Milimo 21

1Lino twapakasyanya nao tupita. Pacisila tucilinganya iziya, tulambila ku Kosi. Pa wanda walondelela tufika ku Lode, nga ukufuma kuku twaile ku Patala. 2Kuku akuno twaile tuzana uwato uwayanga ku Fonisya. Lyene tupatama tupita. 3Lino twalola cilila ca Kupulo tuya ntunga yaku kaeya, tuya ku Silya. Lyene tuya tupatukila pa Tulo, pano akuno uwato wali nu kupatula katundu. 4Tulonda, tuzanako aina Klistu yamwi, nga twikala nao mulungu onga. Nao Mupasi Wamuzilo ayanena kusoka Paulo kuti atakaye ku Yelusalemu. 5Lino insita yakwikala nao yasila tukatuka, tutwalilila nu lwendo lwitu. Onsi pamwi na yamama yao na ana, yatusukilila kufuma mu musumba kuyafika kunzi. Alino tufukama nu kupepa. 6Lyene tupakasyanya nao, twingila mu wato nga yaswililamo kumwao.

7Tutwalilila nu lwendo lwitu tufuma ku Tulo tuya ku Musumba wa Putolemai, amuno twalamukana na ina itu, nga twikala nao uwanda onga. 8#Mil 6:5; 8:5 Uwanda walondelela tukatuka tufika ku musumba wa Kesaliya. Tuya ku ng'anda yakwe Filipo kakosola wi Landwe Lisuma, wenga uwamu antu cinimbali asozilwe ku Yelusalemu, twikala nawe. 9Wakweti ana akazyana asimbe yani yao akosolanga Landwe lyakwe Leza. 10#Mil 11:28 Twamazileko amanda aingi lino kasema umwi izina lyakwe Agabasi, wizile kufuma ku Yudeya. 11Alino aiiza kunotuli, asapula musipi wakwe Paulo, umwisikulu ainyepa maulu na makasa, nga avwanga ati, “Avino Mupasi Wamuzilo wavwanga ati vii avino Ayuda aku Yelusalemu yalanyepa umwine musipi uu, nga yamupele mu makasa ya Akulukuwa.”

12Lino tuvwa vintu vii, sweswe pamwi na ataile tupapata Paulo kuti ataya ku Yelusalemu. 13Lelo Paulo avwanga ati, “Mukucita cani, ukulila nu kuntezula mwenzo? Ala kusi kunyepwa kutupu kuno naipela, lelo nu kufwa kwene mu Yelusalemu pamulandu wi zina lya Mwene Yesu.”

14Twaposiwe kumutonsya. Caleka tusazya tuti, “Lekini kulonda kwa Mwene kucitike.” 15Pacisila ca kwikala kweneko manda yamwi, tutola iviya vitu tuya ku Yelusalemu. 16Alondezi yamwi aku Kesaliya yapita naswe yatutwala ku ng'anda ya muntu umwi wino zina lyakwe a Manasoni mwina Kupulo uwali mulondezi wa mpiti, akuno tufikila.

Paulo watandalila Yakobo

17Lino twafika mu Yelusalemu aina itu yatuzengela ningo. 18Uwanda walondelile tupita na Paulo kukulola Yakobo, na aikolo iuvi yonsi apano yali. 19Paulo ayalamuka ayalandila vintu vyonsi vino Leza wacita pakasi ka Akulukuwa kupitila mu mulimo wakwe. 20Pacisila ca kumuvwa, yonsi yalumbanya Leza. Lyene yanena Paulo yati, “Mwina witu Paulo, watulola, vino Ayuda mazimbi aingi yati yataila muli Klistu nga nupya yaipelesya kuyela Masunde yakwe Mose. 21Yuvwa ukuti wasambilizyanga Ayuda yano aikala mu mpanga zya Akulukuwa kuti yasule Masunde yakwe Mose, ala ukuyanena ukuti yatasilamula ana yao nanti ukulondela intambi zya Ayuda. 22Ukuuvwa kwene yamauvwa ukuti watu wiza. Uzye icani cimacitwa? 23#Mpe 6:13 Cingazipa ucite vino tumakunena. Pano tuli pali antu yani ati yalaya nu mulapo. 24Pitini nao mukaisangulule kulingana nu lutambi, uyalipilile pakuti yakayapele inyele ku mitwe yao. Mu musango uu, umuntu wensi alamanya ukuti musi cumi mu vintu vyonsi vino vyalandwa pali wewe, lelo ukuti wemwisikulu wikala kulingana na Masunde yakwe Mose. 25#Mil 15:29 Lelo pamulandu wa Akulukuwa yano ati yataila, twayatumila kalata uwakuyanena ukuti yatalinzile ukulya icilyo cili consi capeelwa ku tuluwi, nanti kulya uwazi, nanti nyama imwi inyoongwe, nupya yalinzile ukuisunga kufuma ku uzelele.”

