Milimo 19
19
1Lino Apolo wali mu Kolinto, Paulo apita ukusalala mpanga pakasi aiiza ku Efeso. Kuko azanako alondezi yamwi nga 2ayauzya ati, “Uzye mwapokelile Mupasi Wamuzilo lino mwataile?” Nao Yaasuka yati, “Tutatala tuvwa ukuti kwaya Mupasi Wamuzilo.” 3Paulo ayauzya ati, “Uzye lyene uluwatizyo lwa musango cii luno mwawatiziwe?”
Nao yamwasuka yati, “Uluwatizyo lwakwe Yoane.”
4 #
Mat 3:11; Mk 1:4; 7:8; Luk 3:4, 16; Yoa 1:26 Paulo ati, “Uluwatizyo lwakwe Yoane lwali ulwakwe yao azenzukanga. Yoane wanenyile aina Izlaeli ukutaila muli wenga uwali nu kwiza pacisila cakwe, kuli kuti, muli Yesu.”
5Lino yuvwa cii, yawatiziwe mwi zina lya Mwene Yesu. 6Paulo aika makasa yakwe panoyali, na Mupasi Wamuzilo aikila panoyali, nao yavwangila mu ndimi zipusanepusane nu kukosola ilandwe lyakwe Leza. 7Yali yonsi pamwi antu manye aonsi ikumi na yaili.
8Lyene Paulo aya mu ng'anda ya mapepo ya Ayuda, nga pa myezi itatu avwanga ku antu nu kupama ala akwezya na maka ukuyatonsya pamulandu wa Wene wakwe Leza.
9Lelo yamwi yali akome myenzo, yakana ukutaila, yavwanga viipe pamulandu na mazwi ya Mwene pa manso ya antu onsi. Paulo ayasya apita pamwi na alondezi yaya, nga cila wanda ala yakukomana nu kulanzyanya mwi sukulu lyakwe Tilano.#19:9 Sukulu lyakwe Tilano: Pa nsita kwene ii antu yamano yamwi yali ni ng'anda nanti muputule ukulu cuze muno yasambilizyanga alondezi yao.
10Wacitanga vikwene kufika na pa myaka iili, na antu yonsi atenzi mu muputule wa mpanga ya Asiya, Ayuda na Akulukuwa kwene, yuvwile izwi lya Mwene.
Vicitwa vyakwe yamwana Sikeva
11Leza wacitanga vizungusyo ivya kuzunguka kupitila muli Paulo. 12Nanti ivitambala, ni nsalu kwene zino wazwalanga ndi yatwala ku alwale, ndwala zyao zipola ni mipasi yankota ifuma munoyali. 13Ayuda yamwi, apitanga ala yakufumya mipasi yankota, nao kwene yezizye ukuomvya izina lya Mwene Yesu pa antu ali ni mipasi yankota. Yavwanga ku mipasi yankota yati, “Tukumupeela ilamulo mwi zina lyakwe Yesu, wino Paulo akakosola, twati fumini.” 14Acitanga vii, ana yakalume cinimbali, ana yakwe Sikeva, Simapepo mukulu wa Ayuda. 15Lelo umupasi wankota uyavwanzya uti, “Namanya Yesu, namanya ni vya pali Paulo, nga mwemo mwemwe yaweni?”
16Lyene umuntu uwali nu mupasi wankota ayazanza na maka ayacimvya onsi. Lyene yonsi kwene yutuka yafuma mu ng'anda yakwe ni nsalu zilepoke, ala iyacisika. 17Ayuda na Akulukuwa aikalanga mu Efeso yuvwile pali cii. Lyene yonsi yuvwa intete cuze, nga ni zina lya Mwene Yesu licindikwa cuze. 18Yano ataile aingi iiza yazumila nu kuilongwela paswe vino yacisile. 19Aingi muli yano acitanga malele yaleta impapulo zyao apali pamwi yazyoca pa manso ya antu. Lino yapenda yazana vino mutengo wakwezyo wali impiya zyakwe siluva mazimbi makumi yasano. 20Mu musango uu uwa maka amuno mazwi ya Mwene yasalangine kuluta, yaomba umulimo na maka.
Icimvulunganya mu Efeso
21Pacisila cakwe vii, Paulo apanga kuti apite mu mpanga ya Makedoniya na Akaya nga aye ku Yelusalemu. Avwanga ati, “Ndi nafika kweneko, alino indi nu kuya ku Loma.” 22Alino atuma yakazwa yakwe yaili, Timoti na Elasita ku Makedoniya, wene asyala mu muputule wa mpanga ya Asiya pa nsita imwi.
