Milimo 15
15
1 #
Levi 12:3
Antu yamwi afumile ku Yudeya iiza ku Antioki, yasambilizya ataile yati, “Mutalatuulwa ndi mutasilamwilwe kulingana nu lutambi luno Mose watusilile.” 2Lyene Paulo na Banaba yapusana na antu yaa, yaikana ni vikanza cuze pamulandu uu, alino iuvi lipingula kuti Paulo na Banaba nayauze mwi uvi yaye ku Yelusalemu yakalole atumwa na ikolo pamulandu uu.
3Amwi uvi yayasukilila pa lwendo, yasalala mu Fonisya na Samaliya ala yakulandila ataile vino Akulukuwa yataile muli Leza, ilandwe lii lizanzya ataile. 4Lino yafika mu Yelusalemu, iuvi, atumwa na ikolo yayazengela. Paulo na Banaba yayalandila vyonsi vino Leza wacisile munoyali. 5Lelo ataile yamwi ali mu kaungwe ka Afaliseo, iimilila yavwanga yati, “Akulukuwa yalinzile kusilamulwa nu kunenwa kuti yayela Masunde yakwe Mose.”
6Alino atumwa na ikolo yakongana pamwi kuti yelenganye pamulandu uu. 7#Mil 10:1 Pacisila cakulanzyanya pa nsita ntali Petulo akatuka avwanga ati, “Inane, mwamanya vino kufuma mpiti Leza wansozile kufuma munomuli kuti nkakosole Ilandwe Lisuma ku Akulukuwa, pakuti yanguvwa nu kutaila. 8#Mil 2:4; 10:44 Lyene Leza, wino uwamanya vyaya mu myenzo ya antu, walanzile vino watazengela Akulukuwa pa kuyapela Mupasi Wamuzilo, wakwe vino naswe watupile. 9Atapusinye pakasi kakwe sweswe na alio, lelo wasangulwile myenzo yao pano yataile. 10Caleka, uzye pacani mukwezya Leza pa kutwika cisendo pa nsizi zya ina Klistu Akulukuwa, cino vikolwe vitu nanti sweswe twaposiwa kusenda? 11Awe! Twataila nga nu kutuulwa kupitila mu cikuku ca Mwene Yesu, ndi vino yene yakutuulwa.” 12Onsi akongine yaya cele lino yakuuvwa kuli vino Banaba na Paulo yalandanga, pamulandu wa vilangililo nga ni vizungusyo vino Leza wacisile pakasi ka Akulukuwa kupitila munoyali. 13Lino yamala kulanda, Yakobo aimilila, avwanga ati, “Uvwini kunondi, mwe inane! 14Simoni watalondolola vino inkolelo Leza watandike kusolola yamwi mu Akulukuwa kuti yaye antu yakwe. 15Mazwi yakwe yakasema yazumilizya ningo pali cii. Wakwe vino malembelo yati,
16 #
Amo 9:11
‘Pacisila ca vintu vii ndawela,
Nu kukuula ing'anda yakwe Davidi iyawa.
Ndakuululula citalang'anda nu kukuula ing'anda nupya.
17Alino na antu yauze yonsi yalalonda Mwene,
pamwi na Akulukuwa yonsi yano nama kuya antu yane.
18Vii avino Mwene wavwanga,
wino walenzile kuti vii vimanyike kufuma ku mpiti.’”
19Yakobo atwalilila kuvwanga ati, “Ukwelenganya kwane ukwakuti, tutalinzile kwanola Akulukuwa yano akusenukila kuli Leza. 20#Kuf 34:15; Levi 17:10; 18:6 Mu cifulo cakwe cico, tulinzile kuyalembela kalata wa kuyanena kuti yatalya ivyakulya vikowele pano vyapeelwa ku tuluwi. Yaisunge ku ulenzyo, nga nu kuntalya inyama zino yanyonga, nanti kulya uwazi. 21Pano kufuma ku mpiti Masunde yakwe Mose yawelengwa pa manda aingi mu mang'anda ya mapepo cila Sabata, nga na mazwi yakwe yakakosolwa mu misumba yonsi.”
