Milimo 14
14
1Ivyacitike ku Antioki ivyacitike nu ku Ikoniamu kwene. Paulo na Banaba ingila mu ng'anda ya mapepo ya Ayuda, yene yakosola na maka cakuti Ayuda na Akulukuwa aingi yataila muli Yesu.
2Lelo Ayuda atakasi kutaila yatunka Akulukuwa kuti yapate aina Klistu. 3Paulo na Banaba yatenzi kweneko pa nsita ntali, ala aingi yakuvwanga nu kupama pamulandu wa Mwene. Mwene nawe ayapeela maka akucita vinjelengwe ni vizungusyo kuti apeele umboni vino kuvwanga kwao pamulandu wa cikuku cakwe ukwa cumi. 4Lyene antu amu musumba yapaatukana paili. Iumba limwi liwila ku atumwa ni lyuze ku Ayuda.
5Lyene Akulukuwa na Ayuda pamwi ni ntunguluzi zyao, yuvwana kuti yayakatukile nu kuyatama na mawe. 6Lino atumwa yacimanya, yutukila ku Lisitala na Debe, misumba yaku Likoniya alino nu ku mpanga zyazingulwikeko. 7Kuku nako yakosola Ilandwe Lisuma.
Vyacitike mu Lisitala na Debe
8Mu Lisitala mwikalanga umuntu uwali icite. Kufuma ku kuvyalwa kwakwe atatazile aye na maka ya kupita.
9Muntu wi watenzi ala akuuvwa ku mazwi yakwe Paulo. Paulo alola vino akweti utailo na vino angapoziwa. Caleka amulolekesya, 10alaizya ni zwi likulu ati, “Katuka imilila!” Alino umuntu wiyo akatuka, atandika kupita. 11Lino antu yaya yonsi yalola vino Paulo wacita, yatandika kulaizya mu cilimi cao Cilikoniya yati, “Yaleza yati yakolana na antu nu kwiza kunotuli!” 12Yatemile Banaba izina lyakuti Zeusi,#14:12 Zeusi: Agiliki yatangi Zeusi a isi wakwe yaleza yao. Aloma yamwamanga ukuti Yupitale. na Paulo izina lyakuti Helemesi,#14:12 Yelemesi: Agiliki yatangi Yelemesi aleza mulamoke nupya umutumwa wakwe yaleza. Aloma yamwamanga ukuti Mekulio. pano aliwe wavwanzile. 13Lyene simapepo wakwe Zeusi wino ng'anda yakwe yamapepo yali pipi nu musumba, aleta cipambasi na maluwa ku mpongolo. Aliwe na antu yakasi kupeela impolelwa kuli Paulo na Banaba.
14Lino Banaba na Paulo yuvwa vino yakulonda kucita cii, yalepola malaya yao yasimula yaya mukasi ki umba, yalaizya yati,
15 #
Kuf 20:11; Mas 146:6 “Uzye pacani mukucita cii mwe antu? Swemo sweswe antunze sile wakwe vino muli! Tuli kuno kuti tukosole Ilandwe Lisuma, kuti mufume ku vintu vyasile sile mutandike kupepa Leza wa umi, uwaumvile iyulu, insi, yemba ni vyayamo. 16Ku mpiti walesile antu kucita vyonsi vino yakulonda. 17Lelo Leza asita kupeela umboni uwa pali aliwe umwisikulu kupitila mu vintu visuma vino akacita. Wene akamupeela imvula kufuma mwiyulu nu kuleka kuti vilimwa vikule pa nsita isuma. Wene akamupeela ivyakulya nu kuzuzya myenzo inu nu luzango.” 18Lelo nanti angala atumwa yavwanzile vii, kwasile panono kuti yaposiwe kulesya antu kupeela impolelwa kunoyali.
19Lelo Ayuda yamwi aizile kufuma ku Antioki wa Pisidiya nu ku Ikoniamu yatonsya maumba ku lusansa lwao, nga yatama Paulo na mawe, yamukulila nu kunzi yamusumba, yelenganya vino watafwa.
20Lelo lino ataila iiza yamuunganila, Paulo akatuka aswilila mu musumba. Uwanda walondelela wene pamwi na Banaba yafumako yaya ku Debe.
Paulo na Banaba yaswilila ku Antioki mu Silya
21Paulo na Banaba yakosola Ilandwe Lisuma mu Debe yalonka antu aingi yataila muli Yesu. Lyene yaswilila ku Lisitala, ku Ikoniamu, nu ku Antioki mu Pisidiya. 22Yakomelezya yano ataile nu kuyakonkomezya kuti yatwalilile kuya acumi mu utailo. Yayasambilizya yati, “Pakuti tukingile mu Wene wa mwiyulu, tulinzile kupita mu ntazi zingi.” 23Muli cila uvi yasontamo aikolo yi uvi. Alino yaizilizya ukulya, yapepa, yaika mu makasa ya Mwene, wino yatailamo.
24Pacisila lino yapita kusalala mpanga ya Pisidiya, iiza ku Pamfuliya. 25Alino yakosola ilandwe mu Pelige nga yaya ku Ataliya. 26Kuku akuno yapatama mu wato yaswilila ku Antioki, kuno yapilwe cikuku cakwe Leza pamilimo ino yatiyamala kuomba.
27Lino yafika mu Antioki, yakonganika iuvi lyonsi, yayalandila vyonsi vino Leza wayacitile, na vino wapile Akulukuwa isyuko kuti yataile. 28Alino oili iikala na ataile pa manda aingi.
Ukongano mu Yelusalemu
Currently Selected:
Milimo 14: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
