Milimo 13

1Mwi uvi lyaku Antioki mwali yakasema na yakasambilizya#13:1 Kasambilizya: Mu mauvi yamwi yakasambilizya yali nu mute wakusambilizya antu. Acino yapilwe ilamulo lyakusambilizya alondezi. yaa: Banaba, Simeoni (uwamwangwa mutifi), Lukio (uwafumile ku Kuleni), Manaeni (uwakuzile pamwi nu mulasi Helodi), nga na Saulo. 2Uwanda umwi lino yakongine, ala yakupepa Mwene nu kuizilizya ukulya, Mupasi Wamuzilo ayanena ati, “Mu mpalwile Banaba na Saulo, kuti yakaombe mulimo uno nayamila.”

3Lyene lino yaizilizya ukulya, nu kupepa, iika makasa yao panoyali, yayatuma.

Kukosola mu Kupulo

4Banaba na Saulo pano yatumwa na Mupasi Wamuzilo, ku Seleukia. Kuku akuno yaya yapatama mu wato yaya ku cilila ca Kupulo. 5Lino yafika mu musumba wa Salamisi, yakosola ilandwe lyakwe Leza mu mang'anda ya mapepo ya Ayuda. Yali na Yoane Mako kazwa wao.

6Alino yapita yasalala cilila yafika ku musumba wa Pafosi, yazana umuntu umwi uwa malele, wino izina lyakwe a Ba-Yesu, u Muyuda wino waitakanga vino akasema. 7Muntu wii wali a cuza wakwe Salegio Paulu mulasi wa cilila, umuntu wamano. Mulasi aama Banaba na Saulo pano walondanga ukuvwa izwi lyakwe Leza. 8Lelo Elima, (Elima kuli kuti uwa malele), wene ayalesya ala akwezya ukucicintila mulasi kuti atataila Ilandwe Lisuma.

9Lyene Saulo, zina lyuze a Paulo, azuziwa na Mupasi Wamuzilo, alolekesya pa muntu wa malele amunena ati, 10“We mwana wakwe Ciwa! Wewe mwanisi wa wololoke. Mwenzo wako wazulamo misango yonsi ya micitile yankota. Uzye alilaci lino ulata kutumpwila vyawololoke vya Mwene? 11Lola! Ndakai Leza amakuvunuka. Umaya wewe mpafu nupya utalalola nanti uluswepo lwa kasanya pa kasita kamwi.” Lilyo kwene Elima apafula. 12Lino mulasi wiya walola icacitika, ataila. Lyene azunguka cuze pa vintu vino yasambilizyanga ivya Mwene.

Kukosola mu Antioki wa Pisidiya

13Paulo pamwi na auze yapatama mu wato yafuma ku Pafosi, yaya ku Pelige, mu Pamfuliya. Lelo Yoane Mako ayasya kuku, aswilila ku Yelusalemu. 14Kufuma ku Pelige yapitilila yafika ku Antioki wa Pisidiya. Pa Sabata yaya iingila mu ng'anda yamapepo, ikala pansi. 15Lyene pacisila ca kuwelenga mazwi amu lupapulo lwakwe Mose nga na zyakwe yakasema, intunguluzi zyamu ng'anda yamapepo zituma mazwi kunoyali ziti, “Ina itu, ndi muli na mazwi yamwi akukomelezya antu, vwangini.” 16Alino Paulo aimilila, aimika ikasa, atandika kuvwanga ati, “Mwe ina Izlaeli yanji nga na mwe Akulukuwa yonsi ali pano, mwe muno mukapepa Leza, nguvwini!

17 # Kuf 1:7; 12:51 “Leza wa ina Izlaeli wasolwile vikolwe vitu, nga aleka antu itu yaya luko lukulu lino yali atandazi mu mpanga ya Eguputo. Lyene Leza ayafumya na maka mu Eguputo 18#Mpe 14:34; Malg 1:31 na pa myaka makumi yani ala akuyasunga mu lwanga. 19#Malg 7:1; Yos 14:1 Alino aonona mitundu cinimbali ya antu amu mpanga ya Kenani, nga apeela mpanga yao ku ina Izlaeli kuti iye iyakwao. 20#Yaka 2:16; 1Sam 3:20 Casenzile namanye imyaka myanda ini na makumi yasano lino vii vyonsi vyacitike. Pacisila, ayapeela yakapingula ya milandu, kufika na pa nsita yakwe kasema Samueli.

21 # 1Sam 8:5; 10:21 “Lyene lino yuzya ukuti yakwate Mwene, Leza ayapeela Saulo, mwana wakwe Kisi, uwamu luko lwakwe Benjamini, kuti aye umwene wao pa myaka makumi yani.

22 # 1Sam 13:14; 16:12; Mas 89:20 “Pacisila lino wamusisya, Leza acita Davidi kuya mwene wao. Vii avino Leza wavwanzile pamulandu na aliwe, ati, ‘Nati nzana vino Davidi mwana wakwe Yese, ali muntu wino umwenzo wane watemwa, wino alacita vyonsi vino nemo nkalonda kuti acite.’ 23Leza walavile ukuti mu luko lwakwe Davidi amuno mulafuma Yesu, kuti aye Katuula wa ina Izlaeli. 24Lino Yesu atali atandike mulimo wakwe, Yoane wakosozile ku ina Izlaeli yonsi kuti yazenzuke nga yawatiziwe. 25#Mat 3:11; Mk 1:7; Luk 3:16; Yoa 1:20, 27 Lyene lino Yoane wali pipi nu kumala mulimo wakwe, avwanga ku antu ati, ‘Uzye mukwelenganya vino nene weni? Ala nemo nsi wiyo wino mukalolela. Lelo akunoli akwiza cisila cane, nani ntaine kusapula ndyatu ku ngazo zyakwe.’

