Utandiko 50
50
1Lyene Yosefu ainama inkolelo nu kukumbatila isi, nga alosya nu kutonsola pa mpumi ya cala. 2Alino Yosefu apeela malamulo kuli yasing'anga, aomvi yano amuombelanga kuti yapake icala amafuta akulesya kuola kwa cala cakwe isi. Yasing'anga iyacita ndi vino Yosefu wayanenyile. 3Casumvile amanda amakumi yani, pano yali ili nsita iyapimwa iyakupaka icala amafuta akulesya kuola. Aina Eguputo yalosya Yakobo amanda amakumi cinimbali.
4Lino insita yakulosya yasila, Yosefu atuma aomvi ya kwisano kuli Falao ati, “Napapata ntwalilini amazwi ya kuli Falao muti, 5#Uta 47:29-31 ‘Lino tata wali pipi nu kufwa, wandenzile kuti indape kunoli kuti ndamuzika mwi lindi lino wateyanya ku mpanga ya Kenani. Caleka napapata lekini nkazike tata, ndawela.’”
6Lino Falao uvwa kulenga kwakwe Yosefu aswilizya amazwi kuli Yosefu ati, “Pitanga kazike so wakwe vino walafile ukuti ulacita.”
7Caleka Yosefu apita ku kuzika isi. Yacilolo yonsi yakwe Falao, inkombe, nga na ikolo yonsi acindame amu Eguputo yapita na Yosefu ukuya zika isi. 8Amu ng'anda yakwe Yosefu, aina yakwe nga na asyala yonsi amu ng'anda yakwe Yakobo yapita nawe. Suka sile ana yao anono asyazile mu muputule wa Gosyeni ni mfwele, imbuzi ni ng'ombe zyao. 9Aonsi ali mu maceleta na onsi akwezile pa mfwalasi yonsi iyapita nawe. Lyali iumba likulu cuze.
10Lino yafika pa lwano lwakupuulila ingano ku cifulo ca Atadi, ku ufumondaka wakwe Yodani yalosya nu kupoma cuze pa nsita itali kulingana nu lutambi. Pa manda cinimbali Yosefu ala akucita ntambi zya ndosya pa Atadi. 11Lino aina Kenani yalola ukuti antu yalya yakulosya pa Atadi, yavwanga yati, “Owe kalanda we! Ala indosya nu ukulu ino aina Eguputo yakweti!” Pamulandu kwene uu cifulo ci catemilwe izina lyakuti Abeli Mizilaimu.#50:11 Abeli MIZILAIMU: Kuli kuti kulosya kwa ina Eguputo.
12Caleka ana yakwe Yakobo aonsi iyacita wakwe vino Yosefu wapeezile ilamulo. 13Iyasenda cala cakwe ku mpanga ya Kenani nga yacizika mwi cele mu musonso waku Makipela, lwaku ufumondaka wakwe Mamule, mu calo cino Abulaamu wakazile kuli Efuloni mwina Hiti kuti ciye ku matawa. 14Pacisila ca kuzika isi Yosefu aswilila ku Eguputo pamwi na ina yakwe na yonsi yano apisile nawe ku ndosya ku kuzika isi.
Yosefu waswilizya ukunena aina yakwe kuti yatuvwa intete
15Pacisila ca ndosya yakwe Yakobo, aina yakwe Yosefu yuzyanyanga yati, “Uzye ndi Yosefu acili akwelenganya pali vino twamucisile nupya limwi akulonda kulandula, uzye tulacita cani?” 16Caleka yatuma amazwi kuli Yosefu yati, “Lino tata atacili afwe, 17watunenyile kuti tungalenga uwelelo kunuli we Yosefu, twapapata tukulenga uwelelo pamulandu uno swe anyonko twatazile kunuli. Ndakai twapapata twelele pa kuponga kwitu, swe aomvi yakwe Leza wakwe so.” Lino Yosefu wapokelela amazwi yaa alila cuze.
18Lyene aina yakwe Yosefu aisikulu yaya nga yafukama pansi inkolelo yakwe nga yavwanga yati, “Asweswe twaileta kunuli wa azya yako.”
19Lelo Yosefu ayanena ati, “Mwe inane mutuvwa intete, nemo ntanganjike mu cifulo cakwe Leza. 20Mumine akapi ukucita uyi kunondi, lelo Leza ausenula ukuya usuma, pakuti atuule umi wa antu avule yano ali nu umi pa wanda wilelo. 21Mutoopa nanti cimwi. Ndamusunga mwensi pamwi na ana inu. Caleka aswilizya ukuyanena na mazwi yakuyayela mizu nga yateeka imyenzo.”
Imfwa yakwe Yosefu
22Yosefu atwalilila ukwikala mu mpanga ya Eguputo pamwi na amu ng'anda yakwe isi Yakobo. Yosefu wafwile ala ali ni myaka umwanda onga ni ikumi. 23Yosefu wali mumi kufika nalino ana yakwe Efulemu yali na ana yano ali vizikulula kunoli. Nupya mu ng'anda yakwe apokelela vizikulula navyuze muli Makili, umwana umonsi wakwe Manase. 24Yosefu anena aina yakwe ati, “Indi pipi nu kufwa, lelo Leza alamusunga nu kumutungulula ukufuma mu mpanga ii ukuya ku mpanga ino walavile kuli Abulaamu na Isaki, nga nakuli Yakobo.” 25#Kuf 13:19; Yos 24:32; Aye 11:22 Lyene Yosefu anena aina yakwe kuti yalape nu mulapo. Ayanena ati, “Lapini kunondi, ukuti lino Leza alamutungulula ku mpanga ilya, mulasenda amafupa yane ukufuma kuno.” 26Caleka Yosefu wafwile ala ali ni myaka umwanda onga ni ikumi. Lyene iyapaka cala cakwe amafuta akulesya kuola, nga yaciika mu mbokosi mu Eguputo.
Currently Selected:
Utandiko 50: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
