Milimo 10
10
1Kwali umuntu umwi mu Kesaliya izina lyakwe a Konelio, uwali a musika wa vita umwanda onga vya uteko wa Ciloma vino yatangi, “Vita vya Italya.” 2Wene wali umuntu uwacindike Leza. Konelio pamwi na amu ng'anda yakwe yoopanga Leza. Wene wazwilizyanga Ayuda pakulu cuze, nupya wapepanga Leza lyonsi. 3Uwanda umwi manguzi, cali manye nsita yakwe 3 koloko lino Konelio waweni cilolwa, muno waweni mungeli wakwe Leza akwiza kunoli, amunena ati, “Konelio!”
4Nawe alolekesya mungeli, auvwa intete amunena ati, “Musambazi kuli cii?”
Mungeli aasuka ati, “Leza watazangila mu mapepo yako nga nu wila uno ukapeela ku apina. 5Ndakai tuma antu yamwi ku Yopa ku muntu umwi zina lyakwe a Simoni Petulo. 6Wene umwenyi mu ng'anda yakwe kanyuka wa mpapa zina lyakwe a Simoni, wino ng'anda yakwe yakulwa mu nkumba yakwe yemba.” 7Lyene mungeli uwalandananga nawe apita, nga Konelio aama aomvi yakwe yaili nga nu musilika. Musilika wii a wenga wamuli yao amutumikilanga nupya wali umuntu uwacitanga viine na ukapepa. 8Alino ayanena icacitike nga ayatuma ku Yopa.
9Pa wanda uwalondelela lino antu yaa yacili pa lwendo lwao lino yapalama ku Yopa, ilanzi umutwe papela (12 koloko), Petulo akwela pa ng'anda pipaala#10:9 Pipaala: Mang'anda ya Ciyuda mapaala yali wacipango. Yakweti mupanda wakufikila pipaala. kuti akapepe.
10Lyene auvwa inzala, alonda kulya. Lelo lino yacili teyanya icakulya, asipula, nga alola cilolwa. 11Alola iyulu lilekuka nga ni cintu cimwi cikoline wa cisalu, ala cikwika pansi ku masempele yaciko yani. 12Mukasi kaciko mwali misango yonsi ya nyama, ivikasela pansi, nga ni vyunyi vya mulwelele. 13Alino Petulo auvwa izwi likuti, “Petulo, katuka, koma ulye!”
14Lelo Petulo avwanga ati, “Awe Mwene! Cumi ntatala nalya icintu cimwi citasanguluka nanti cikowele.”
15Nupya izwi lyuvwika kunoli liti, “Vino Leza wasangulula utataka ukuti vikowele.” 16Cii cacitike amaila yatatu, nga lyene icintu cico cisendwa kwiyulu.
17Walanga lino Petulo acili akwelenganya vino cilolwa ca vintu vino waweni cikusenula, antu yano Konelio watumile yafika ku ng'anda yakwe Simoni, iimilila pa mulyango, 18alino yalaizya, iyuzya yati, “Uzye kuno kuli mwenyi umwi uwi zina lyakwe Simoni Petulo?”
19Walanga Petulo acili akwelenganya vino cilolwa cikusenula, Mupasi Wamuzilo amunena ati, “Lola! Antu yatatu yakukulonda. 20Caleka iteyanye upite. Utasiima lelo pita nao pano nati njatuma.” 21Lyene Petulo aika aya anena antu ati, “Anene wino mukulonda. Uzye cino mwizile kuno icani?”
22Yaasuka yati, “Konelio musika wa vita watatutuma. Wene umuntu musuma wino akaoopa Leza, nga na Ayuda yamucindika cuze. Mungeli wa Mwene wamunenyile kuti akwame ku ng'anda yakwe, pakuti akuvwe cino waya vwanga.” 23Alino Petulo aingizya mu ng'anda ayasezya.
Lyene katondo pa wanda walondelile akatuka apita nao, nga yamwi amu Yopa yano ataile yapita pamwi nawe. 24Alino katondo pa wanda uze walondelile yafika ku Kesaliya, kuno Konelio wamulolelanga, pamwi na akazi kakwe na yacuza yakwe yano wamile. 25Walanga lino Petulo atali aingile, Konelio amukomanya afukama pa ngazo zyakwe. 26Lelo Petulo amukatusya ati, “Katuka, pano nani kwene nene muntu sile.”
