Romebi 3

1To, nɛ nuso be kechɔ nɛ Juwebi chɔ basa pɔtɛ? Ŋko manɛ be tɔnɔ nɛ katutuku kɔ? 2Cha, Juwebi baa chɔ basa pɔtɛ ekpa kama so nna, ŋkpal manɛ so, kusɔ nɛ k juŋkpar e la fanɛ bumo nɛ Ebɔrɛ ta mbe mmalga m bɔɔ enɔ. 3Ama nɛ bumo be beko malɛ kini kebugi epunto n sa Ebɔrɛ ai? Loŋ beeŋ tiŋ n shin nɛ Ebɔrɛ malɛ e ki kɔnɔleŋiwura a? 4Kaarɛ fanɛ loŋ e tiŋ n wora. Nɛ nyiŋgbasa bre la efɛpo, Ebɔrɛ bre la kashenteŋjipo nna saŋkama fanɛ kananɛ abɔrɛsibɛ na bee kaŋɛ na. A yɛ:

“Fo mmalga to e naa ŋini fo ka kɔ kashenteŋ,

fo alɛ beeŋ baa ji a lar fo edemu to.”

5Kesheŋ bishiso ko malɛ nde fanɛ: “Nɛ fanɛ anyi be asheŋ lubi bee shin nɛ basa bee wu Ebɔrɛ be alelasheŋ, nuso nɛ an naa kaŋɛ ere? An kaŋɛ fanɛ nɛ Ebɔrɛ bar mbe agbo anyi so, e maŋ wora n nyalɛ ŋko?” Nyiŋgbasa be kamɔrɔji be kamalga nɛ mee malga na. 6Kaarɛ, loŋ maŋ kɔ ekpa kuraa, ŋkpal manɛ so, nuso nɛ Ebɔrɛ daa tiŋ a ji durnya ere to ebi demu? 7Ama esa ko malɛ kraa beeŋ naŋ tiŋ n ji emɔrɔ m bishi le: “Nɛ fanɛ ŋkpal ma efɛsheŋ so Ebɔrɛ be kashenteŋ na bee lar efuli nɛnɛ a nya kemaŋkura a ti so, manɛ e naaŋ ba nɛ Ebɔrɛ kaŋɛ fanɛ n wora n da so?” 8Le be kamalga koŋwule ere malɛ so nɛ basa ko bee yili so a ku anyi kɔnɔ a kaŋɛ fanɛ loŋ nɛ anyee kaŋɛ na. B yɛ: “Men shin nɛ an baa wora alubi nɛ a baa ki alela.” Loŋ be basa be kasogberge baŋ daga bumo nna.

Dimɛdi ka maŋ du cheembi be asheŋ

9To, naniere, nuso nɛ anyeeŋ kaŋɛ fanɛ anyi chɔ basa pɔtɛ ŋko? Cha, anyi maaŋ tiŋ ŋ kaŋɛ loŋ kikɛ, ŋkpal manɛ so, an teŋ wu fanɛ dimɛdi kikɛ, Juwebi nɛ basa pɔtɛ kikɛ wɔ alubi to nna. 10Loŋ malɛ nɛ abɔrɛsibɛ na bee kaŋɛ na fanɛ:

“Elelapo kikɛ maŋ wɔtɔ Ebɔrɛ be anishito,

hale ekoŋwule gba maŋ wɔtɔ.

11Esa kikɛ maŋ wɔtɔ a pin asheŋ to,

ekama malɛ maŋ naa wɔtɔ a kɔ a fin Ebɔrɛ.

12Ekama nyam kilgi m pal kaman n sa Ebɔrɛ n choŋ,

ekama nyam ki jiga.

Esa kikɛ maŋ wɔtɔ a wora kelela,

hale esa koŋwule gba maŋ wɔtɔ.

13Ekama be kɔnɔ du fanɛ b ka kur nchaŋ nna n nase.

Efɛ nɛ bumo be nnɔana na bee ku

mmalga nɛ a bee lar bumo be nnɔana to

du fanɛ wasa ka duŋ esa n lara kɔrtɔ n wɔtɔ mo to na.

14Abar be kebaamelgi kpakpaso e bɔlɔ bumo be nnɔ to a wɔtɔ.

15Bumo be aya malɛ maa chɛr a yɛr bumo basa be kemɔ to.

