Milimo 25
25
1Lino Fesito wafika mu mpanga ya Yudeya pacisila ca manda yatatu afuma ku Kesaliya aya ku Yelusalemu. 2Yasimapepo akalamba ni ntunguluzi zya Ciyuda iiza kunoli ku kusitaka Paulo. Alino yapapata kuli Fesito 3kuti ace aleke yalete Paulo ku Yelusalemu, pano yalanga yati yumana kapi yateyamila Paulo kuti yamukome. 4Fesito nawe ayanena ati, “Paulo wasungwa mu ng'anda yaminyololo ku Kesaliya, nani akuno nkuswilila zuwa. 5Acino tungapita ni ntunguluzi zinu zimwi zikamulongwele kuku kwene ndi kuli cimwi cino waifya.”
6Fesito aikala nao mu Yelusalemu manda cinani nanti ikumi nga aswilila ku Kesaliya. Lino waca katondo aikala pa cilimba ca kupingwila milandu, alino apeela ilamulo kuti yalete Paulo pa manso yakwe. 7Lino Paulo wafika, Ayuda yao aizile kufuma ku Yelusalemu iiza yamuunganila, yatandika kumulongwela milandu iingi ino yatangamusinila. 8Lelo Paulo aitaasya ati, “Ntacita icintu cimwi ciipe pa masunde ya Ayuda nanti pa Ng'anda ikulu yakwe Leza nanti kuli Kesa kateeka uwaku Loma.”
9Fesito walondanga ukuzanzya Ayuda. Caleka auzya Paulo ati, “Uzye ungatemwa kuti upite ku Yelusalemu akuno inkakupingwile milandu ii yonsi?”
10Lelo Paulo aasuka ati, “Nemo njimi mu cilye ca milandu cakwe Kesa, icilinzile cimputwile mulandu. Ntacisile icintu cimwi ciipe ku Ayuda, wakwe vino nawe kwene umanyile. 11Ndi cakuti nati mvuna isunde nu kucita icintu cimwi icilingine kuti nkomwe, lyene ntanguzya kuti ntakomwa. Lelo ndi cakuti mu milandu ino yakundongwela musi cimwi, lyene kusi umuntu angampeela kunoyali. Lelo nemo nkulenga kuti mulandu uye kuli Kesa.”
12Lyene Fesito, pacisila ca kulanzyanya na yasicilye yakwe, avwanga ati, “Watulenga kuti mulandu uye kuli Kesa. Caleka umaya kuli Kesa.”
Fesito walondolwela mwene Agilipa mulandu wakwe Paulo
13Pacisila ca manda yamwi, mwene Agilipa pamwi na Benise muci wakwe iiza ku Kesaliya ukwiza lamuka Fesito. 14Lino ikalako manda yamwi, Fesito alondolwela mwene Agilipa mulandu wakwe Paulo ati, “Kuli umuntu umwi wino Felikisi wasya mu ng'anda yaminyololo. 15Lino naile ku Yelusalemu, yasimapepo akalamba na ikolo ya Ayuda yamulongwelile imilandu nu kunguzya kuti imuvunuke. 16Lelo nayanenyile inti lusi lutambi lwa Ciloma kupingula umuntu wino yalongwela milandu lino atali kuti akomane na yao akumulongwela milandu. Wene pa kutandika alinzile kuti apelwe kasita kakuitaasya pamulandu uno yakumulongwela. 17Lino nizile kuno, ntasumvile kasita. Lelo uca katondo nikala pa cilimba ca kupingwila milandu, impela ilamulo kuti yalete Paulo ku cilye. 18Lelo lino yasimilandu yakwe imilile yatamulongwelile ciipe nanti cimwi, wakwe vino nelenginye! 19Yapazyanyizye sile nawe pamulandu wa mipepele yao nga na pa muntu uwi zina lyakwe Yesu, wino uwafwile. Lelo Paulo akavwanga ukuti ali nu umi. 20Nemo naposiwe caleka nuzya Paulo ndi angazumila kumutuma ku Yelusalemu kuti akuno akapingwilwe mulandu wakwe. 21Lelo Paulo watalenga kuti asungwe mu ng'anda yaminyololo ukufikila lino mwene Kesa alapingula mulandu wakwe. Caleka napiile ilamulo ukuti asungwe ukufikila lino ndamutuma ku mwene Kesa.”
22Agilipa anena Fesito ati, “Nani kwene ningatemwa kuvwa ku muntu wii nemwisikulu.” Nawe Fesito amunena ati, “Ulamuvwa mutondo.”
23Uwanda walondelela Agilipa na Benise izile nu lulumbi lwa wene lukulu, nga aingila muno yakauvwila milandu, pamwi na yamusika ya asilika nga na aikolo acindame amu musumba. Lyene Fesito apeela ilamulo kuti yalete Paulo.
24Alino Fesito avwanga ati, “Mwene Agilipa na yonsi ali muno pamwi naswe, mwalola umuntu wii, wino Ayuda yonsi aya kuno nu ku Yelusalemu yati yavwanga ukuti atalingine ukwikala mumi. 25Lelo nemo ntazanyile ukuti wacita icintu cimwi icakumupingwila ukufwa. Na pakuti umwisikulu walenga kuti mulandu wakwe uye kuli Kesa, nani nelenganya ukumutuma. 26Lelo ntakweti visinka vimwi vya mulandu vyakuti indembele umwene Kesa. Caleka nati muleta kunuli we mwene Agilipa, pakuti icisila cakulondelezya umulandu wakwe ningo nani inkwate ivyakulemba. 27Pano citangaloleka ca mano kunondi ukutuma umunyepwe ukwaula ukulondolola imilandu yakwe ningo.”
Paulo waitaasya pa manso ya mwene Agilipa
Currently Selected:
Milimo 25: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
