Kufuma 2
2
Kuvyalwa kwakwe Mose
1Lyene mu nsita ilya umonsi umwi uwamu mupanda#2:1 MUPANDA: Uwamu mupanda kuli kuti uwamu luko. wakwe Levi atwala umwanaci uwamu mupanda kwene ulya wakwe Levi. 2#Mil 7:20; Aye 11:23 Nga umwanaci wilya asenda indilwa nga aca amuvyalila umwana umonsi. Lino umwanaci walola ukuti umwana umusuma cuze, amufisa pa myezi itatu. 3Lelo lino camutalila kusunga inkama, umwanaci wilya atoola cimponda icalukwa na matete nga apomelako manenekela kuti amanzi yataingilamo. Alino aikamo umwana wilya, nga aya amufisa mu mpunga zitali mu mbali ya luzi. 4Alino nyinalenzi wa mwana wilya, aimilila katalamukila kuti alole cingacitika ku mwana.
5Lyene pa nsita imwi mukazyana umwana wakwe Falao wilya aya ku luzi ku kufulala. Lino mukazyana wilya akufulala, aomvi yakwe nayo yalyatokela ku cituntu.
Lyene mukupumikizya alola cimponda mu mpunga, nga atuma muomvi wakwe umwanaci kuti akalete cimponda cici kunoli. 6Lyene lino watupula alola ukuti muli umwana umonsi, nga auvwila umwana wilya ulanda pamulandu wakuti ala akulila. Alino avwanga ati, “Nanti ciye uli umwana wii uwa Muyebulai.”
7Lyene nyinalenzi wa mwana, kanya, auzya mukazyana umwana wakwe Falao ati, “Uzye ntange mpite nkanene umwanaci umwi Muyebulai kuti aakonsezya umwana wii?”
8Nawe aasuka ati, “Napapata simula, kacite vivyo kwene.” Caleka mukazyana apita aya aiza na nyina mwana. 9Nga umukazyana umwana wakwe Falao anena umwanaci wilya ati, “Senda umwana wii, uwamundelela nu kumonsya, nga nani ndakulipila.” Caleka umwanaci wilya asenda umwana, nga aamulela. 10#Mil 7:21 Pacisila, lino umwana wakula, umwanaci wilya amuleta ku mukazyana umwana wakwe Falao. Alino nawe atoola umwana wilya amucita ukuya umwana wakwe umonsi. Aelenganya ati, “Namuzuulwile mu manzi. Caleka namamutemela izina inti a Mose#2:10 MOSE: Izina lyamu Ciyebulai likasenula ukuti kuzuulula.”
Mose wapuukila ku Midyani
11 #
Mil 7:23-28
#Aye 11:24 Lino Mose wakula, uwanda umwi aya ku kutandalila antu yakwe, Ayebulai. Nga alola vino aina Eguputo yakupatikizya Ayebulai ukuomba imilimo ikome. Alola na vino mwina Eguputo akuma Muyebulai, wenga uwamu antu yakwe. 12Mose acelecensya monsi, nga lino walola ukuti kusi umuntu nanti umwi akumulola, akoma mwina Eguputo. Alino atoola icala cakwe acizika mu lusenga. 13Uwanda walondelela Mose aswilila ku cifulo icili conga kwene, nga alola aonsi yaili Ayebulai yakulemanila. Alino Mose auzya wino uwasonsile muze ati, “Uzye pacani cino ukuma Muyebulai muzo?”
14Muntu wilya aasuka Mose ati, “Uzye aweni uwakupeela maka akupingula panotuli? Uzye ukulonda unkome wakwe vino wakomile mwina Eguputo wilya?” Lyene Mose auvwa intete, nga aelenganya ati, “Antu yatiyamanya vino nacisile.” 15#Mil 7:29; Aye 11:27 Lino Falao uvwa icacitike, alonda ukukoma Mose. Lelo Mose apuukila ku mpanga ya Midyani akuno aya aikala. Uwanda umwi Mose aikala pansi pipi ni cifula.
16Nga alola akazyana cinimbali, ana yakwe Yetulo simapepo waku Midyani, yakwiza. Yene iizile ku kusemba amanzi kuti yazuzye milangu, nga yamwesye imfwele ni mbuzi zyakwe isi. 17Lelo aonsi yamwi yakacema yiiza yazinganya akazyana yalya. Lyene Mose ayatasya nga amwesya iviteekwa vyao amanzi. 18Lino akazyana yalya yaswilila kwi taalu lyakwe isi, isi ayuzya ati, “Yanamwe, uzye pacani cino ilelo mwawela zuwa?”
19Nayo yaasuka yati, “Aonsi yamwi yakacema yali yatuzinganya. Lelo mwina Eguputo umwi wali watutaasya, nupya wali watusembela amanzi, nga wali wamwesya ni viteekwa vitu.”
20Yetulo auzya ana yakwe ati, “Uzye pacani cino imwamusya umuntu wiyo ku cifula? Swililini mukamwame aize alye cakulya naswe.”
21Caleka Mose azumila ukwikala nayo kuku kwene. Yetulo amupeela Zipola umwana wakwe kuti aye umuci wakwe. 22Zipola avyalila Mose umwana umonsi. Mose aelenganya ati, “Nene mwinamasi mu mpanga ii.” Caleka atemela umwana wii, izina ati a Gelisyomu.#2:22 GELISYOMU: Izina lya Ciyebulai likasenula ukuti mwinamasi.
Ucuzi wa antu yakwe Mose
23Lino papita imyaka ivule, umwene wilya waku Eguputo afwa. Lelo aina Izlaeli ala yacili yakucula mu uzya, nga inkuta yao yuvwika kuli Leza. 24#Uta 15:13, 14 Leza auvwa kuteta kwao, nga atilile upangano wakwe uno wacisile na Abulaamu, na Isaki, na Yakobo. 25Leza alola ucuzi wa ina Izlaeli, nga asakamala kuti ayazwe.
Currently Selected:
Kufuma 2: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
