Milimo 9

(Mil 22:6-16; 26:12-18)

1Lelo Saulo watwalilile kupangila kukoma alondezi ya Mwene. Caleka aya kuli Simapepo Mukulu 2kuti angamupeela ya kalata akuimanyisya ku ntunguluzi zya Ciyuda mu mang'anda ya mapepo ku Damasiko, pakuti ndi wazanyileko yamwi akalondela nzila ya Mwene, akwate maka aku yalema onsi, aonsi na anaci, ayatwale ku Yelusalemu. 3Mu nzila lino Saulo wapalama pipi na Damasiko, mukupumikizya uluswepo kufuma mwiyulu luyengesa kulizya panoli.

4Lyene apona pansi auvwa izwi likuti, “Saulo, Saulo! Pacani ukunzunya?”

5Nawe auzya ati, “Uzye wewe weni Mwene?”

Ni izwi lyuvwika liti, “Anene Yesu, wino ukuzunya. 6Lelo katuka ingila mu musumba, amuno umanenwa cino ulinzile kucita.”

7Antu yano ali na Saulo pa lwendo, imilila kwaula kuvwanga cimwi. Yuvwile izwi lelo yataweni umuntu nanti umwi. 8Alino Saulo akatuka amemetula amanso kuti alole, lelo aposiwa kulola. Caleka antu yano wali nao yamulema pi kasa yamutungulula yaya nawe mu Damasiko. 9Lyene watenzi manda yatatu kwaula kulola, ala asyakulya nanti kumwa cimwi.

10Mu Damasiko mwali mulondezi uwi zina lyakwe Ananiya. Wakweti cilolwa, muno Mwene wamunenyile ati, “Ananiya!” Nawe aasuka ati, “Anene, Mwene.”

11Mwene nawe amunena ati, “Iteyanye uye ku museo uno yakati, Museo wololoke, pa ng'anda yakwe Yuda uuzyepo umuntu afumile ku Taliso, wino izina lyakwe a Saulo. Wene akupepa, 12nga nu mu cilolwa watalola umuntu uwi zina lyakwe Ananiya akwingila nga nu kwika makasa yakwe panoli, pakuti angalola nupya.”

13Ananiya aasuka ati, “Mwene, antu aingi yati yanena vya pa muntu wii, nga na pa vintu vipisye vino wacita pa antu yako mu Yelusalemu. 14Wataiza kuno na maka kufuma kuli yasimapepo akalamba ukwiza lema yonsi akapepa mwi zina lyako.”

15Mwene anena Ananiya ati, “Pitanga, pano nati musola kuya muomvi wane, kuti aleke imanyike ku Akulukuwa nu ku ene nga nu ku ina Izlaeli. 16Nani nemwisikulu ndamulanga vintu vyonsi vino alacula pamulandu wi zina lyane.” 17Caleka Ananiya apita, aya aingila mu ng'anda muno Saulo wali, aika makasa yakwe panoli amunena ati, “Mwinane Saulo, Mwene umwisikulu, wino uwalolike kunuli umu nzila lino wizanga kuno, wata ntuma pakuti ungalola nupya uzuziwe na Mupasi Wamuzilo.”

18Lilyo kwene vintu vimwi vikoline wa mamba ya nswi vilakata kufuma mu manso yakwe Saulo, nga alola nupya. Alino akatuka, nga awatiziwa. 19Pacisila lino walya cakulya, maka yawela munoli.

Saulo wakosola mu Damasiko

Saulo watenzi na alondezi amanda yanono mu Damasiko. 20Alungama sile mu mang'anda ya mapepo atandika kukosola ndi vino Yesu Mwana wakwe Leza.

21Antu yonsi amuvwanga yazunguka yauzyanya yati, “Uzye wii asi muntu wino akakoma yano akataka izina lii mu Yelusalemu? Uzye atizile kuno pamulandu uli umwi kwene uwakulema antu yao nu kuyasenda kuli yasimapepo akalamba?”

