Milimo 22

1“Inane na yatata, uvwini kunondi lino inkuivwangila kunomuli!” 2Lino yuvwa akulanda kunoyali mu Ciyuda, yamyalalisya. Paulo avwanga ati,

3 # Mil 5:34 “Nene Muyuda, uwavyalilwe mu Taliso muzi uwamu Kilikya, lelo nakulila kuno mu Yelusalemu. Gamalieli uwali kasambilizya wane. Nasambilile ningo masunde ya vikolwe vitu, nupya naipela cuze kuli Leza ndi vino mwensi mukacita, mwemuno muli pano ilelo. 4#Mil 8:3; 26:9 Nazunyanga nu kukomisya yamwi alondelanga nzila ya Mwene. Nalemanga aonsi na anaci nu kuyayalila mu ng'anda yaminyololo. 5Simapepo Mukulu pamwi na amwi Tengo yonsi yangancitila umboni ukuti nemo nkuvwanga icumi. Yene yampile makalata akuyalangizya ku Ayuda aina itu amu Damasiko. Caleka naile kuku kuti nkaleme antu kwene yaa, nga njalete ku Yelusalemu ale yanyefilwe mu minyololo, kuti yavunukwe.

Paulo walondolola vino wazenzwike

(Mil 9:1-19; 26:12-18)

6“Lino ncili nkupita mpalamila ku Damasiko, manye lino ilanzi lyafika umutwe papela 12 koloko. Lyene uluswepo uluyengese cuze lufuma kwiyulu lumyansya ukundizya. 7Alino mpona pansi, nuvwa izwi likuti kunondi, ‘Saulo, Saulo! Pacani ukunzunya?’ 8Nuzya inti, ‘Uzye wewe weni Mwene?’ Nawe anena ati, ‘Nene Yesu uwaku Nazaleti, wino ukuzunya.’ 9Antu yano twali nao yaweni luswepo, lelo yatuvwile izwi lyakwe wino uwavwanganga kunondi. 10Lyene imuzya inti, ‘Uzye namacita uli Mwene?’ Mwene anena ati, ‘Katuka yanga ku Damasiko, akuno yayakunena vino Leza watakusolwela kuti ucite.’ 11Cali ala nati mpafula pamulandu wa kuyengesa kwa luswepo, nga yano twali nao yandema api kasa yantungulula, yantwala mu musumba wa Damasiko.

12“Mwali umuntu izina lyakwe a Ananiya, uwali umupefi nupya wayelanga Masunde itu yakwe Mose, wino Ayuda ali mu musumba yamutasyanga. 13Wene aiiza kunondi, aimilila pipi nane, nga avwanga ati, ‘Mwinane Saulo, lola nupya!’ Lilyo kwene ndola nupya, nga nawe imulola. 14Alino avwanga ati, ‘Leza wa vikolwe vitu watakusola kuti umanye ukulonda kwakwe, nu kulola umuomvi wakwe Umololoke, uuvwe ni zwi lyakwe. 15Pano uli nu kupeela umboni ku antu pamulandu na aliwe, pali vino watulola nu kuuvwa. 16Uzye lyene, ndakai ukulengela uli? Katuka uwatiziwe uswefiwe ku maifyo yako apakwama pi zina lyakwe.’

Ukwamwa kwakwe Paulo ukwakukosola ku Akulukuwa

17“Lyene inswilila ku Yelusalemu, nga lino nkupepa mu Ng'anda ikulu yakwe Leza ndola icilolwa, 18muno Mwene ala akunena akuti, ‘Kalauka fuma mu Yelusalemu zuwa, pano kuno antu yatalapokelela umboni wako pali nene.’ 19Nani mvwanga inti, ‘Mwene yamanya ningo vino nayanga mu mang'anda ya mapepo nu kulema nu kuma yao ataile munuli. 20#Mil 7:58 Na lino yakomanga Sitivini kambone wako, nani kwene apano nali, nsininkizya kukomwa kwakwe ala nkulolela ni vizwalo vyakwe yao amukomile.’ 21Mwene anena ati, ‘Pitanga, Pano namakutuma kutali ku Akulukuwa.’”

22Antu yuvwa kuli Paulo kufika nalino wavwanzile mazwi yaa. Lelo yatandika kupundisya yasanzika mazwi yao yati, “Mukomini, mukomini!” 23Yaweleketa, nga yazulunzya insalu zyao, nu kukatusya lukungu mu lwelele. 24Lyene musika mukalamba uwa asilika a Ciloma anena antu yakwe kuti yasende Paulo, yamutwale mu kamba ka asilika, yamume vikoti pakuti azale umulandu uno Ayuda yamuweleketanga. 25Lelo lino yamunyepa kuti yamume, Paulo auzya musika ati, “Uzye ica nsambu ukuma umwina Loma vikoti lino atali apingulwe mu cilye?”

26Lino musika uvwa vii aya anena musika mukalamba ati, “Uzye umanyile vino ukucita? Muntu wilya umwina Loma!”

27Caleka musika mukalamba aya kuli Paulo amuuzya ati, “Unene, uzye wewe mwina Loma?” Paulo aasuka ati, “Ee.”

28Musika mukalamba avwanga ati, “Nemo pakuti nje umwina Loma nalipile ulupiya uluvule.”

Paulo aasuka ati, “Lelo nemo amuno navyalilwa.”

29Lilyo kwene asilika apalime kuti yatandike kuma Paulo nu kumuuzya mauzyo yafumapo. Lyene musika mukalamba auvwa intete pa kumanya vino Paulo umwina Loma, nu kuti watanyepa Paulo mu minyololo.

Paulo inkolelo i Tengo

30Musika mukalamba walondanga kumanya cumi pamulandu uno Ayuda yapelanga Paulo. Caleka pa wanda uwalondelile amusapula, apeela ni lamulo kuli yasimapepo akalamba na yonsi amwi Tengo kuti yakongane. Alino aleta Paulo, amwimika nkolelo panoyali.

Currently Selected:

Milimo 22: MamL13

Highlight

Copy