Milimo 28

1Lino swensi twafumila ku nkumba mu mutende, tumanya ukuti izina lya cilila a Melita. 2Antu yali asuma kunotuli. Alino imvula itandika kutonya ukuya ni mpepo. Caleka swensi yatuzengela ningo nga yatupembela umoto. 3Lyene Paulo atiya inkwi, nga lino acili sumbila pa moto inzoka iyali mu nkwi ifuma pamulandu wa cipuki, nga imupomba kwi kasa imuluma. 4Lino antu akucilila cii yalola inzoka ala ikunyinyinda kwi kasa lyakwe Paulo yavwanga yati, “Muntu wii alinzile kuya inkomi, lelo nanti angala watapusuka ku manzi, Leza wa ololoke atakumuleka aye umumi.” 5Lelo Paulo akuntila inzoka mu moto. 6Yalolelanga sile kuti avimbe nanti apone pansi afwe. Lelo pacisila cakulolela pa nsita ntali cuze ukwaula kulola icintu cimwi camucitikila, yasenula amano yao yati, “Umuntu wii a leza!”

7Mupipi ni cifulo cino twalipo kwali vyalo vya muntu umwi umukalamba wa cilila izina lyakwe a Pubilio. Wene atuzengela ni nsansa na pa manda yatatu twali aenyi yakwe. 8Isi wakwe Pubilio wali umulwale ala aizi pa musanzi. Walwile impepo nu kupolomya uwazi. Paulo aingila ku muputule wakwe, apepa, amwikapo makasa yakwe, amupozya. 9Lino cii cacitika, alwale yonsi ali pa cilila cica iiza yapoziwa. 10Yatupela mawila aingi, ni vikalondekwa pa ulendo, nga lino twapatama mu wato tufumako.

Ukufuma ku Mota ukuya ku Loma

11Pacisila ca myezi itatu tupatama mu wato uwafumile ku Alekizandilya, uno yamanga yati, “Yaleza yampundu.”#28:11 Yaleza yampundu: Pa nsita kwene ii mato yali na mazina nupya ku nkolelo kwa mato yawazanga cili cimwini cisila. Yampundu yali a Kasitolo na Polukusu. Yano antu yatangi yaleza akacingilila antu lino yakupita pali yemba. Uno wali mu cilila, kulolela kusila kwa nsita ya mpepo. 12Tufika ku musumba wa Silakuse, nga tulinda manda yatatu. 13Kufuma kuko tupatama tufika mu musumba wa Legiamu. Uwanda uwalondelela muza utandika kupunga ukufuma ku kaeya, nga mu manda yaili twiza ku musumba wa Puteoli. 14Tuzanako ataile yamwi nga yatulenga kuti twikale nao umulungu onga. Alino tukatuka tufika ku Loma. 15Aina amu Loma lino yuvwa ukuti tukwiza, iiza yafika nu kwi Sokoni lya Apio,#28:15 Sokoni lya Apiyo: lyali izina lya muzi umwi pa museo ukulu pakasi ka Loma na Puteoli. Ncende ii yali makilomita makumi mutanda na fundimbali kukaeya ka musumba wa Loma, nupya kwali Sokoni likulu. nga nu ku Ng'anda zitatu zya enyi kwiza tukomanya. Lino Paulo wayalola, ataizya Leza nga akomeleka.

Paulo mu musumba wa Loma

16Lino twafika mu Loma, Paulo yamuleka kuti aikalile wenga nu musilika ala akumulinda.

17Pacisila ca manda yatatu, Paulo aama intunguluzi zya Ayuda. Lino zyakongana, azinena ati, “Mwe inane! Nemo indi kuno wa munyepwe kufuma ku Yelusalemu. Nanti angala ntasuzile mutundu witu nanti ntambi zino twapokelile kufuma ku vikolwe vitu, napiilwe mu makasa ya ina Loma. 18Aina Loma nao yanguzikisya, yalonda kunsapula pano yatanzanyile nu mulandu wakuti nkomwe. 19#Mil 25:11 Lelo lino Ayuda yakana cii, napatikiziwe ku twala mulandu wane ku mwene Kesa nanti ntapile mulandu ku antu yane, awe! 20Acino nali nuzya kuti tulolane nga tulande namwe. Pano nati nyepwa mu minyololo pamulandu wakwe wiyo wino aina Izlaeli yakupaalila!” 21Alino yamunena yati, “Tutapokelela makalata yamwi kufuma ku Yudeya akulanda pali wewe, nanti antu itu yamwi yatiza kuno kwiza landa cintu cimwi ciipe pamulandu wako. 22Lelo tungatemwa ukuvwa kunuli pali vino ukwelenganya, pano twamanya ukuti konsi antu yakavwangila kaungwe kano wayamo ui.” 23Caleka yuvwana na Paulo uwanda wakukongana, na pa wanda kwene uo iiza aingi ku ng'anda kuno Paulo wikalanga. Kufuma katondo kufika nu usiku Paulo ayalondolwela nu kuyanena ilandwe lya Wene wakwe Leza. Aezya kusininkizya kunoyali pali Yesu kupitila mu kuwelenga ivyalembwa mu Masunde yakwe Mose nga ni mpapulo zyakwe yakasema. 24Yamwi yene yataila vino akuyalondolwela, yamwi nao yakana kutaila. 25Caleka yapita, ukwaula kuti yazumilizyanye aisikulu, pacisila lino Paulo wavwanga mazwi yaa ati, “Endi! Mupasi Wamuzilo wavwanzile ningo ukupitila muli kasema Ezaya ku vikolwe vinu! 26#Eza 6:9 Pano wavwanzile ati,

‘Yanga ku antu ya uyanene uti,

kuuvwa yanguvwa, lelo yatangamanya ningo.

Nu kulola yangalolekesya, lelo mu cumi yatangailuke.

27Pano mano yao yakupa,

nga yacilika na matwi yao,

na manso yao yazyata.

Pano limwi manso yao yangalola,

na matwi yao yanguvwa, nu kumanya yangamanya ningo,

na kuzenzuka yangazenzuka, nani ningayapozya.’”

28Paulo atwalilila ati, “Mulinzile kumanya vino ilandwe lyakwe Leza ilya ufyusi lyatumwa ku Akulukuwa. Yene yalalyuvwa!” [29Pacisila lino Paulo wavwanga vii, Ayuda yapita, ala aisikulu yakupazyanya cuze.]

30Pa myaka iili Paulo watenzi mu ng'anda ino wasonkelanga ala akupokelela yonsi aizanga ku kumulola. 31Wakosolanga pamulandu wa Wene wakwe Leza nu kusambilizya ivya pamulandu wa Mwene Yesu Klistu, ala akulanda nu kupama ukwaula umwi uwakumulesya.

Currently Selected:

Milimo 28: MamL13

Highlight

Copy