16Kaplɛkama malɛ nɛ b yɔ, kasɔjija be tɔrɔ nɛ baa yige a lɛ basa so.

17B maŋ nyi kagbenewushi be ekpa.

18Bumo alɛ maŋ naa kɔ kabɔrɛŋana.”

19Ama an nyi fanɛ kusɔ kama nɛ mbra na bee kaŋɛ, basa nɛ b wɔ kumo to na to nɛ k de, saŋɛ na so esa kikɛ maaŋ nya kɔnɔ m bugi. Loŋ malɛ e naaŋ shin nɛ Ebɔrɛ e ji durnya kikɛ demu. 20Ŋkpal manɛ so, mannɛ esa nɛ e bee wora mbra be ashuŋ shunso e la esa nɛ Ebɔrɛ nase kumo fanɛ e la elelapo. Kusɔ nɛ mbra na baa ŋini e la kebaashin nɛ basa e baa pin kulubi be asheŋ.

Kananɛ Ebɔrɛ bee shin nɛ mo nɛ basa bee nya kɔnɔkoŋwule be asheŋ

21Ama naniere bre Ebɔrɛ ŋini kananɛ e nase kumo fanɛ basa e baa la belelapo mbe anishito, loŋ be ekpa na malɛ nɛ mbra na maŋ kɔ shɛŋ. 22Loŋ be shɛda nɛ mbra na gba nɛ anebiana na bee ji. Ebɔrɛ malɛ bee bɔla basa be yirda nɛ k deŋ Yesu Kristo so so nna a shin nɛ mo nɛ basa na kikɛ bee nya kɔnɔkoŋwule. Mo alɛ maa kpɛa basa to. 23Ŋkpal manɛ so, ekama nyam wora kulubi a maŋ taga to Ebɔrɛ be kemaŋkura na. 24Ama ŋkpal Ebɔrɛ be kuwɔr be kakɛ nɛ esa maa wora shɛŋ nsaa nya na so, asheŋ naŋ nyalɛ n sa basa, ŋkpal kesɔnyige be ekpa nɛ b bɔla Yesu Kristo so m bugi na so. 25Ebɔrɛ ta mo nna n sa basa nɛ e wu m mata be luwu nɛ k bee shin nɛ dimɛdi bee bɔla yirda so a nya alubi be ketampaŋ na. Ebɔrɛ wora loŋ nna nɛ e ŋini kananɛ e bee ji asheŋ nɛ amo be ekpa so, ŋkpal manɛ so, saŋɛ na e daa nyi basa be alubi nna nsaa nyiti bumo. 26Ama naniere bre e maa kplaŋ dimɛdi be alubi so, a ŋini e ka bee ji asheŋ nɛ amo be ekpa so. Loŋ malɛ e naa ŋini mo gbagba ka la asheŋ be keji nɛ amo be ekpa so be Ebɔrɛ, mo alɛ nseŋ naa ta esa nɛ e yirda Yesu a ki elelapo mbe anishito.

27To, nɛ manɛ so nɛ esa bee wu mbe kumu? E beeŋ tiŋ ŋkpal e ka bee bɛ mbra na so so a wu mbe kumu a? Ayai, ŋkpal manɛ so, mannɛ e ka bee bɛ mbra na so e shin nɛ e ji n lar Ebɔrɛ be anishito, ama ŋkpal e ka yirda so. 28Ŋkpal manɛ so, kusɔ nɛ an baa kɔ to e la fanɛ yirda e naa shin nɛ esa bee ji a lar Ebɔrɛ be anishito, mannɛ kebaabɛ mbra na be asheŋ woraso so. 29Ŋko Ebɔrɛ la Juwebi nawule be Ebɔrɛ nna a? Mannɛ basa pɔtɛ gba be Ebɔrɛ e la mo a? Bumo alɛ gba be Ebɔrɛ nna walɛ. 30Ebɔrɛ koŋwule e wɔtɔ, mo alɛ Juwebi nɛ basa pɔtɛ kikɛ, ekpa koŋwule so nɛ e bee bɔla a shin nɛ baa ji a lar. Bumo kikɛ be yirda so nɛ e bee yili a wora loŋ. 31Ama an ta le be yirda ere n ti mbra na ekpa ŋko? Ayai, an baa kraa kɔ kumo to a ti kumo so eleŋ.

Currently Selected:

Romebi 3: GJNb

Highlight

Copy

Compare