Milimo 27
27
1Lino yapingula ukuti tuli nu kuya ku Italya mu wato, Yapela Paulo na anyepwe yauze kuli Juliasi musika wa asilika, uwali uwamu mpuka ya vita ino yatangi Impuka yakwe kateeka Agostino. 2Tupatama mu wato uwaku Adilamitiamu uwali nu kupita mu misumba yamu nkumba yakwe yemba, mu muputule wa mpanga ya Asiya, nga tukatuka tupita. Twali na Alisitako umwina Makedoniya, uwafumile ku Tesalonika. 3Pa wanda uwalondelela tufika mu Sidoni. Juliasi wali nu luse pali Paulo, amuta kuti aye akalole yacuza yakwe, pakuti yamupele vino akulonda. 4Alino kufuma kuku, lyene pano muza wakoma kuno tukuya, tulondela mu nkumba ya cilila ca Kupulo. 5Alino tupita pali yemba ku kaeya ka Kilikya na Pamfuliya, tufika ku Mila muzi waku Likiya. 6Kuku akuno musika azana uwato uwaku Alekizandilya, uwayanga ku Italya, nga amuno atupatika.
7Lyene twapita panono panono pa manda aingi, ni ntazi ikulu cuze. Tusuka tufika pipi nu muzi wa Kinido. Pa kuzana vino umuza watulesyanga kuya pa nkolelo ya ntunga ilya, tupita mu nkumba ya cilila ca Kulete, kupuzya ku Salimone.
8Twapita pipi nu mu nkumba nu lwendo lutala cuze tusuka tufika na kuno yakati, “Malambwa yasuma,” pipi nu musumba wa Laseya.
9Pene twatenzipo insita ntali, kusuka kuya ni ntazi yakupita pali yemba, nu Wanda wa kuizilizya ukulya#27:9 Wanda wakuizilizya ukulya: kuizilizya ukulya kuu, kwacitikanga pa wanda wa kupeela impolelwa ku kwelelwa maifyo kutandika pakasi ka mwezi wakwe mwanga munono nanti pakasi kakwe mwanga. pa kwelelwa maifyo, ala wapita. Caleka Paulo ayasoka ati, 10“Mwe antu mwe, nalola ukuti ulendo witu ukufuma pano umaya uwa uzanzo, kumaya ukuponzya kwa viya nu kononeka kwa wato, nu kulovya nu umi kwene.” 11Lelo Musika wa asilika azumilizya mazwi yakwe kangalila na mazwi ya mwine wato, asula mazwi yakwe Paulo. 12Ilambwa litalinzile ukwikalapo insita ya mwela. Caleka antu aingi yalondanga kufumako ukwezya kuya ku Fonikisi, ilambwa lya mu Kulete ilyalolenkana na kaeya ki lunji mbali yuze na kimani.
Cipupu pali Yemba
13Umuza uwaku kaeya utandika kupunga kanono, antu yelenganya vino mapange yao yamaomba. Caleka yakatusya nanga yapita pipi mu nkumba ya Kulete. 14Lelo lilyo kwene umuza wa maka akulu uno yamanga yati, “Katutu-Ufumondaka” upunga kufuma mu cilila. 15Wiza upuma uwato, nao usendwa nga pano twapindamilwa nu muza tuposiwa kulungika uwato. 16Alino tuzingulukila kumwi tutulilizya umupipi na ka cilila aka Kauda, kwi lunji lya kaeya. Pano twali na kawato kanono kano twakulanga twati kamaponga, twezya na maka ukukaleta mukasi. 17Awe tusuka tukanyepelela ni myando ku wato ukalamba. Pano yuvwile intete zyakuti limwi uwato ungaya ukapume mu musensenga uwamu nkumba ya Libya, iisya matanga kuti uwato wasensela sile na maimbi. 18Cipupu citwalilila, caleka uwanda uwalondelela yatandika ukusumba muli yemba iviya ivyali mu wato. 19Uwanda uze walondelela yatandika kusumba na makasa yao iviombelo vya wato. 20Tutaweni ilanzi nanti intanda apa manda aingi, nu muza watwalilile ukupunga na maka akulu cuze. Alino pacisila tuponzya upaalilo uno twali nao uwakutuulwa.