22Lelo kukosola kwakwe Saulo kuya ukwa maka kuluta, ni visinka vyakwe ivyakuti Yesu wali a Klistu vitali vyakutwisika, cakuti Ayuda ali mu Damasiko yatangamuzya nanti cimwi.

23 # 2Kol 11:32 Pacisila ca manda aingi, Ayuda yapangana kukoma Saulo. 24Lelo antu yamwi yamusokolwela nkama pali cii. Saulo nawe amanya vino musanya nu usiku yapempulanga mpongolo kuti ataca utuke yace yamukome. 25Lelo usiku alondezi yakwe Saulo yamusenda, yamufumizya apali cipongo mu lung'umba lwi linga, yamwisizya pansi mu muse.

Saulo mu Yelusalemu

26Walanga Saulo waya ku Yelusalemu, aezya kuminkana na alondezi yauze. Lelo yonsi yamoopa pano yatataile vino wene wataya mulondezi.

27Lyene Banaba amutola, amusenda ku atumwa nga ayalondolwela vino Saulo waweni Mwene mu nzila, vino Mwene wamuvwanzizye, na vino mu Damasiko wali umupame pa kukosola mwi zina lyakwe Yesu.

28Alino Saulo aikala nao, apitana konsi mu Yelusalemu, ala akukosola nu kupama mwi zina lya Mwene.

29Avwanga nu kupazyanya na Ayuda yano avwanganga Cigiliki. Lelo yene yalondanga kumukoma. 30Lino aina muli Klistu yamanya cii, yatwala Saulo ku Kesaliya, yamutuma ku musumba wa Taliso.

31Lyene iuvi lyamu Yudeya monsi, Galile, na Samaliya liya nu mutende, likomeleka nu kukulilako kupitila mu maka ya Mupasi Wamuzilo, pano lyali ni coopo ku Mwene.

Petulo mu Lida nu mu Yopa

32Petulo wapitanga konsi konsi, nga pa kasita kamwi waile atandalila antu yakwe Leza ku Lida.

33Kuku aya akomenkanya umuntu izina lyakwe a Eneya, wino uwali icite nupya atali na maka yakukatuka kufuma pa musanzi pa myaka cinani. 34Petulo amunena ati, “Eneya, Mwene Yesu wakupozya. Katuka wanze musanzi wako.” Lilyo kwene Eneya akatuka. 35Alino antu yonsi aikalanga mu Lida nu mu muputule wa mpanga ya Syaloni yalola Eneya. Awe yataila yasenukila ku Mwene.

36Mu Yopa mwali mulondezi umwanaci izina lyakwe a Tabita (Izina lyakwe mu Cigiliki a Dokasi, cikusenula mpombo). Wasumvile insita yakwe yonsi mu kuomba milimo isuma nu kukumbusuka apina. 37Pa kasita kwene kaka alwala afwa. Alino antu yafula icala cakwe yacilalika mu muputule wa papela. 38Ku Yopa kutaali ukutali kufuma ku Lida, nga alino alondezi ali mu Yopa yuvwa ukuti Petulo ali mu Lida, yatuma aonsi yaili na mazwi yakuti, “Twapapata, pitisya iza kuno.” 39Caleka Petulo apita nao. Lino wafika, yamutwala pa muputule uwa papela. Alino yamukamfwilwa yonsi yamulizizya, ala yakulila nu kumulanga amalaya na makoti yano Dokasi wayasumile lino acili umumi. 40Lyene Petulo afumya yonsi mu muputule, afukama pansi apepa. Alino aseleukila ku cala ati, “Tabita, katuka!” Lyene Tabita azyuka, nga lino walola Petulo, akatuka. 41Petulo amulema pi kasa amukatusya. Alino aama yano onsi ataile, pali pamwi na yamukamfwilwa, amulangizya kunoyali ala umumi.

42Lyene impwelo ya pali cii isalangana konsi mu Yopa, antu aingi yataila mu Mwene. 43Lyene Petulo watenzi mu Yopa pa manda aingi pamwi nu muntu umwi uwali kanyuka wa mpapa, zina lyakwe a Simoni.

Petulo watandalila Konelio

Currently Selected:

Milimo 9: MamL13

Highlight

Copy