Kufuma 3
3
Leza waama Mose
1Uwanda umwi lino Mose wacemanga imfwele ni mbuzi zyakwe Yetulo, sivyala wino wali a simapepo waku Midyani, azitungulula nu kusalala mu lwanga mpaka afika ku mwamba wakwe Leza, uwa Holebu. 2#Mil 7:30-34 Kuku kwene akuno mungeli wakwe Yawe aloleka kunoli wa cimbilimbili ca moto pakasi ka cimpuza. Mose alola ukuti cimpuza cikulunkuma, lelo icaula ukupya. 3Alino Mose aelenganya ati, “Cii icizungusyo. Uzye pacani cino cimpuza cikupya lelo citakusikisa foo? Kampalamile pipi uleke ndolekesye.”
4Lino Yawe walola ukuti Mose akupalamila pipi, alaizya kunoli mukasi ka cimpuza ati, “Mose! Mose!”
Nga Mose aasuka ati, “Mukwai.”
5Lyene Leza avwanga ati, “Utapalama pipi nupya zula ndyatu zyako, pamulandu wakuti cifulo cino uwimililepo icamuzilo. 6Anene Leza wa vikolwe vyako, Leza wakwe Abulaamu, Leza wakwe Isaki, na Leza wakwe Yakobo.” Caleka Mose aivimba pa manso pamulandu wa koopa kulola Leza.
7Lyene Yawe avwanga ati, “Natindola kukalala kuno aina Eguputo yakucita pa antu yane. Natinuvwa inkuta ya antu yane kuti njatuule ukufuma mu makasa yakwe yakangalila yao akalale. Manyile kunyunguluka kwao konsi. 8Caleka natiniza kuti njatuule ukufuma mu makasa ya ina Eguputo nu kuyafumya mu mpanga ilya, nga njatwale ku mpanga ino ili ni ncende ikulu nupya ivunde cuze. Mpanga ilya ya ina Kenani, aina Hiti, aina Amoli, aina Pelizi, aina Hivi, na ina Yebusi. 9Cumi natinuvwa inkuta ya antu yane, nupya natindola kukalala kuno aina Eguputo yakucita pa antu yane. 10Ndakai nakutuma kuti uye kuli Falao ku Eguputo pakuti ukatungulule antu yane, uyafumye mu Eguputo.”
11Lelo Mose anena Leza ati, “Nga nene weni! Uzye icitonte kuti ningaya kuli Falao imunene aleke mfumye aina Izlaeli mu Eguputo?”
12Lelo Leza amunena ati, “Ndaya nawe, nupya lino ulafumya antu mu Eguputo uliza umpepe pa mwamba kwene uu. Cico cilaya cisininkizyo cakuti nene nakutuma.”
13 #
Kuf 6:2, 3 Lelo Mose anena Leza ati, “Ndi naya ku ina Izlaeli nu kuyanena inti, ‘Leza wa vikolwe vinu watantuma kunomuli,’ nayo yalanguzya yati, ‘Uzye izina lyakwe aweni?’ Uzye lyene ndayanena ntuuli?”
14 #
Umb 1:4, 8 Leza anena Mose ati, “Naya vino naya.#3:14 NAYA VINO NAYA: Kuli kuti Ndaya vino Ndaya. Ulinzile ukuyanena uti, ‘Wino akaamwa ukuti Naya vino naya, uwatantuma kunomuli.’ ” 15Leza anena Mose na mazwi kwene yaa ati, “Nena aina Izlaeli ukuti ne Yawe, Leza wa vikolwe vyao, Leza wakwe Abulaamu, Leza wakwe Isaki, na Leza wakwe Yakobo, natinkutuma kunoyali. Lii, ilili zina lyane amanda pe, nupya vii avino inkulo zyonsi zyaku nkolelo zilangama.
16“Pitanga kakonganike intunguluzi zya ina Izlaeli pamwi. Ukayanene uti, ‘Yawe, Leza wa vikolwe vinu, Leza wakwe Abulaamu, na wakwe Isaki na wakwe Yakobo, wataloleka kunondi nga wali wanena wati, Nkamiwaka nupya natindola vino aina Eguputo yakucita kunomuli mu Eguputo. 17Natinelenganya ukuti ndayafumya mu Eguputo, kuko kuno ndakai aina Eguputo yakuyasunga mu kukalala. Ndayatwala ku mpanga ivunde nupya iya uzombozi cuze, impanga ya ina Kenani, aina Hiti, aina Amoli, aina Pelizi, aina Hivi, na ina Yebusi.’
18“Intunguluzi zya ina Izlaeli zilatezya cino ulazinena. Lyene wewe pamwi ni ntunguluzi zya ina Izlaeli ulinzile ukupita ku mwene waku Eguputo ukamunene uti, ‘Yawe, Leza wa Ayebulai, wataisokolola kunotuli. Ndakai tuzumilizye kuti tupite ulwendo lwa manda yatatu mu lwanga kuti tukapeele impolelwa kuli Yawe, Leza witu.’ 19Lelo manyile ukuti umwene waku Eguputo atalamuzumilizya kuti mupite suka sile wapatikiziwa ukucita cico. 20Caleka ndaomvya maka yane nupya ndavunuka aina Eguputo ku vizungusyo vya maka vino ndacita kukwa. Pacisila cakwe vii, umwene wilya alamuzumilizya kuti mupite.”
21“Ndalenga kuti aina Eguputo yamucindike pakuti lino antu yane yalafuma mu mpanga ya Eguputo yataca yapite minwe. 22Mwanaci wensi mwina Izlaeli alaya ku mwanaci mwinipamba mwina Eguputo, nga nu ku mwanaci wensi akaikala mu ng'anda ya mwinipamba wiyo, nga alenge viyembelo vino vyapangwa na zaabu, siluva, nga yalenge ni vyakuzwala vyakuyembela. Vyonsi vii aina Izlaeli yalaemvezya ana yao aonsi na anaci. Mu nzila kwene ii aina Izlaeli yalapoka icuma ca ina Eguputo.”
Currently Selected:
Kufuma 3: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