21Pacisila lino antu iikala nsita ntali kwaula cakulya, Paulo aimilila pakasi kao avwanga ati, “Mwe antu, mwakanyile munguvwe pakuti mutafuma ku Kulete. Lyene nga twalewike ukononeka kuu nu kuponzya kwa vyuma. 22Lelo ndakai namupapata, posyini! Kusi nanti umwi uwa munomuli amalovya umi wakwe. Uwato sile umaononeka. 23Pano ilelo usiku mungeli wakwe Leza wino naya nawe nupya wino nkapepa wali wiza wanena ati, 24‘Utuvwa intete, Paulo! Uli nu kuya imilila pa manso yakwe Kesa. Leza mu usuma wakwe kunuli watakupeela amaumi ya antu yonsi yano mupatime nao, yatakufwa.’ 25Caleka posyini, mwe antu mwe! Pano nataila muli Leza ukuti cimaya ndi vino wali wanena. 26Lelo cimatusumba pa cilila cimwi.”
27Cali usiku uwanda walenga ikumi na yani, cipupu citusunkilizya muli yemba wa Adiliya. Usiku pakasi yakapisya ya wato yatunganya kuti yapalamila ku mulundu. 28Caleka yanyepelela icela ku mwando, yasumbila muli yemba, nga yazana ukuti kuzika kwakwe yemba kuli amamita umwanda onga na makumi yaili. Papita kasita kanono nupya yapima yazana makumi fundimbali. 29Lyene yoopa yati limwi uwato ungapuma ku milunda, caleka iisizye inanga zini kufuma ku cisila ca wato, yapepa kuti uce zuwa. 30Yakapisya ya wato yene yalonda kuutuka, iisya kawato kanono yacita kwati yakuya ika inanga nkolelo ya wato. 31Lyene Paulo anena musika wa asilika pamwi na asilika ati, “Ndi mwaleka yakapisya ya wato yapita, ale lyene mutangatuulwa.” 32Caleka asilika yaputula mwando uno yanyepelile ku kawato kanono nga yaleka kaponela mu manzi.
33Lyene lino wati waca, Paulo ayapapata kuti yalye, ayanena ati, “Mwalolelanga ukufika na manda ikumi na yani, nga amanda onsi mutalile nanti cimwi. 34Namupapata, lyene, mulye kamwi kuti muye nu umi. Kusi nanti umwi munomuli amaponzya nanti lunyele longa kumutwe wakwe.” 35Pacisila cakuvwanga cii, Paulo atoola mukate, ataizya kuli Leza pa manso yao, aumokoola, nga atandika ukulya. 36Alino yonsi yaposya yatandika ukulya. 37Swensi swe muno twali mu wato twali mpendwa imyanda iili na makumi cinimbali na mutanda (276). 38Pacisila lino umuntu wensi walya wikuta, yangupazya uwato pa kusumbila ingano zyonsi muli yemba.
39Lino waca katondo, yakapisya ya wato yafilwa kulooka kunoyali, lelo yaweni pamwi pali cikoline wa lusenga pa nkumba nga akuno yapanga kuya sika wato ndi cingaya. 40Lyene yaputula inanga zya wato yazituwizya muli yemba, yasapula ni myando yalemile inkafi. Lyene yakatusya itanga inkolelo ya wato apakuti umuza ungapisya uwato inkolelo, nga tupita ukulungama ku mulundu. 41Lelo uwato uya upuma mu citumba ca musensenga uwatulime muli yemba. Alino uwato ufyama inkolelo ni cisolo cauko citandika ukulepoka mulandu wa maimbi.
42Asilika yapanga kukoma anyepwe yonsi pakuti yatowela ku mulundu yutuke. 43Lelo musika walondanga kutuula Paulo. Caleka ayalesya kucita cico. Lelo apeela ilamulo lyakuti antu yonsi yano angowa yafume mu wato inkolelo nu koowa ukuya ku mulundu. 44Na yauze yalondele, ale yati yalemelela ku mbao nanti ku tupimfya twa wato. Vii, vili vino swensi twafumile ku nkumba mu mutende.
Paulo pa cilila ca Melita
Currently Selected:
Milimo 27: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
