Ezaya 3
3
Icimvulunganya umu Yelusalemu nu mu Yuda monsi
1Silolini lyene mwe! Yawe Wamaka yonsi,
wasya apokolole ivintu vyonsi pyu,
vino aina Yelusalemu na ina Yuda yikalila mwenemo.
Wasya apokolole na vyonsi vino antu yikalila,
ivikayazwilizya nu kuyazwilizya.
Wasya apokolole amanzi ni vyakulya,
2impalume ni vita, yakapingula na yakasema,
yakasapoola ni vilolo,
3yamusika na yakapitao, yasing'anga yonsi,
yafundi yonsi acenjele kumwi na yayo
akalanda ivingiza uku nkolelo.
4Yakalume ali yano Yawe alaleka kuti yace yayateeka,
yano yatacili yakwate na mano.
5Antu yalacuzyanya, umwina nu mwina,
umwinipamba wenga nu muze.
Ana yanono yalakatukila aikolo.
Iviwelewele vya antu vilasangukila yasimucindikwa.
6Kuliza insita ino amu lupwa ululi longa kwene,
yalasola umwi apa mwao nu kumunena iyati,
“Nga vino awewe sile ukweti icakuzwala icicindame.
Fwandi awewe kwene ulinzile waya simatongwa
apa mwitu, uteeke ni vitalang'anda vya matongwa yaa!”
7Lelo wene alaasuka mu wanda ulya ati,
“Ala mwe! Nemo insi nu mulembo,
umwane musi icakulya nanti insalu.
Fwandi mutancita intunguluzi ya antu.”
8Ala umu cumi, Yelusalemu alaongoloka,
Yuda alawa, pano imivwangile yao,
ni vicitwa vyao vikacuzya Yawe,
yakamutukola apaswe.
9Imilolekele apa manso yao, ikuyasinila sile.
Yasifisama foo apa kwifya, yakucitila sile ivintu uku mufulo
ndi vino aina Sodoma yacitanga.
Iye mwee! Icumi yailetelela sile.
10Antu akacita ivyaololoke yene cilayazipila.
Yalailyokezya ivizao vya milimo yao.
11Kalanda ku antu aipe! Yene yalacilola!
Yalalipilwa apa uyi uno iminwe yao yacita.
12Ana yanono yalamwilikizya,
na anaci nayo yakamuteeka.
Mwe antu yane yakateeka inu yamuponzya,
yonona ni nzila zinu.
Yawe wapingwila antu yakwe
13Yawe watakatuka apa cilimba cakwe ica upinguzi.
Wene watakatuka nu kulolwela antu yakwe.
14Yawe waama ivilolo vyakwe uku cilye
pamwi ni ntunguluzi zya antu yakwe,
nga avwanga ati,
“Amwemwe kwene mukaonona icalo ca matingi,
nu kufisa ivyuma vya alanda vino mwasampa.
15Uzye apacani cino mwapokela antu yane insambu?
Uzye umulandu cii uno mukuliila apina amasuku pa mutwe?”
Ivyavwanga Umwene, Yawe Wamaka yonsi.
Anaci yavilumba yalasyama
16Yawe wavwanga wati,
“Apamulandu wakuti anaci amu Zioni yakwatisya ivilumba,
yakupita ala yati yatongomola utusingo twao,
nu kuzyongola amanso yao,
yakumeka pakupita intampulo izitali
nu kulizya insaawa uku ngazo zyao,
17icilaleka ukuti Yawe ayaletela yamuseela uku mitwe yao.
Yawe alaleka yakwate amapala.”
18Mu wanda ulya Yawe alapokolola insambo,
ingala zyao na maelena ku matwi.
19Alayapokolola amaukasi, ivitambala,
20insawa zyaku maulu pamwi ni misipi,
ni misazi ya mafuta acinunu cisuma kumwi ni mpimpi,
21imbalaminwe, ivipini vyaku mpuno zyao,
22ivyakuzwala vya mutengo,
ivikuwalo, ivitenge nu tuvyola kwene,
23ivilola, insalu iziyembe izyamutengo,
ivya kuikoweka uku mutwe kumwi ni vyandaluwa.
24Apali icinunu icisuma, palaya akafungo.
Apanyepwanga umusipi, palaya umwando.
Apali ulunyele ulutelepe, palaya ulukuzu.
Apali insalu zyamutengo, palaya ulusamu.
Apali ukuyemba kwa mwili
palaloleka ivyawinyi ivyakuleta insonyi.
25Ivita vyako vilafwa uku lupanga,
na asilika yako umu nkondo.
26Impongolo zyako zilalila akalanda,
nu kutulula impooma. Alino nawe we Zioni,
ulikala pansi ale ukungumile.
Mambwe-Lungu Bible © The Bible Society of Zambia, 2013