Milimo 23
23
1Paulo alolekesya amwi Tengo avwanga ati, “Inane, nemo na ndakai mu umi wane nati ntumikila Leza na kampingu musuma.” 2Alino Ananiya Simapepo Mukulu apeela ilamulo kuli yao aimi pipi na Paulo ati, “Mumini pa mulomo!” 3#Mat 23:27 Lyene Paulo amunena ati, “Nawe Leza alakuma we lung'umba we muno wapakwa umula.#23:3 We Lung'umba lwapakwa umula: kuli kuti ng'umba itakulwa ningo, lelo yapakako umula kuti yafise kwipa kwa ng'umba. Utenzi papo kuti umpingule kulingana na Masunde yakwe Mose, lelo ukuvuna masunde pa kupeela ilamulo kuti yangume!”
4Antu ali pipi na Paulo yanena Paulo yati, “Ukutuka Simapepo mukulu wakwe Leza!”
5 #
Kuf 22:28
Paulo aasuka ati, “Mwe inane, ntali manyile ukuti a Simapepo Mukulu. Amalembelo yati, ‘Utakavwange iviipe kuli kateeka wa antu yako.’”
6 #
Mil 26:5; Fil 3:5 Lino Paulo walola ukuti iumba limwi lyali ilya Asaduki ni lyuze ilya Afaliseo. Alaizya umwi Tengo ati, “Mwe inane! Nene Mufaliseo, mwana wa Afaliseo. Inkupingulwa pano nkupaalila ukuti afwe yalazyukuka yaye aumi.”
7Zuwazuwa lino wavwanzile cii, Afaliseo na Asaduki yatandika ukulemanila, nga ni umba lipaatukana paili. 8#Mat 22:23; Mk 12:18; Luk 20:27 (Pano Asaduki yakati antu yatalazyukuka kufuma ku afwe, nga nu kuti kutaya angeli nanti mipasi. Afaliseo yene yataila muli vyonsi vitatu.) 9Lyene icongo cikulisya cuze, na yamwi amuli yakasambilizya ya Masunde, ali amwi umba lya Afaliseo yakatuka yapazya cuze yati, “Tutazanyile umuntu wii nu mulandu umwi! Nalimwi umupasi nanti mungeli uwavwangile munoli.” 10Vikanza vikulisya na musika mukalamba intete zimulema zyakuti limwi yangasantola Paulo. Caleka apeela ilamulo ku asilika kuti yafumyemo Paulo yamutwale ku kamba kao.
11Usiku wa wanda walondelela, Mwene aimilila apali Paulo ati, “Posya sile! Wakwe vino watupeela umboni uwa pali nene muno mu Yelusalemu, avino ulinzile upele nu ku Loma kwene.”
Ayuda yumana kapi kuti yakome Paulo
12Uca katondo, nga Ayuda yamwi yakongana pali pamwi yapangana, yalaya nu mulapo ukuti yatakulya nanti kumwa suka yakome Paulo. 13Yali ukuluta amakumi yani, aumine kapi.
14Lyene yaya kuli yasimapepo akalamba na ikolo, yayanena yati, “Swemo twali twalaya nu mulapo ukuti tutangalya nanti kumwa suka tukome Paulo. 15Lyene ndakai, mwemwe na amwi Tengo, tumini izwi kuli musika mukalamba kuti alete Paulo kunomuli, muikolanye uti mukulonda ukuvwikisya pali aliwe. Lelo tumaiteyanya kumukoma lino atacili afike kuno.”
16Lelo umwipwa wakwe Paulo auvwa vino yumine kapi. Caleka aya aingila mu kamba ka asilika nga anena Paulo. 17Lyene Paulo aama wenga uwamu ntunguluzi nu kumunena ati, “Senda umulumendo wii kuli musika mukalamba. Ali na cimwi icakumunena.” 18Musilika amusenda, amutwala kuli musika mukalamba, amunena ati, “Umunyepwe Paulo wali wangama nu kunguzya kuti indete umulumendo wii kuli wewe, pano ali ni cakuvwanga kunuli.”
19Musika mukalamba alema mulumendo pi kasa amutwala pa mbali amuuzya ati, “Uzye icani cino ukulonda kunena?” 20Nawe amunena ati, “Intunguluzi zya Ciyuda zyati zyuvwana kuti zikulenge kuti mutondo ukatwale Paulo kwi Tengo, nu kuikolanya kwati yakulonda ukuuvwa ningo umboni na uze pali aliwe. 21Lelo utakuvwe kunoyali, pano antu ukuluta pa makumi yani yalafisama nu kumuteyamila. Yati yalaya nu mulapo ukuti yatakutala yalye nanti kumwa cili consi suka yakome Paulo. Ndakai yati yaiteyanya kuti yacicite, nupya yakulolela sile vino wiza landa.”
22Alino Musika mukalamba uwa asilika amunena ati, “Cisuma, wemo pitanga, lelo utanena nanti umwi vino watunena.”
Yatwala Paulo ku Mulasi Felikisi
23Alino musika mukalamba aama yamusika yaili, ayanena ati, “Teyanyini asilika imyanda iili kuti yaye ku Kesaliya, pali pamwi na apa mfwalasi makumi cinimbali na a masumo nao imyanda iili, muiteyanye kukatuka usiku ni nsita yakwe 9 koloko. 24Mupeleko Paulo imfwalasi zimwi izyakupitilapo, mukamufisye umutende ku mulasi Felikisi.”
25Alino musika mukalamba alemba na kalata umwali amazwi ndi yaa:
26“Anene Klaudio Lisiasi, nkulembela nu kulamuka we Mulasi Felikisi Musambazi. 27Ayuda yalemile umuntu wiyo nupya yali pipi nu kumukoma. Lino namanyile vino wene umwina Loma, napisile na asilika yane nu kuya mupususya. 28Nalondanga ukumanya mulandu uno yamupeelanga. Caleka namutwazile kwi Tengo lyao. 29Nazanyile ukuti atacisile nanti icintu cimwi icakuti akomwe nanti kusumbilwa mu ng'anda yaminyololo. Umulandu uno yamupile wali apamulandu wa masunde yao. 30Lyene lino iyanena ukuti Ayuda yamwi yumine kapi kuti yamukome, inelenganya ukuti imutume kunuli. Nati nena na yao akumulongwela kuti yakize yakamusinile pali wewe!”
31Asilika yalondela amalamulo yao. Yasenda Paulo usiku kwene ulya yamufisya ku Antipatili. 32Uwanda uze asilika apa ngazo yaswilila ku kamba yasya yayo ali pa imfwalasi kuti yasukilile Paulo. 33Yamutwazile ku Kesaliya, yatwala na kalata ku Mulasi, yaleta na Paulo kuli aliwe. 34Mulasi awelenga kalata nga auzya Paulo pamulandu wa muputule wa mpanga kuno wafuma. Lino Mulasi uvwa vino wafuma ku Kilikya, 35amunena ati, “Namaiza nuvwe mulandu wako lino yao akukulongwela iiza.” Lyene apeela ilamulo kuti yasunge Paulo nu kumulinda mwi sano lyakwe Helodi.
Ayuda yalongwela Paulo nkolelo ya Mulasi
Currently Selected:
Milimo 23: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
