Kufuma 1
1
Kuzunyiwa kwa ina Izlaeli mu Eguputo
1 #
Uta 46:8-27
Yaa ali mazina ya ina Izlaeli aonsi yano yaile na Yakobo ku Eguputo, cila muntu na amu ng'anda yakwe. 2Lubeni, Simeoni, Levi, Yuda, 3Isakali, Zebuluni na Benjamini. 4Dani na Nafutali, Gadi na Asyeli. 5Impendwa ya antu yonsi afumile mu mupanda wakwe Yakobo yali amakumi cinimbali. Yosefu wene walanga wakolela mpiti ku Eguputo. 6Mu kupita kwa nsita Yosefu na ina yakwe nga na asyala yonsi amu mukulo ulya iyafwa. 7#Mil 7:17 Lelo vizikulula vyao, aina Izlaeli, yavyala ana avule cuze. Impendwa yao ikula cuze yaya na maka, cakuti yalimba impanga yonsi ya Eguputo.
8 #
Mil 7:18
Lyene umwene muze wino atamanyile nanti cimwi pali Yosefu, apyana atandika kuteeka mu Eguputo. 9Umwene mupya anena inkombe zyakwe ati, “Lolini, aina Izlaeli yaa impendwa yao yatikula cuze nupya yakweti maka wakwe cimwi cakuti cikuleta ingofyo kunotuli. 10#Mil 7:19 Ndi nkondo yaponyile antu yaa yangaazwana na anisi itu kuti yatulwisye. Nga limwi yangapuuka mu mpanga itu. Tulinzile twalonda inzila imwi yakulesya impendwa yao kukula cuze.” 11Caleka umwene wilya ni nkombe zyakwe yika yakangalila akalale pa ina Izlaeli kuti yayapatikizya ukuomba imilimo ikome pakuti yayatonsye. Aina Izlaeli yakuula umusumba wa Pitomu nu musumba wa Lamesesi kuti iye imisumba yakwe Falao yakusungilamo ivyakulya. 12Lelo camupamba, lino aina Eguputo yazunya aina Izlaeli wakwe cimwi, alino impendwa ya ina Izlaeli ikulilako cuze, nga yasalangana mu mpanga ya Eguputo. Aina Eguputo iyatandika koopa aina Izlaeli. 13Lyene aina Eguputo yalenga kuti aina Izlaeli yatakwata upuzo pamulandu wa kuyapatikizya ukuomba wa azya. 14Umi wa ina Izlaeli wali uwakucululuka pamulandu wakuti aina Eguputo yayakulizyanga ukuomba incito ikome mu kutama injelwa nu kukanda indaka mu makuule nga nu mu milimo yamu vyalo vyao kwaula ukuya nu luse panoyali.
15Lyene umwene waku Eguputo anena Syifula na Puwa, yanakambuza yaili yano yazwilizyanga anaci Ayebulai pa kuisapula ati, 16“Lino mukwazwilizya anaci Ayebulai pa kuisapula kwao konsi, ana yao ndi aonsi mwayakoma, lelo ndi anaci yene muyata sile.” 17Lelo yanakambuza yalya yopanga Leza. Caleka yakana kuyela ilamulo lya mwene waku Eguputo. Mucifulo cakukoma ana aonsi yayata sile. 18Caleka umwene waku Eguputo atuma akuya ama yanakambuza nga aiza ayuzya ati, “Uzye pacani cino mukucita cii? Uzye pacani cino mukuta ana aonsi mucifulo cakuyakoma?”
19Yanakambuza nayo yaasuka Falao yati, “Musambazi, anaci Ayebulai yasi wa anaci aina Eguputo. Yene pa ukulu yakaisapula zuwa kwaula kucula. Nupya ana yao yakavyalwa ala nanti aumwi uwa munotuli atacili afike kunoyali.” 20Caleka yanakambuza yapolelelwa pamulandu wakuti yopanga Leza. Nupya Leza alenga yanakambuza kuti yavyale ana yao, nga nu kukwata aizikulu. 21Caleka aina Izlaeli yatwalilila kuvula nu kuya na maka. 22#Mil 7:19 Pa kusyalikizya umwene wilya apeela ilamulo ku antu yakwe yonsi ati, “Mwana wensi umonsi uwavyalwa ku Ayebulai alinzile asumbwe mu Luzi lwa Nailo. Lelo ana yao yakaci yonsi muyata sile.”
Currently Selected:
Kufuma 1: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
