Tɔdɔ 15

Ŋgala ꞌBa Musa

1Kina Musa ni ti Yisarele pili koloma ŋgï rɔ toba ŋgala nime zi ŋere Bɔkoꞌba, kiya te,

“Ti moba ŋgala zi Bɔkoꞌba gɔ akaꞌda ti tigɔ dɔ kiteli abo.

Kosani ni ti bɔ dɔmo ga bo ululu ꞌdeni mï mini löbu.

2Bɔkoꞌba na rɔ tigɔ ma gbï rɔ ŋgala zö.

Bo ako ꞌdeni bo kɔmɔ ma. Bo na rɔ ŋere Bɔkoꞌba ma.

Kina ti mïlëlu bo.

Ŋere Bɔkoꞌba ꞌba ꞌbu ma ti moba rɔ löbu dɔ kiteli abo.

3Bɔkoꞌba na rɔ bɔ ya.

Möyï bo na rɔ ŋere Bɔkoꞌba.

4Bo ululu aribiya ꞌba bɔ dɔliŋɔ ꞌdeni ti bɔ kanya mo ga gɔ mini löbu.

Bɔ këlu ma lakalaka mo ga ari ꞌdeni ŋgï pili gɔ mini.

5Mini kalo nima indiyɔ dönnï ꞌdeni.

Lïjë önzu ŋgï bïcï mini bërï kɔzɔ kulugbï döku.

6Yö, ŋere Bɔkoꞌba, dörï yï embe sowa.

Dörï yï ïyëyï mï bɔ koꞌdɔ ya tïyï ga ŋgï kɔtɔkɔtɔ.

7Ti tigɔ dɔ kiteli ꞌbï na kïtïŋï bɔ ŋbörï ꞌbï ga ꞌdeni bërï.

Okpekpe kpa ya ꞌbï ꞌdeni rönnï köbö koŋma lïjë yaga kɔzɔ wuyö.

8Tawo ꞌbï iꞌdi mini löbu ŋgï kɔrɔ kulu dönï bi kɔtɔ kɔzɔ tëlï.

Mï zana mini ma kalo kulöwö tönë ileki ŋgï këlë yaga.

9Kuruku bɔ ya ze naga nima ögö iya te,

‘Dëdï doga gönnï dota kpënnï.

Ti doza mï a ꞌba mɔri ꞌbënnï ga dogba kɔzɔ ma doꞌdɔkɔ togba mo.

Ti dotɔ mbele ze ga dotɔtɔ ëꞌbënnï ga ꞌdoyi.’

10Ne oŋgɔ Bɔkoꞌba, tawo ꞌbï ma mï kɔtɔ le te na kona Ezipeto ŋgï gɔ mini löbu.

Lïjë önzu ŋgï kɔzɔ yamo mï mini löbu.

11Bɔkoꞌba ma yala na këdï kɔzɔ nï ŋere Bɔkoꞌba? Nï ma koro rɔ mbëmbë nime.

Yë na ti kɔꞌbɔ toꞌdɔ gɔ kotɔ kɔzɔ ꞌbëyï?

12Ombi közïyï tɔrɔ

na yayi kindiyɔ bɔ ya ze ga ŋgï.

13Ti akɔꞌɔ ꞌbï ame lipo mï kɔtɔ ne ti kokɔkɔ bilaka ame ga kutë gɔmo ne ŋgï.

Ti kogbɔ lïjë ŋgï ti tigɔ ꞌbï koto lïjë mï dɔyayi ma laka ꞌbï.

14Laki ti kuwö kina ti rönnï kïlëꞌdï ŋgï

tikere kindaꞌba Pilisitiya ŋgï.

15Ŋere ꞌba Edome ti këdï dɔ tikere.

Rɔ kïlëꞌdï ti kindaꞌba ŋere ꞌba Mowaba.

Bilaka ame ga rɔ Kanana mo ga ne ti kolɔkpɔ ŋgï yaga.

