Milimo 20
20
1Walanga mpanzela yasila, Paulo aama alondezi ayakomelezya, nga ayapakasya, apita aya ku Makedoniya. 2Apita mu miputule ya mpanga zizi ala akukomelezya antu mu mazwi aingi. Alino afika ku Gilisi, 3akuno aikala myezi itatu. Wateyanyanga ulendo wakuya ku Silya lino wamanyile ukuti Ayuda yati yumana kapi kuti yamukome. Caleka aelenganya kupita nzila yuze yakuya ku Makedoniya. 4Sopata, mwana Pilusi, uwafumile ku Belea, amusukilila, avino na Alisitako na Sekundo uwafumile ku Tesalonika, Gayusi uwa ku Debe na Timoti nga na Tikikasi na Tulofimo, afumile ku Asiya. 5Yakolezile nu kutulolela mu Tuloa. 6Twapisile mu wato kufuma mu Filipi pacisila ca kuzevya. Cimulo ca mukate usi na citutumusi, na pacisila ca manda yasano twakomenkine mu Tuloa, amuno twikala mulungu onga.
Paulo watutulula Yutuko ku Tuloa
7Pa wanda wakutandika mulungu tukongana pali pamwi ku kumokoola umukate wa wina.#20:7 Mukate wa wina: Mukate wa wina auno yalyanga pa kuzevya icimulo ca Mwene. Paulo avwanga ku antu, atantalizya kuvwanga kufika usiku pakasi, pano wali nu kupita uwanda walondelela. 8Inyali zyakanga mu muputule wa papela muno twakonganyile. 9Umulumendo izina lyakwe Yutuko watenzi lwapa nzota lino Paulo watantalizye kukosola. Yutuko wasipulanga anyomelwa nu tulo nga apona pansi kufuma pa ng'anda ya papela yakwe citatu. Lino yamukatusya, ala watafwa. 10Lelo Paulo aika nga akupama panoli amukumbata, ayanena ati, “Mutasakamala, acili nu umi!” 11Lyene aswilila pa ng'anda ya papela, amokoola umukate, nga alya na ina. Pacisila ca kuvwanga nao pa nsita ntali, ukufika na pa macaca kwene, Paulo afumako. 12Alino antu yaya yasenda umulumendo ala umumi, nga yazanga cuze.
Paulo wafuma ku Tuloa waya ku Mileto
13Twakolezile tuya uku wato tupatama tuya ku Asosi, kuno twali nu kuya kungula Paulo. Watunenyile kuti avino tukacite, pano wene wapisile ku mulundu. 14Lino watukomanya mu Asosi, apatama naswe mu wato, tumusenda ku Mitulene. 15Lyene tufumako, nga pa wanda uwalondelile tufika ku Kiosi. Alino pacisila ca wanda uu, tufika ku Samosi. Uwanda uze uwalondelile tufika ku Mileto. 16Paulo wasolwile kuti apuzye pa Efeso, pakuti atasumba kasita kamwi mu muputule wa mpanga ya Asiya. Walanga atapimpa pa kuti ndi cingaya, afike mu Yelusalemu pa wanda wa kuzevya Pentekosti.
Mazwi yakwe Paulo akupakasya aikolo amwi uvi lyaku Efeso
17Paulo watumile izwi ukufuma ku Mileto ukuya ku Efeso, ukuuzya aikolo amwi uvi kuti yakamukomanye. 18Nao lino iiza ayanena ati, “Mumanyile vino nasumvile insita ikulu cuze namwe, ukufuma pa wanda uno nafisile mu mpanga ya Asiya. 19Natumikile Mwene mu ufuke nu mu ntazi, nanti angala Ayuda yandenzile kuvwa ulanda pa kumana kapi kuti yankome.
20“Mumanyile ukuti ntafisile cimwi icingaya ica kumwazwa lino nakosozile nu kusambilizya pa lwalala nu mu mang'anda inu. 21Nasokanga Ayuda na Akulukuwa kwene ukuti yazenzuke ize kuli Leza nu kuti yataile mu Mwene Yesu. 22Lyene ndakai, pa kuyela Mupasi Wamuzilo nkuya ku Yelusalemu, ukwaula kumanya icilamponela kweneko. 23Namanya sile ukuti mu misumba yonsi Mupasi Wamuzilo wansoka ukuti ukunyepwa mu mang'anda yaminyololo ni ntazi vikundolela. 24#2Tim 4:7 Lelo ntasakamile pa umi wane, pano nkulonda sile kuti imale umulimo uno Mwene Yesu wampile ukucita, uwa kukosola Ilandwe Lisuma lya pamulandu wa cikuku cakwe Leza.
25“Napitana monsi munomuli, ala nkukosola ilandwe lya pa Wene wakwe Leza. Ndakai, yamwi amunomuli yatalandola nupya. 26Caleka namunena icumi nati mu wanda wilelo ndi cakuti wenga uwa munomuli walowa, ale asi pamulandu wane. 27Pano ntamufisanga cimwi lelo namunena vyonsi vino Leza akalonda kuti mucite. 28Caleka muisunge mweisikulu, musunge nu ufyo uno Mupasi Wamuzilo wamwika kuya angalizi. Muye yakacema aiuvi lyakwe Leza, lino wacisile ukuya ilya kwakwe ukupitila mu mfwa ya Mwana wakwe. 29Imanyile ukuti lino ndapita, antu ali wa mimbulu ikalipe cuze yaliza munomuli, nga yatalapanya ufyo. 30Insita iliza lino antu yamwi kufuma umwi umba linu yalatumpoka nu kupuulula ataile. 31Pempulini, lyene nu kwiusya ukuti pa myaka itatu, musanya nu usiku, namusambilizye cila wenga, na minsozi.
32“Lyene ndakai namwika mu makasa yakwe Leza, mwikale nu mwi Landwe lya cikuku cakwe, ilili nu kumukuula nu kumupeela upolelelo uno Leza wasungila antu yakwe onsi. 33Ntakumbwike impiya nanti vyakuzwala vya muntu ali wensi. 34Mweisikulu mwamanya vino nemo naombanga na makasa yane apa kuzana vyonsi vino nene na anji twalondanga. 35Muli vyonsi namulanga ukuti apa kuombesya na maka mu musango uu tungazwa atonte, ukwiusya mazwi ya Mwene Yesu yano wavwanzile umwisikulu ati, ‘Mukupeela mwaya upolelelo ukulu cuze kuluta mukupokelela!’”
36Lino Paulo wamala kuvwanga vii afukama pansi pamwi nao onsi nu kupepa. 37Onsi yalilanga lino yakumukukutila nu kumutonsola kwa kumupakasya. 38Yuvwile ulanda kuluta pano wayanenyile ati yasi nu kumulola nupya. Lyene yamusukilila ku wato.
Paulo waya ku Yelusalemu
Currently Selected:
Milimo 20: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
