakwe tembwe yakupoziwa, yacipuuli yakuuvwa. Afwe yakututululwa, ni Landwe Lisuma likukosolwa ku apina. 6Alongo ayao asikuntwisika.”
7Lino alondezi yakwe Yoane yaswililangamo, atandika kunena maumba vya pali Yoane ati, “Uzye mwaile ku lwanga kukulola cani? Uzye mwaile kukulola umuntu muzakantike wa mafwa akupungaila nu muza? Awe! 8Ndi cisi vivyo uzye mwaile kukulola cani? Uzye umuntu uwazwite insalu ziyembe? Awe! Antu akazwala wakwe vivyo ayao akazanwa mu masano. 9Lyene nenini, uzye mwaile kukulola cani? Uzye akasema? Endi, namunena mwaweni alusile kasema. 10#Mal 3:1 Pano Yoane awino calembwa mu malembelo pali aliwe cati, Leza wavwanzile ati, ‘Ndatuma inkombe#11:10 inkombe: Kuli kuti wikolo wino watumwa kuyafisya mazwi. yane, ikukolelele kuti ikateyanye inzila yako.’ 11Cumi namunena vino, mu antu yonsi avyalwa mu nsi ii kusi umuntu wino alusile Yoane Kawatizya. Lelo wino ali munono mu Wene wa mwiyulu, wene ali mukulu kuluta Yoane. 12#Luk 16:16 Kufuma mu manda yakwe Yoane Kawatizya kufika na ndakai, antu yakalwisyanya nu Wene wa mwiyulu, na antu ya maka alio yakuupoka. 13#Luk 16:16 Ivyalembwa mu mpapulo zyakwe Mose na zyakwe yakasema vyakosozilwe kufika mu manda yakwe Yoane Kawatizya. 14#Malg 3:23; Mat 17:10; Mk 9:11 Lyene ndi mukasi kutaila mazwi yano alembwamo, Yoane ali Eliya kwene, wino ukwiza kwakwe kwasowilwe. 15Ali na matwi yakuuvwa auvwe!
16“Uzye ningakolanya antu amu mukulo uu kuli cani? Yakolana wa ana atenzi mwi sokoni, ala yakulaizya yakuti, 17‘Twamulizizye vingwengwe vya pa winga, lelo mutacinyile! Twalaezile ni mpoma zya ndosya, lelo mutalosizye!’ 18Pano Yoane wizile, aizilizya ukulya nu kumwa waini, nga nao yati, ‘Ali nu mupasi wankota.’ 19Mwana wa Muntu wiza, akalya nu kumwa, namwe mukuti, ‘Lolini umuntu wii! Wene wapunuka nupya umukolesi. Wene acuza wakwe yakasonkesya na yakaifya.’ Lelo antu yalalola ukuti amano yakwe Leza alungame ndi yalola milimo yakweyo.”
Kalanda ku antu amu misumba asi na utailo
(Luk 10:13-15)
20Lyene Yesu atandika kupeela mulandu ku antu amu misumba muno wacisile vinjelengwe vingi, pano antu ali mwenemo yatazenzwike. Lyene avwanga ati, 21#Eza 23:1; Eze 26:1; Yow 3:4; Amo 1:9; Zak 9:2 “Kalanda ku antu amu Kolazini! Kalanda ku antu amu Betisaida! Ndi cakuti vinjelengwe ivyacisilwe munomuli vyacisilwe nu ku Tuli na Sidoni, antu ya kuku yange yazwale masaaka nu kuiswela itwi kuti yalange vino yati yazenzuka. 22Lelo namunena nati, pa wanda wa upinguzi, mwemo mulavunukwa kuluta antu amu Tuli na Sidoni. 23#Uta 19:24; Eza 14:13 Mwe antu amu Kapenaumu uzye mukwelenganya vino mungakweziwa kwiyulu kupela? Awe! Mulasumbwa pansi kuzimo! Pano ndi vinjelengwe ivyacisilwe munomuli ivyacisilwe mu Sodoma, Sodoma nga acilipo ni lelo. 24#Mat 10:15; Luk 10:12 Cumi namunena nati, pa wanda wa upinguzi Leza alaya na mizu cuze pa kuvunuka antu amu Sodoma kuluta mwemwe.”
Yesu ali upuzo
(Luk 10:21-22)
25Pa kasita kaka Yesu avwanga ati, “Tata, Mwene wi yulu ni nsi! Nakutaizya pano watusokolola ku antu atasambilila cino wafisa ku antu yamano na asambilile. 26Endi Tata, cii acino walondanga kuti cicitike.
27 #
Yoa 1:18; 3:35; 10:15 “Tata wampeela vintu vyonsi. Pasi nanti wenga uwamanya Mwana suka sile Tata, nupya pasi nanti wenga uwamanya Tata suka sile Mwana, nga na yao yonsi yano Mwana wasola kuti amusokolole kunoyali.
28“Izini kunondi, mwensi mwe yatonte nupya anyomelwa, nani namamupeela upuzo. 29#Yel 6:16 Zwalini ikoli lyane, musambilile kunondi, pano nene wa mutembo, nupya nkaicefya mu mwenzo, nga mumazana upuzo mu myenzo inu. 30Pano ikoli lyane lino nkazwika ilyangupale, ni cisendo cino nkatwika citanyooma.”
Currently Selected:
Mateo 11: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
