Ezaya 2
2
Ulongo lwape
(Mik 4:1-3)
1Kwali kweneko amazwi yano Leza wanenyile Ezaya,
umwana umonsi wakwe Amozi,
apamulandu wa Ayuda nga na pa ina Izlaeli.
Amazwi yayo akuti,
2“Limwi umu manda akusyalikizya umwamba apa kuulilwa
Ng'anda ikulu yakwe Leza iya kumpepelamo,
ali lino ulatalimpisya ukuluta imyamba yuze yonsi.
Na antu ya mitundu yuze ali kuno yalaomokela.”
3Yalavwanga nu kuti, “Tuyini twapita
tutumbele umwamba wakwe Yawe,
apakuti aye akatusunde vino tuli nu kucita,
apakuti twalondela mwi kula lyakwe.”
Umu cumi amasunde yakwe Yawe yakafuma mu Yelusalemu,
pano umu Zioni ali muno akapeelela antu yakwe amalango.
4 #
Yow 3:10; Mik 4:3 Alapingwila imitundu yonsi iya antu,
nupya aliwe alakaulula imitundu ivule wakwe cimwi,
yace yasuke yatole ivipeni nu kusulamo amase,
nga na masumo yao nayo yakasulemo ivikwakwa.
Kutalatala nupya kuyeko umutundu ulakatukila uuze,
nanti ukusambilila ivyankondo.
5Mwe amu mupanda wakwe Yakobo,
si izini twapita umu luswepo luno Yawe watupeela.
Leza aliza acite ulungami
6Umu cumi, watutazyela antu yako,
amu mupanda wakwe Yakobo.
Mu mpanga mwatimuzula yasin'ganga yaufi,
ukufuma uku ufumondaka, uku mpanga ya ina Filisti.
Antu lyene yambukilwa ni misango ya inamasi.
7Mu mpanga yao mwatimuzula siluva na zaabu,
icakuti icuma cao caticivulilako.
Imfwalasi na maceleta navyo anyanya.
8Utuluwi mu mpanga yao twatituvulisya,
lyene yakufukamila imilimo yao, aino yakupepa,
yakufukamila ni vintu vino yaipangila ku minwe yao.
9Antu yasilesile alio yalayaponya pansi.
Nawe we Yawe, utakezye ukuyatuula!
10 #
Umb 6:15; 2Tes 1:9 Yaleezya ukufisama umu vimawe,
umu macele, umu myamba nanti
ukwimba vipolowe umwakuti yangafisama,
apamulandu nu kuutuka ukali wako we Musambazi!
11Akuno uli uwanda umwi umu pipi,
uno antu avilumba yalafusiwa amanso yao,
uwanda uno ivilumba vyao vilasila.
Awewe wenga sile we Yawe,
wemuno ulacindamikwa mu wanda ulya.
12Pano apa wanda sile uo kwene,
ali pano we Yawe Wamaka yonsi ulanyata avilumba yonsi,
kumwi na amisuula yonsi.
13Ali wanda kwene uno ulononela penepo imiti,
imikelide yaku Lebanoni kumwi
ni mioko yonsi iyaya ku Basyani.
14Ali wanda kwene uno ulapasaula utwamba tonsi
kumwi ni myamba itali.
15Alino nu koomolola impungu zyonsi,
izitali kumwi na malinga yonsi akome.
16Ali wanda uno ulauunzya ivimawato vyonsi
vyaku Alabya ivikasimulisya apa luzi.
17Ali wanda uno ivilumba vya muntu ali wensi
na munyele alamukangoka.
Mu wanda ulya ali lino wewe wenga mpo
we Yawe yalakulumbanya.
18Lyene kulaya ali kulowelela kwa tuluwi tonsi.
19Antu yayo yalafisama umu macele,
umu myamba nanti ukwimba ya polowe,
umwakwezya ukufisama mwenemo.
Cico cilaya apamulandu wakuutuka amaka yako,
nu kucindama kwako apa nsita ino uliza umu kutensya insi.
20Umu wanda ulya antu yalavwintila utuluwi twao,
twakwe siluva na zaabu kuli yatunko nu tususu,
utuluwi tuno yaipangile ni minwe yao ukuti yangatufukamila.
21Lino wemo we Yawe uliza uku kutensya insi,
antu yene yalafisama muli yapolowe nu mu macele,
umu myamba apa kuutuka sile ukali wako nu ucindami wako.
22Ali cino fwandi mutaezya ukutaila umu muntu wasilesile,
wiyo uwakwata sile umupu ukufuma umu mpuno zyakwe.
Ata see, nga nawe uwacani? Pano wene uwakufwa sile!
Mambwe-Lungu Bible © The Bible Society of Zambia, 2013