Kalata kufuma ku cilye kuya ku Akulukuwa ataile
22Lyene atumwa na aikolo, pali pamwi ni iuvi lyonsi yelenganya kusolola aomvi yamwi kufuma mwi umba nu kuyatuma ku Antioki pamwi na Paulo na Banaba. Lyene yasola Yuda, wino yamanga Basabasi nga na Sailasi, antu yaa oili yano acindikwe cuze mu ina. 23Alino yayatumilizya kalata uwatangi,
“Swe atumwa na aikolo, swe ina inu, twatuma ulau kuno muli mwe ina itu amu Akulukuwa, akaikala mu Antioki, Silya na Kilikya. 24Tuvwa vino antu yamwi apisile kufuma umwi umba litu yati yamwanola nu kuvulunganya kampingu winu pali vino yavwanzile. Swemo tutayatumile kuti yacite vivyo. 25Caleka swemo twati tukomenkana swensi pali pamwi nu kuzumilizyanya kuti tusolole inkombe zimwi nu kuzituma kunomuli. Zyene ziliza na yacuza itu akundwe, Banaba na Paulo. 26Yene yapela umi wao ku kuombela Mwene witu Yesu Klistu. 27Lyene twamutumila Yuda na Sailasi, yao alamunena pa manso inu vintu vili vimwi na vino tukulemba. 28Mupasi Wamuzilo pamwi naswe twati tuzumilizyanya ukuti tutalinzile kumutwika cisendo nacuze kuluta pali vii vikalondekwa, 29mutalya vyakulya ivyapeelwa ku tuluwi, mutalya uwazi. Mutalya inyama zinyongwe. Muisunge ku ulalelale. Muli nu kucita ningo ndi cakuti mwaisunga ku kuntacita vintu vii. Mwikale ulumi.”
30Inkombe zikatuka ulendo zipita, zifika ku Antioki. Lino zyafika zikonganika iuvi nu kulipela kalata. 31Lino antu yawelenzile kalata, myenzo yao izuziwa nu luzango cuze pa kuvwa mazwi yaa aukomelezyo. 32Yuda, na Sailasi, yano ali akakosola yavwanga mazwi akuyakomelezya nu kuyatekezya. 33Lino ikalako pa nsita imwi, aina yauze yayapakasya yayanena yati, “Pitini ulumi.” Nao yaswilila kuli yao ayatumile. [34Lelo Sailasi wene alola vino camuzipila kuti asyale ku Antioki.] 35Paulo na Banaba yalengile mu Antioki. Yene pamwi nayauze aingi yasambilizyanga nu kukosola mazwi ya Mwene.
Paulo na Banaba yapalukana
36Pacisila ca manda yamwi Paulo anena Banaba ati, “Katuswilile tukatandalile aina itu mu mizi yonsi muno twakosozile mazwi ya Mwene, nu kulola miyele yao vino ili.” 37Banaba walondanga Yoane Mako kuti yapite nawe, 38#Mil 13:13 lelo Paulo aelenganya vino citalingine kuti yamusende pano waswilile ayasya pa Pamfuliya, aposiwa kuti amalile milimo pamwi nao. 39Alino Paulo na Banaba yapazyanya pali cii yakana kuvwana nga yapalukana. Lyene Banaba asenda Yoane Mako yapatama mu wato yaya ku Kupulo. 40Paulo nawe asolola kupita na Sailasi, lino aina Klistu yauze yaika mu makasa ya Mwene. 41Alino nao yapita mu Silya nu mu Kilikya, ala yakukomelezya mauvi.
Timoti wapita na Paulo na Sailasi
Currently Selected:
Milimo 15: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
