Milimo 24
24
1Pacisila ca manda yasano Ananiya uwali a simapepo mukulu, aya ku Kesaliya pamwi na aikolo yamwi ni nkonkotela ya masunde, izina lyakwe a Tetulo. Yene imilila inkolelo ya mulasi Felikisi, yalongwela Paulo. 2Lino yaama Paulo, Tetulo atandika kumulongwela ati, “We Musambazi Felikisi! Utunguluzi wako uwa mano watuletela mutende pa manda aingi, nga ni vintu vikutunguluka nu kuzipa mu mpanga itu. 3Naswe tukazumilizya cii mu mpanga yonsi nu mu nsita zyonsi, nga naswe tukukutaizya cuze. 4Nsikulonda kuti nkusumbile insita, caleka nakulenga ukuti uye nu luse uvwe ku kulanda kwitu mu wipi. 5Twazana ukuti umuntu wii umutalinkane cuze. Akatandika kucita mpanzela mu Ayuda amu nsi yonsi nupya wene intunguluzi ya kaungwe ka ina Nazaleti. 6Wezizye ukukowezya Ng'anda ikulu yakwe Leza, nga naswe tumulema. [Twapangine kumupingula kulingana na masunde itu. 7Lelo Lisiasi musika mukalamba wizile amupokolola sile ku maka kufuma kunotuli 8amuleta kunuli.] Ndi wamuzya muntu wii, wemwisikulu umamanya kufuma kunoli ivintu vyonsi vino tukumulongwela.” 9Ayuda yazumilizya, yalanda ukuti vii vyonsi ivya cumi.
Paulo waiitasya inkolelo ya Mulasi Felikisi
10Mulasi akapizya Paulo kuti alande, nawe Paulo avwanga ati, “Namanya ukuti pa myaka iingi wewe ukapingula antu amu luko lwitu. Acino indi nu luzango lwa kuitasya pa manso yako. 11Mwemwe kwene mungazana cumi cakwe, citalusile pa manda ikumi na yaili apita lino naile ku Yelusalemu ku kupepa. 12Ayuda yatatazile yazana tukupazyanya na umwi mu Ng'anda ikulu yakwe Leza, nanti ukukatusya cimvulunganya mu antu, nanti mu ng'anda ya mapepo nanti akumwi kuze mu musumba. 13Yene yatangasininkizya kunomuli milandu ino yakundongwela. 14Lelo nkuzumila cii pa manso inu, ukuti nkapepa Leza wa vikolwe vitu pa kulondela inzila ilya ino yakati iyaufi. Lelo nataila na muli vyonsi ivyalembwa mu Masunde yakwe Mose, nu mu mpapulo zyakwe yakasema. 15Nakwata upaalilo muli Leza uli umwi na uno yene yakweti, uwakuti antu onsi, asuma na aipe, yalazyukuka kufuma ku afwe. 16Caleka nsita zyonsi nkaezya na mano yane kuya na kampingu uwakaele inkolelo yakwe Leza na antu.
17 #
Mil 21:17
“Pacisila ca myaka ingi pano nafumile ku Yelusalemu, nupya naile kweneko kuti ntwalile antu amu luko lwane uwila uno yantumilizye nga na kuti nkapele impolelwa. 18Cali pa nsita ino nacitanga cii lino yanzanyile mu Ng'anda ikulu yakwe Leza ala nati mala kucita vya kuisangulula. Ntali pamwi ni umba, nupya kutali icimvulunganya. 19Lelo Ayuda yamwi afumile ku muputule wa mpanga ya Asiya apano yali, alio aisikulu yalinzile kuti iize yandongwele mulandu pa manso yako, ndi yakweti mulandu umwi pali nene. 20Nanti leka antu yaa ali pano yalande mulandu uno yanzanyile nao lino naimi pa manso yakwe yao ali mwi Tengo, 21#Mil 23:6 Lelo cintu conga sile cino nalanzile kunoyali cakuti, ‘Ilelo nkupingulwa pakutaila vino afwe yalazyukuka yaye aumi.’”
22Lyene Felikisi wamanyile ningo vyonsi vya nzila ya Mwene. Caleka azinyazinya mulandu ati, “Alala Lisiasi, musika mukalamba uwa asilika wiza alino ndaputula mulandu winu.” 23Alino apeela ilamulo ku musilika uwasunganga Paulo kuti amusunge ningo lelo atamuyalile nanti kulesya yacuza yakwe kumuletela vyonsi vino angalonda.
Paulo walandana na Felikisi na Dulusila
24Pacisila ca manda yamwi Felikisi aiiza nu muci wakwe Dulusila, uwali u Muyuda. Alino atuma kuti yaame Paulo kuti auvwe kunoli pamulandu wa utailo muli Yesu Klistu. 25Lelo lino Paulo watandika kulondolola vya musango wakuya mu wololoke nu kuikanya nga nu kwiza kwa Wanda wa upinguzi, Felikisi auvwa intete nga anena Paulo ati, “Ungapita ndakai. Ndakwama lino ndakwata insita.” 26Pa kasita kali kamwi kwene wapaalilanga ukuti Paulo angamupeelako ulupiya, acino wamwamilanga lililili ku kulanda nawe.
27Pacisila ca myaka iili, Polokia Fesito atoola cifulo ca ulasi wakwe Felikisi. Lelo pano Felikisi walondanga kutasiwa na Ayuda, asya Paulo mu ng'anda yaminyololo.
Paulo walenga kuti mulandu uye kuli Kesa
Currently Selected:
Milimo 24: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