16Tikere ni ti rɔ kïlëꞌdï ti kindaꞌba lïjë ŋgï.

Ti tigɔ ꞌbï lïjë ti kɔrɔ ŋgï te kɔzɔ döku ŋbö bilaka ꞌbï ga kiteli,

ŋbö bilaka ꞌbï ga ame kutë gɔmo ꞌdeni ne kiteli lïjë.

17Kina ti koꞌde lïjë bilaka ꞌbï ga kako

koloma dɔ döku koro ꞌbï,

gɔ bi ame nï na kileŋo ꞌdeni rɔ bi ꞌba loma ꞌbï ne.

Bi ꞌba mötu mo közïyï na kileŋo.

18Rɔ löbu ꞌbï ꞌba ŋere Bɔkoꞌba ti köꞌbö rɔ ŋburuŋburu.”

Ŋgala ꞌBa Miriyama

19Mï kada nima koꞌja kosani ꞌba Ezipeto ti aribiya mo ga kɔdɔ ꞌdeni mï zana mini löbu yɔ na Bɔkoꞌba kiꞌdi mini löbu kileki ŋgï koꞌboli dönnï. Tine Yisarele umu ꞌbënnï ꞌdeni kari kebe mï dɔyayi ma këlë. 20Kina Miriyama bɔ kumë lende ꞌba Bɔkoꞌba lëmï ꞌba Arona ni kogba kaliseye ŋgï ꞌja mɔtɔ ga kulölï gönï toba ŋgala tomba kaliseye tusï mo. 21Lɔko oba iya te,

“Oba ŋgala zi Bɔkoꞌba gɔ akaꞌda ti tigɔ dɔ kiteli abo.

Kosani ni ti bɔ dɔmo ga bo ululu ꞌdeni mï mini löbu.”

Mini Kata

22Kina Musa kokɔkɔ Yisarele ŋgï di kpa Yöpö Kasi yayi lïjë kari mï mökö ꞌba Surö. Lïjë iliŋgere ŋbö kada dɔ mota koꞌja a mɔtɔ rɔ mini dë. 23Lïjë ari kömö Mara, tine mini mo rɔ ma kata bɔtɔ kɔꞌbɔ tuwë mo dë. Gɔ köꞌdu mo na ma ꞌdɔ kiꞌdi kïdëkï möyï mo rɔ Mara ne ama kiya te “Ata”. 24Kina bilaka naga nima kebe ŋgï tilende rɔ Musa, iya te, “Waꞌdi na gɔ duwë?”

25Musa udu zi Bɔkoꞌba na Bɔkoꞌba kileme ŋgërï mɔtɔ ŋgï zi bo. Bo ogba ŋgërï tönë kuꞌdu mï mini nima na këyï ŋgï yaga.

Kina Bɔkoꞌba kiꞌdi köꞌdu kiꞌdi ŋgï zi Yisarele toloma gɔmo, bo kiyɔzɔ lïjë gbï di yayi. 26Ŋere Bɔkoꞌba ose zïnnï te, “Ɔdɔ kuwöke dɔma laka ma ŋere Bɔkoꞌba ꞌbe koroke köꞌdu kiꞌdi ma ame ga mose ziye ne pili a mɔtɔ rɔ rɔkɔꞌɔ ma tönë ga moꞌde dɔ Ezipeto ne minza modɔ dɔye. Römöyï ma na rɔ Bɔkoꞌba bɔ yëyï ꞌba yida rɔye.”

27Di yayi na lïjë kënyï kari Elima bi ma ti daa teyi ꞌbutë dɔmorïyö ŋgërï mbere kuluku kɔtɔ kɔdɔ dɔmo ꞌbutë rïyö kɔrɔ kpamo yayi. Kina lïjë koga taya ꞌbënnï ŋgï yayi ŋgɔsi kpa mini nima.

Currently Selected:

Tɔdɔ 15: BEK

Highlight

Copy

Compare