Romebi 2

Ebɔrɛ be demu be keji be asheŋ

1Amoso, manɛ be ekpa nɛ fo dimɛdi kɔ nsaa tiŋ a wu fo barkasa kulubi? Ŋkpal manɛ so, kanaŋkama nɛ fo du nseŋ wu fo barkasa kulubi, fee ji nna a bri fo gbagba be kumu nna na, ŋkpal manɛ so, asɔ koŋwule na nɛ fee wora. 2Nɛ Ebɔrɛ bre bee ji basa nɛ baa wora asheŋ ere demu, an nyi e ka bee ji asheŋ kashenteŋ be ekpa so. 3Ama fo ere dimɛdi, asheŋ nɛ fo kɔ a wu basa kulubi ere gbagba nɛ fee wora, amoso, fee tama fanɛ feeŋ nya ŋ gelge Ebɔrɛ be demuji to a? 4Ŋko fo kpal Ebɔrɛ be kelela ka shi mo to ga na so nna nɛ e ka maa nya manaŋ a gberge basa kusoe na nɛ mbe kanyiti na so so nna a fɛl mo a? Fo maŋ nyi fanɛ Ebɔrɛ be kelela wɔtɔ nna nɛ fo nya n lar fo alubi to a? 5Ama ŋkpal fo kagbene ka du kpakpa a maa sha kechɛrga na so, fo wɔ fo alubi na to nna a shin nɛ Ebɔrɛ be agbo bee kaa a ti so a jo kachɛ nɛ mbe agbo nɛ mbe demuji kashenteŋ be ekpa so na bee lar efuli na. 6Kusɔ kama nɛ esa wora, Ebɔrɛ beeŋ ka mo kumo be kukɔ. 7Bumo nɛ alelasheŋ be kewora maa gben bumo nɛ baa fin kemaŋkura nɛ bunyaŋ nɛ kebaawɔtɔ nɛ k maŋ kɔ luwu na, e beeŋ sa bumo ŋkpa nɛ k maŋ kɔ ekar na. 8Ama bumo nɛ b wɔ bumo gbagba be aparsheŋ to a kini kashenteŋ na be kebɛso nsaa bɛ alubi so na, Ebɔrɛ be kagbene beeŋ kaa nɛ mbe agbo e ba bumo so. 9Tɔrɔ nɛ kayurnyaŋ beeŋ ba dimɛdi kama nɛ e bee wora alubi so, Juwebi e naaŋ juŋkpar n nya amo pɔɛŋ nɛ nnyamase e bɛ so. 10Ama ekama nɛ e bee wora alelasheŋ, kemaŋkura nɛ bunyaŋ nɛ kagbenewushi beeŋ baa wɔ amodoŋwura so. Juwebi e naaŋ juŋkpar n nya amo pɔɛŋ nseŋ ta nnyamase m bɛ so. 11Ŋkpal manɛ so, Ebɔrɛ maa kpɛa basa to.

12Bekama nɛ b maŋ kɔ mbra na nseŋ wora alubi beeŋ lar mbra na be kaman n wu. Bekama malɛ nɛ b wɔ mbra na to nseŋ wora alubi, mbra na to nɛ Ebɔrɛ beeŋ bɔla n ji bumo demu. 13Ŋkpal manɛ so, mannɛ basa nɛ baa nu mbra na nɛ Ebɔrɛ bee nase kumo fanɛ b la belelapo mbe anishito, bumo nɛ baa wora kusɔ nɛ mbra na bee kaŋɛ na nɛ Ebɔrɛ beeŋ ba nase kumo fanɛ b la belelapo. 14Kashenteŋto, nnyamase maŋ kɔ anebi Mosis be mbra na, ama saŋkama nɛ bumo gbagba ta nfɛra nɛ a wɔ bumo to na n wora kusɔ nɛ mbra na bee ŋini, kumo ere bumo be nfɛra na ki mbra na nna n sa bumo na, ama bumo alɛ maŋ kɔ mbra na. 15Bumo be asheŋ woraso na e naa ŋini fanɛ Ebɔrɛ ta asɔ nɛ mbra na bee ŋini na n wɔtɔ bumo be ŋgbene to. Nɛ bumo be elakal gba bee ŋini fanɛ kashenteŋ nna, ŋkpal manɛ so, saŋko bumo be nfɛra maa dese bumo ŋkpal alubi so, saŋko malɛ nɛ a bee yili bumo be kaman. 16To, loŋ malɛ nɛ baru lela nɛ mee bɔ na bee ŋini fanɛ asheŋ beeŋ ba kaa du kachɛ nɛ Ebɔrɛ beeŋ bɔla Yesu Kristo so n yili edimɛdi be wulo be nfɛraana so n ji bumo demu.