23Cali pa nsita kwene ii lino kwali cimvulunganya mu Efeso pamulandu ni nzila ya Mwene. 24Muntu umwi uwali kasula, izina lyakwe Demetiliyo uwasulanga siluva apanga vinkolanya vya ng'anda ikulu ya mapepo yakupepelamo Alitemi, leza wao mwanaci. Uculuzi wakwe uu, waletalanga aomvi yakwe muzano ukulu cuze. 25Caleka aama yonsi pamwi na yano mulimo wakwe wali uli umwi nu wakwao, ayanena ati, “Mwe antu mwe, mwamanya vino ukama witu ukafuma pa mulimo uu. 26Ndakai, mukuuvwa nu kuilolela mweisikulu vino umuntu wi Paulo akucita. Akuti yaleza apangwa na makasa ya antu yasi yaleza awe, nupya wataongola nu kupuulula antu aingi, muno mu Efeso na konsi mu muputule wa mpanga ya Asiya. 27Lyene kwati kuya uzanzo wakuti mulimo witu umasulwa. Cisi cico conga, lelo kuli nu uzanzo na uze wakuti ng'anda yakwe leza mwanaci Alitemi mukulu ilaya iyasilesile nu, ukulu wakwe ulasila, wino ali aka leza kakapepwa nu muntu wensi mu Asiya nga nu mu nsi yonsi.”
28Lino iumba lyuvwile mazwi yaa, lisoka cuze litandika nu kupunda liti, “Mukulu a Alitemi uwaku Efeso!” 29Kuya cimvulunganya mu musumba onsi. Iumba lilema Gayusi na Alisitako, aina Makedoniya apitanga na Paulo, yayasenda ku ng'anda ya kukonganilamo nanti kucinilamo. 30Paulo umwisikulu nalwakwe walondanga ukwingila mwi umba, lelo alondezi yamulesya. 31Yamwi amu ntunguluzi zya muputule wa mpanga ya Asiya, yano ali acuza yakwe yamutumila mazwi akumupapata kuti atingila mu ng'anda ya kukonganilamo nanti kucinilamo. 32Ukongano wao wali uwacimvulunganya. Antu yamwi yapundanga icintu conga, yamwi nao yapunda vyuze, pano aingi munoyali yatamanyile na cino yakonganile.
33Antu yamwi yelenginye ukuti Alekizanda ali mwine wa mulandu pano Ayuda ala yati yamukolezya yakumukunkizya. Lyene Alekizanda avwanga ala akuomvya ikasa ku antu ukuti yamyalale, aezya kuivwangila. 34Lelo lino yamanya vino wene u Muyuda, yapundila capamwi icili cimwi pa nsita ziili yati, “Mukulu a Alitemi uwaku Efeso!”
35Alino pa kusyalikizya kalemba uwamu musumba pa kumyalalika iumba alinena ati, “Mwe ina Efeso! Muntu wensi wamanya ukuti amu musumba wa Efeso ali yakalolela ya ng'anda ikulu yakwe Alitemi mukulu, nupya ali yakalolela aiwe ilyamuzilo lyaponyile kufuma mwiyulu. 36Kusi umwi angakana vintu vii. Caleka lyene mulinzile mumyalale nupya mutacita cintu cimwi ciipe. 37Mwati muleta antu yaa kuno, nanti angala yativile cimwi mu ng'anda zikulu zyakwe leza witu nanti kutuka leza witu mwanaci. 38Ndi Demetiliyo na aomvi yakwe yali nu mulandu pa muntu umwi, twakwata cilye ca milandu, na yakapingula akuno yali, akuno mungatwala mulandu. 39Lelo ndi kuli cuze icilusile pali cii cino mukulonda, cilapingulwa mu ukongano wa ikala mpanga. 40Pano pali uzanzo wakupelwa mulandu uze uwakucita mpanzela pali cii cati cicitika ilelo. Kusi nanti ukuipokolola pa mulundu wakweco, nupya tutangalanda ningo umulandu uno cicitikile.” 41Lino wamala kuvwanga vii asalanganya iumba.
Paulo waya ku Makedoniya nu ku Gilisi
Currently Selected:
Milimo 19: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