27Petulo watwalilile kuvwanga kuli Konelio lino akwingila mu ng'anda muno wazanyile antu aingi ala yati yakongana. 28Alino ayanena ati, “Mwemo mweisikulu mwamanya ningo vino Muyuda, ukulingana ni mipepele yakwe, atazumiliziwa ukulanda nanti ukuminkana na Akulukuwa. Lelo Leza watandanga vino ntalinzile nataka umuntu umwi ukuti wakowela nanti atasanguluka. 29Caleka lino wali watuma kuti nize, ntakanyile kwiza. Uzye, icani cino ungamile?”
30Konelio aasuka ati, “Cali pacisila ca manda yani lino napepanga mu ng'anda yane manguzi, ni nsita yakwe 3 koloko. Umukupumikizya umuntu uwazwite insalu ziyengese aimilila nkolelo yane 31avwanga ati, ‘Konelio! Leza watauvwa ipepo lyako nu kumanya imilimo yako iya luse. 32Tuma umuntu umwi ku Yopa ku muntu wi zina lyakwe Simoni Petulo. Wene umwenyi mu ng'anda yakwe Simoni, kanyuka wa mpapa, wino ing'anda yakwe yakulwa mu nkumba yakwe yemba.’ 33Caleka natumile kuti wize zuwa, nga wacita ningo pano wiza. Ndakai swensi tuli pano pa manso yakwe Leza, kulolela kuvwa cili consi ndi vino Umwene watapela ilamulo kuti uvwange.”
Petulo mu ng'anda yakwe Konelio
34 #
Malg 10:17
Petulo atandika ukuvwanga ati, “Ndakai namanya vino ica cumi Leza ataya na kasoozi pa muntu ali wensi. 35Wino wensi akamoopa nu kucita vyawololoke, wene akazengelwa nawe nanti angala uwamu mutundu uze. 36Mwamanya ilandwe lino watumile ku ina Izlaeli, ukukosola Ilandwe Lisuma ilya mutende kupitila muli Yesu Klistu, wino ali Mwene wa antu onsi. 37Mwamanya cintu cimwi cikulu, icacitike mu mpanga yonsi mu Yudeya, kutandika mu Galile pacisila lino Yoane wakosozile ilandwe lyakwe ilya luwatizyo. 38Mwamanya vya pali Yesu uwaku Nazaleti, na vino Leza wapongolwile Mupasi Wamuzilo panoli nu kumupeela maka. Wapisile konsi konsi, ala akucita visuma nu kupozya yonsi yano acuziwanga na Ciwa, pano Leza wali nawe. 39Sweswe tuli yakambone pa vintu vino wacisile mu mpanga yonsi ya Ayuda, nga nu mu Yelusalemu. Lyene yamukomile pa kumutana pa lupanda. 40Lelo Leza wamuzyukwile kufuma ku afwe pacisila ca manda yatatu alenga na kuti aloleke, 41kusi ku antu onsi, suka sile sweswe, swe muno Leza wasolwile mpiti kuya yakambone yakwe. Kuli kuti walolekile kuli sweswe swe muno twalile nu kumwa pamwi nawe pacisila cakuzyukuka kwakwe kufuma ku mfwa. 42Wene watupile ilamulo kuti twakosola ilandwe ku antu, nga nu kupeela umboni vino wene ali wino Leza wasonta kuya kapingula wa antu, aumi na afwe kwene. 43Wii ali wino yakasema yonsi yacitile umboni pa kuvwanga vino Leza alelela maifyo ya muntu ali wensi uwataila mwi zina lyakwe.”
Ainamasi yapokelela Mupasi Wamuzilo
44Lino Petulo acili akuvwanga, Mupasi Wamuzilo aikila pali yano onsi auvwanga kwi landwe lyakwe. 45Ayuda yano ataila, aizile na Petulo kufuma ku Yopa yazunguka pa kulola vino na Akulukuwa kwene yapokelela uwila wa Mupasi Wamuzilo. 46Pano yuvwa yakuvwangila mu ndimi zya misango yuze ala yakulumbanya ukulu wakwe Leza. Petulo avwanga ati, 47“Antu yaa yati yapokelela Mupasi Wamuzilo, wakwe vino naswe twapokelile. Uzye kungaya umwi angayalesya kuti yawatiziwe na manzi?” 48Nga ayanena kuti yawatiziwe mwi zina lyakwe Yesu Klistu. Lyene yamupapata kuti aikale nao pa manda anono.
Petulo walondolwela ivi lyamu Yelusalemu pa vintu ivyacitike
Currently Selected:
Milimo 10: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