26Alino Paulo asenda antu yaya, na pa wanda uwalondelela aisangulula pamwi nao. Lyene aingila mu Ng'anda ikulu yakwe Leza ukuya yamanyisya pano manda yakusangulula yalasilila, lino yalapeela impolelwa yakwe cila muntu.

Yalema Paulo mu Ng'anda ikulu yakwe Leza

27Lelo lino amanda cinimbali yali pipi nu kusila, Ayuda yamwi afumile ku mpanga ya Asiya yalola Paulo mu Ng'anda yakwe Leza. Yasongelekanya iumba lyonsi nga yalema Paulo. 28Yapunda yati, “Mwe ina Izlaeli, twazwini! Wii ali muntu akapita konsi ala akusambilizya wensi ukusula aina Izlaeli, Masunde yakwe Mose, nga ni Ng'anda ii ikulu yakwe Leza. Lyene ndakai wataleta na Akulukuwa kwene mu Ng'anda ikulu yakwe Leza nu kukowezya icifulo camuzilo!” (29#Mil 20:4 Yalanzile cii pano yaweni Tulofimo uwafumile ku Efeso, ala yali na Paulo mu musumba nga yelenginye ukuti Paulo wamusenzile nu mu Ng'anda ikulu yakwe Leza.)

30Icimvulunganya cisalangana monsi mu musumba nga na antu yonsi yasimwilila pamwi, yalema Paulo, yamufumya mu Ng'anda ikulu yakwe Leza. Lilyo kwene milyango ya Ng'anda ikulu yakwe Leza iyalwa. 31Iumba lyalondanga kukoma Paulo lino izwi lyafisile kuli Musika mukalamba wa asilika ya Ciloma ukuti mu Yelusalemu muli mpanzela. 32Lilyo kwene musika mukalamba akatusya asilika ni ntunguluzi zyao yasimwililako. Lino antu yamulola pamwi na asilika, yata ukuma Paulo. 33Lyene musika mukalamba aya kuli Paulo, amulema, nga apeela ilamulo kuti yamunyepe mu minyololo iili. Lyene auzya ati, “Uzye umuntu wii, aweni, nupya icani cino watacita?” 34Antu yamwi mwi umba yapunda vipusanepusane. Kwali icimvulunganya cakuti musika mukalamba aposiwa kumanya ni cacitike. Caleka apeela ilamulo ku antu yakwe kuti yasende Paulo ku kamba. 35Lyene lino yafika pamwi nawe pa muimbili, asilika yanyenyemula Paulo pamulandu wakuti iumba lyakalipa cuze. 36Antu alondelile cisila ala yakulaizya yati, “Mukomini.”

Paulo waitaasya

37Lino asilika yali pipi nu kumwingizya mu kamba, Paulo auzya musika mukalamba ati, “Uzye ntange mvwange cimwi kunuli?” Musika mukalamba wa asilika amuuzya ati, “Uzye wamanya kuvwanga Cigiliki? 38Uzye wemo usi mwina Eguputo wiya uwakatukile uteko pa myaka yapita nga nu kutungulula antu mazimbi yani mu lwanga yao ali azanzi.”

39Paulo amwaasuka ati, “Nene mu Yuda, uwavyalilwe ku Taliso, mu mpanga ya Kilikya nupya nene mwina musumba umumanyike. Napapata leka ndande ku antu.”

40Musika mukalamba amupeela ulusa. Caleka Paulo aimilila pa ciimbili ca ng'anda nga avwangila ku makasa anena antu kuti yamyalale. Lyene lino yamyalala, Paulo avwanga mu Ciyuda.

Currently Selected:

Milimo 21: MamL13

Highlight

Copy