Oseya 2
2
1Pamulandu kwene uu unene aina Izlaeli uti, “Mwemwe antu yakwe Yawe,” nupya uyanene uti, “Yawe wamutemwa,”
Aina Izlaeli yakoline nu mwanaci asi mutailwe
2“Kalipila nyoko, si ule umukalipile,
pano wene asi umuci wane,
nga nani insi iya.
Mu mupapate kuti ate uzelele,
nga nu kuntatailwa.
3Ndi cakuti atacisile cico, ale lyene ndamuzula,
pakuti aikale tupu ndi vino wali lino wavilwe.
Ndaleka aye wa lwanga,
nupya alaya wa musili uumalale,
nga ndamukoma ku lusala.
4Ntalaya na mizu ku ana yakwe,
pamulandu wakuti yene ana amu uzelele.
5Nyina nawe acizelele asi na nsonyi.
Wene wayaviile mu kucita vyansonyi.
Wavwanzile ati, ‘Ndalondelela akambwe yane
yayo akampeela icakulya na manzi,
na pamba, ni nsalu itelepelele,
na mafuta ya miolivi nga na waini.’ ”
6Caleka nemo ndasaka inzila yakwe ni myunga.
Nupya ndamukuulilila icimpinda,
kuti nupya atakapite umu nzila zyakwe kwene.
7Wene alasimwilila akambwe yakwe,
lelo atalayazana. Afuma akuyalondalonda,
lelo ukwaula kuyazana.
Lyene alavwanga ati,
“Ndaswilila ku wane wilya ndi vino nacisile ilyankolelo,
pano apa nsita ilya natenzi ningo lino nali na aliwe,
ukuluta vino ntenzi pali ndakai.
8Wene atamanyile ukuti
anene nkamupeela ingano,
waini umupya nga na mafuta.
Wene atamanyile ukuti anene nkamupeela
siluva na zaabu umuvule wakwe cimwi,
vivyo vino antu yayo yakapangila
amaunkolanya yakwe Baali.
9Caleka ndamupoka ingano zyane
apa nsita ya uzombozi nga na waini wane
apa nsita yakufena amatingi. Ndamupoka pamba wane
nga ni nsalu itelepelele vivyo vino wali nu kuzwala.
10Caleka ndakai namamusya tupu
pa manso ya akambwe yakwe.
Kusi umuntu nanti wenga alamufumya mu makasa yane.
11Namalesyanya ukuzevya kwakwe konsi pyu,
ukwa vimulo vya cila mwaka,
nu kwa ndoleko ya mwezi.
12Ndonona imiti yakwe ya miolivi ni misamvu kwene
iyo ino wene wavwanzile ukuti,
ali malipilo yano akambwe yakwe yamulipa.
Ndaisenula iye imisitu,
nga inyama zya mpanga zilailya kuku kwene.
13Ndamuvunuka pamulandu wakuti wene ocile ubani
kuli Tubaali mu manda kwene yalya auzevyo.
Wene waiyemvizye ni mbalaminwe
nga ni viyembelo vya mutengo ukulu cuze,
nga alondelela akambwe yakwe.
Lelo nemo atanjiwisye, awe.
Avino Yawe wavwanga.
14Caleka, namalyombeleka umwanaci wiyo,
namapita nawe ku lwanga nu kulanda nawe mu mazwi amutembo.
15 #
Yos 7:24-26
Kuku kwene akuno ndamuwezezya vyalo vyakwe vya matingi.
Ndasenula Cifoloma ca Ntazi
kuti ciye impongolo ya upaalilo.
Nga kuku kwene akuno wene alazumila kunondi
ndi vino wazumile lilya lino wali umwance,
lino wene wafumile mu Eguputo.
16Mu wanda ulya apakungama ulangama uti, ‘Wane.’
Utalatala ungame uti, ‘Baali wane.’
Kuu kuli kulanda kwakwe Yawe.
17Ndamulesya kuti atakatale aezye ukulumbula
amazina yakwe Tubaali nupya.
Endi, antu yatalatala yame apa mazina yayo.
18Mu wanda ulya ndacita upangano
ni nyama zya mpanga,
ni vyunyi vyamu lwelele, nga ni viumbwa ivikasela pansi,
kuti vitakacitile antu yane iviipe.
Nupya ndasisya ulapwa, lupanga,
kumwi ni vyanzo vyuze vyonsi vya nkondo,
nga nu kuvisisya umu mpanga iyo,
kuti yene yikale umi wa mutende.
19We Izlaeli ndakutaisya
kuti uce uye umuci wane mpaka umuyayaya.
Ndakutaisya mu ulungami, mu wololoke,
nu mu lukundo nga nu luse.
20Ndakutaisya muli ucumi,
nga nawe ulamanya ukuti nene indi Yawe.”
21Yawe wavwanga wati,
“Mu wanda ulya ndaasuka amapepo ya antu yane aina Izlaeli,
ni mvula ilatonya pa mpanga ya pano pansi.
22Umusili nao ulapela uzombozi wa ngano,
waini mupya na mafuta,
amatingi nga ni miolivi.
23 #
Lom 9:25; 1Pet 2:10 Nemwisikulu ndiika antu yane aina Izlaeli mu mpanga ilya kuti yaye akwane.
Ndalanga ulukundo kuli wiyo akaamwa ukuti ‘Asi mukundwe wane.’
Antu yano yakaamwa ukuti ‘Yasi antu yane,’
ndayanena inti, ‘Mwemwe antu yane.’ ”
Mambwe-Lungu Bible © The Bible Society of Zambia, 2013