Romebi 16

Pɔɔl gbagba be kechɔrɔ be asheŋ

1An sipoche Fibi nna na nɛ mee ta mo a ŋini menyi. E bee chɛ Kɛŋkriya be asɔriebi to nna. 2Men sɔ mo menyi to fanɛ esa nɛ e la Enyɛnpe na peya, nɛ kechɛto kama nɛ e bee sha menyi kutɔ, men chɛ mo to kananɛ k daga bebɛsopo ka wora, ŋkpal manɛ so, e la esa nɛ e chɛ basa damta to nna n ta ma alɛ gba n ti so.

3Mee chɔrɔ Prisila nɛ Akwila nɛ b la m braana Kristo be beshumpo na. 4B daŋ kpal ma so nna n ta bumo be amu ŋ kpa kelara. Mee chɔrɔ bumo ga ŋkpal loŋ so, mannɛ n nawule gba malɛ e naa chɔrɔ bumo. Nnyamase be asɔriebiana na kikɛ gba bee chɔrɔ bumo ga. 5Mee chɔrɔ asɔriebi nɛ baa shɛr le be basa koŋwule ere pe na gba. Mee chɔrɔ n teri lela Epainites nɛ e baŋ juŋkpar m ba ta mbe yirda n deŋi Kristo so ashi Eeshia be kasawule so na gba. 6Mee chɔrɔ Mɛɛri nɛ e shuŋ ga n sa menyi na. 7Mee chɔrɔ Andrɔnikes nɛ Junias nɛ b la n niopibi Juwebiana nɛ ma nɛ bumo daa wɔ kabuti to na. B la basa nɛ b kɔ ketre nna ashi beshuŋipoana na to, bumo alɛ pin Kristo nna pɔɛŋ nɛ m ba pin mo. 8Mee chɔrɔ Ampliyates nɛ mee sha ga ashi Enyɛnpe to nna. 9Mee chɔrɔ Ebaanes nɛ e la m barkasa Kristo be eshumpo na nsaa chɔrɔ n teri lela Staakis gba. 10Mee chɔrɔ Apɛles nɛ e kpal Kristo so n luri kechɔŋkeni to nseŋ tiŋ n lar a yil na. Mee chɔrɔ Aristɔbules be kowu to ebi gba. 11Mee chɔrɔ n niopibi Juwnyɛn nɛ baa tre Hɛrodiɔn na nseŋ naa chɔrɔ Naasises be kowu to ebi nɛ b la Enyɛnpe peya na. 12Mee chɔrɔ Traifina nɛ Traifosa nɛ b la beche nɛ baa shuŋ ga ashi Enyɛnpe be kushuŋ na to na. Mee chɔrɔ n teri lela Pɛɛsis nɛ mo alɛ gba la eche n shuŋ ga Enyɛnpe be kushuŋ na to na. 13Mee chɔrɔ Rufes nɛ Enyɛnpe lara n sa mbe kumu na nseŋ naa chɔrɔ mo nio nɛ e ta ma alɛ gba ŋ ki mo pibi na gba. 14Mee chɔrɔ Asiŋkrites nɛ Flɛgɔn nɛ Hɛmes nɛ Patrɔbas nɛ Hɛmas nɛ bekurgepoana nɛ b wɔ bumo kutɔ na kikɛ. 15Mee chɔrɔ Filɔlɔges nɛ Julia nɛ Neria nɛ mo sipoche nɛ Ɔlimpas nɛ Ebɔrɛ be basa nɛ bumo nɛ bumo wɔtɔ na kikɛ. 16Men ta kasha cheembi m pipe abar be ŋgbuŋ kechɔrɔso. Kristo be asɔriebiana na kikɛ bee chɔrɔ menyi.

Pɔɔl be kamalga be ekar be asheŋ ŋiniso be asheŋ

17Ŋ kurgepoana, mee fiɛ menyi so nna fanɛ men baa de basa nɛ baa shin nɛ kebarga to bee ba basa to nseŋ naa lar keŋini nɛ men daŋ nya na be kaman a wɔtɔ a bar asheŋ ko m ba kaa kagle basa yirda be ekpa na so. Amoso, men baa gelge bumo. 18Ŋkpal manɛ so, mannɛ an Nyɛnpe Yesu Kristo na nɛ loŋ be basa na bee shuŋ na, bumo gbagba be epunana nɛ baa shuŋ a sa. Kɔnɔ belbelso nɛ ŋkpaŋ fuloŋ nɛ b kɔ a fule basa nɛ b maŋ nyi asheŋ to. 19Naniere esa kama nu menyi be kasonu be asheŋ, amoso, ma kagbene fuli ma ga ŋkpal menyi so. Ama mee sha fanɛ men baa kɔ kanyiasheŋ a yɔ kelela be kaplɛa so nna nsaa maa nyi shɛŋ a yɔ alubi be kaplɛa so. 20K maaŋ chɛr ko nɛ Ebɔrɛ nɛ kagbenewushi kikɛ bee shi mo kutɔ na e jija Setani be eleŋ kikɛ n shin nɛ e gbir menyi kumuli. An Nyɛnpe Yesu Kristo be kuwɔr be kakɛ e baa wɔ menyi to.

21Timoti nɛ e la m barkasa eshumpo na nɛ Lusias nɛ Jeesɔn nɛ Sosipata nɛ b la n niopibi Juwebi na bee chɔrɔ menyi.

22Ma Tɛɛshes nɛ Pɔɔl malga asheŋ ere n shin nɛ n sibɛ amo kawɔl ere to ere bee chɔrɔ menyi ashi Enyɛnpe na to. 23Gayes nɛ e la ma kowurnyɛn nɛ nfe be asɔriebi kikɛ bee shɛr mo pe na bee chɔrɔ menyi. Irastes nɛ e la kadegboŋ ere to be amansherbikenipo na nɛ an kurgepo Kwaates bee chɔrɔ menyi. 24[An Nyɛnpe Yesu Kristo be kuwɔr be kakɛ e baa wɔ menyi kikɛ to. Amɛn.]

Pɔɔl be lalaloge be kechɔrɔ be asheŋ

25Kemaŋkura e baa wɔ Ebɔrɛ nɛ e beeŋ shin nɛ men baa kɔ menyi be yirda na to a yil kpakpa ŋkpal baru lela nɛ m bɔ n sa menyi m malga Kristo be kubɔya na be asheŋ na so nɛ ŋkpal kashenteŋ be wulo nɛ k daŋ ŋana dra dra na kikɛ so. 26Naniere bre, ŋkpal asɔ nɛ anebiana na sibɛ n nase na so so, kashenteŋ na dii efuli nna. Ŋkpal Ebɔrɛ nɛ e wɔ ŋkpa to na saŋkikɛ be kusɔ nɛ e yili na so, kusɔ kama bugi to nna n dese a sa efuli kama so ebi, saŋɛ na so, baaŋ yirda nseŋ nu n sa Ebɔrɛ. 27Kemaŋkura e baa la Ebɔrɛ nɛ kanyiasheŋ kikɛ la mo nawule peya ashi Yesu Kristo to na mbaanaayɔ. Amɛn.

Currently Selected:

Romebi 16: GJNb

Highlight

Copy

Compare