26“Mwe inane, mwe amu luko lwakwe Abulaamu, nga namwe mwe Akulukuwa ali pano mwensi, mwe muno mukapepa Leza, akuli sweswe kuno Ilandwe lya ufyusi lyatumwa! 27Antu akaikala mu Yelusalemu, nga ni ntunguluzi zyao, yatamanyile vino Yesu ali Katuula, nanti ukwiluka mazwi yakwe yakasema yano yakawelenga cila Sabata. Lelo pa kuvunuka Yesu ku mfwa, yalenzile kuti mazwi yakwe yakasema yafikiliziwe. 28Nanti angala yatazanyile mulandu wa kumupingwila ukufwa, yuzya Pilato kuti apeele ilamulo kuti akomwe. 29#Mat 27:57; Mk 15:42; Luk 23:50; Yoa 19:38 Lyene lino yamala kucita vyonsi vino malembelo yakataka pali aliwe, yamwisya pa lupanda, nga yamuzika mwi lindi. 30Lelo Leza walenzile kuti azyukuke kufuma ku afwe, 31#Mil 1:3 nga na pa manda aingi walolike kuli yao apitanga nawe kufuma ku Galile kuya ku Yelusalemu. Ndakai yakwene ali yakambone yakwe ku ina Izlaeli. 32Acino tuli kuno ku kuleta Ilandwe Lisuma kunomuli. 33#Mas 2:7 Ndi vino Leza walavile vikolwe vitu, avino naswe watatucitila, swe ana yao, pa kulenga Yesu azyukuke kufuma ku afwe. Ndi vino calembwa mu ciputulwa cakwe ciili ca Masamu, cati,

‘Wewe Mwanane,

ilelo naya nene ndi so.’

34 # Eza 55:3 Na vii avino Leza wavwanzile pa kulenga kuti azyukuke kufuma ku afwe, kuti atakaole, ati,

‘Ndakupeela upolelelo wamuzilo uwa mpomvu

uno nalavile kuli Davidi.’

35 # Mas 16:10 Cumi ndi vino wavwanzile mu ciputulwa cuze ca Masamu ati,

‘Utalazumilizya ukuti muomvi wako uwakutailwa aole.’

36Pano Davidi wacisile kulonda kwakwe Leza mu manda amu mukulo wakwe, nga lino wafwile yamuzisile pamwi ni vikolwe vyakwe, nu mwili wakwe waozile. 37Lelo cii citacitikile wiyo wino Leza wazyukwile kufuma ku afwe. 38Caleka, mwe inane mwensi, mulinzile kumanya vino kupitila sile muli Yesu Klistu amuno ilandwe pamulandu wa kwelelwa maifyo likakosolwa kunomuli. 39Mulinzile kumanya vino wensi uwataila munoli wene alaya uwakaele kufuma ku maifyo yonsi yano masunde yakwe Mose yatange yamukulule. 40Lyene, cenjelini, pakuti vino yakasema yavwanzile vitakamucitikile, vikati,

41 # Hab 1:5 ‘Lolini, mwe antu amisowe! Zungukini nu kulowa!

Pano lino muli aumi musyakutaila cintu cino nkucita ilelo,

nanti angala umwi walondolola kunomuli!’”

42Lino Paulo na Banaba yacili fuma mu ng'anda yamapepo, antu yayapapata kuti yace yakakosole nupya pi Sabata ililalondelela.

43Lino antu ali pa ukongano yasalangana, Ayuda na Akulukuwa aingi asenusi yalondela Paulo na Banaba. Atumwa yavwanga kunoyali nu kuyakomelezya kuti yatwalilile kwemelela mu cikuku cakwe Leza, wino uwali nu luse panoyali.

44Pa Sabata lyalondelile kweleula umuntu wensi mu muzi wizile ku kuvwa mazwi ya Mwene. 45Lino Ayuda yalola wingi wa antu, yuvwa uzuwa cuze, yalanda mazwi ya miponto akukanya vino Paulo wavwanganga. 46Lelo Paulo na Banaba yavwanga nu kupama yati, “Cali campomvu kuti tutandikile kukosola mazwi yakwe Leza kunomuli. Lelo pakuti mwayakana nu kuipingwila vino mutalingine kuya nu umi wape, swemo tumamusya nu kuya ku Akulukuwa. 47#Eza 42:6; 49:6 Pano Mwene watupeela ilamulo lii, lyakuti,

‘Namucita kuya wa luswepo pa antu Akulukuwa,

pakuti mutwale ilandwe lya ufyusi ku antu amu nko zyonsi.’”

48Lino Akulukuwa yuvwa cii, yazanga nu kutasya ilandwe lya Mwene. Na yao yonsi yano Leza wasolwile kuti yaye nu umi wape, yataila mu Mwene.

49Lyene izwi lyakwe Leza lisalangana konsikonsi mu mpanga ilya. 50Lelo intunguluzi zya Ayuda yatunkola anaci Akulukuwa akama apepanga Leza ni nkombe zyamu musumba izicindame.

51 # Mat 10:14; Mk 6:11; Luk 9:5; 10:11 Atumwa nao yakunta lukungu lwa ku ngazo zyao kuya umboni kuno yali, yapita ku Ikoniamu. 52Lelo alondezi amu Antioki yazuziwa nu luzango nga na Mupasi Wamuzilo.

Kukosola mu Ikoniamu

Currently Selected:

Milimo 13: MamL13

Highlight

Copy