Juwebi nɛ mbra na be asheŋ

17To, mannɛ fo e naa tre fo kumu Juw nsaa ta fo yirda a deŋi Mosis be mbra na so a wɔtɔ a ji njɔŋ a kaŋɛ fanɛ fo nɛ Ebɔrɛ be nferinto wɔ ebel na a? 18Mannɛ fo e naa kaŋɛ fanɛ fo nyi kusɔ nɛ Ebɔrɛ bee sha fanɛ esa e wora, fo alɛ naŋ koya ashi mbra na to a nyi kusɔ nɛ k daga esa ka lara na a? 19Mannɛ fo koŋwule na e naa kaŋɛ fanɛ fo e baa la esa nɛ e bee keta betanpo kekpabi nsaa du fanɛ kefulto a sa bumo nɛ b wɔ tentembiri to na a? 20Mannɛ fo koŋwule na e kraa kaŋɛ fanɛ fo e la basa balto be eŋinipo nɛ mbibi be eŋinipo, ŋkpal manɛ so, fo ere be kanyiasheŋ na nɛ kashenteŋ na bee shi mbra na to nna a? 21To, fo nɛ fee ŋini basa pɔtɛ asheŋ, fo maa ŋini fo kumu loŋ be asheŋ na a? Fo e naa malga abɔrɛsheŋ a sa basa fanɛ b sa maa yuri, fo alɛ nsaa yuri a? 22Fo koŋwule na e naa kaŋɛ basa fanɛ b sa maa di bumo braana be beche ŋko a shin nɛ bumo braana be bekul e baa di bumo, fo alɛ nsaa wora loŋ a? Fo kishi agbir, fo alɛ nsaa yuri asɔ ashi amo be ebuana to. 23Fo e wɔtɔ a kɔ mbra na a ji njɔŋ, fo alɛ nseŋ naa shin nɛ fo kemaa bɛ amo so bee bar Ebɔrɛ anishinyɔr. 24Loŋ koŋwule na malɛ nɛ abɔrɛsibɛ na bee kaŋɛ na fanɛ: “Menyi, Juwebi so nɛ nnyamase bee malga a ji Ebɔrɛ emɔrɔ.”

25Nɛ fee bɛ mbra na be kɔnɔ so nseŋ ku kututu, kumo ere fo keku na kɔ kifi, ama nɛ fo maa bɛ mbra na be kɔnɔ so nseŋ ku kututu, kenyanyaŋɛso nɛ fo ku na. 26Fo maŋ nyi fanɛ basa nɛ b maŋ ku atutu na baa wora asɔ nɛ mbra na bee ŋini, Ebɔrɛ bee sɔ bumo nna fanɛ bumo nɛ b ku atutu a? 27To, men baa nyi fanɛ basa nɛ b maŋ ku durnya ere to, bumo alɛ nsaa bɛ mbra na be kɔnɔ so na be kebaawɔtɔ so nɛ Ebɔrɛ beeŋ yili n ji menyi nɛ men ku nseŋ naa kɔ mbra na n ti so na demu. 28Mannɛ kenishiso nɛ baa ta a pin Juw, mannɛ kuku kututu be nwɔl na n lɛ na malɛ e la kashenteŋ be katutuku na. 29Kashenteŋto, dimɛdi be kebaawɔtɔ to e naa ŋini e ka la Juw nɛ kashenteŋ malɛ be keku na la kagbene to be kesheŋ, Ebɔrɛ be asheŋ nna, mannɛ kenishiso be asheŋ nna. Nɛ esa nɛ e ku loŋ na malɛ be kechɔrɔ bee shi Ebɔrɛ kutɔ nna, mannɛ nyiŋgbasa kutɔ.

Currently Selected:

Romebi 2: GJNb

Highlight

Copy

Compare